Wednesday, 12 August 2020

அறிந்த பொக்கிஷம்... அறியாத பவளங்கள்... 12

சினிமா பாடல்கள் என்ற உடனேயே எல்லோரின்  நினைவிலும் உடனடியாக வருவது,  எம்எஸ் விஸ்வநாதன், இளையராஜா என்ற பெயர்கள் தான். ஆனால், ஜனரஞ்சக தமிழ் சினிமா பாடல்களில் இவர்களின் முன்னோடி கே.வி. மகாதேவன் என்பதை பலரும் அறிந்திருக்க மாட்டார்கள். தமிழ் சினிமாவில் கர்நாடக இசையும் தியாகராஜ பாகவதர், கிட்டப்பா, கே.பி.சுந்தராம்பாள், எம்எஸ் சுப்புலட்சுமி போன்ற பாடக, பாடகி கம் நடிக, நடிகைகளுக்கே இடமுண்டு என இருந்த 1940களில் அறிமுகமானவர், கே.வி.மகாதேவன். 


இன்றைய நாகர்கோவில் தான் அவரது சொந்த ஊர். இவரது தந்தை, அன்றைய திருவிதாங்கூர் சமஸ்தான ஆஸ்தான நாதஸ்வர கலைஞர். 1942ல் வெளியான மனோண்மணி படத்தில் துவங்கிய இவரது திரை இசை, அரை நூற்றாண்டு காலம் தமிழ், தெலுங்கு என தமிழ், தெலுங்கு மொழிகளில் இவர் இசையமைத்த படங்களின் எண்ணிக்கை 600க்கும் அதிகம்.


எம்ஜிஆர் நடிப்பில் 1952ல் வெளியான குமாரி படம்தான் அவருக்கு பெயர் வாங்கி தந்தது. 1960 மற்றும் 1970களில் தமிழ் சினிமா பாடல்களில் இவரது ஆதிக்கமானது,  விஸ்வநாதன், ராமமூர்த்தி இரட்டையர்களுக்கு கொஞ்சமும் குறைந்ததல்ல.

சுவாமி... மன்னா... இப்படியான புராண கால டயலாக்குகள்,  கர்நாடக இசை ராகங்களுன்  வெளியான படங்களுக்கு இசையமைத்த இதே கேவி மகாதேவன், ‘காட்டுக்குள்ளே திருவிழா கன்னி பெண்ணின் மணவிழா...‘ ‘கட்டித் தங்கம் வெட்டி எடுத்து காதல் எனும் சாறு பிழிந்து...‘ 'ஒரு வருஷம் ஒரு வருஷம் காத்திருந்தா கையிலொரு பாப்பா..' என எம்ஜிஆருக்கும்


‘நலம் தானா, நலம் தானா.. உடலும் உள்ளமும் நலம் தானா...‘ 'யாருக்காக இது யாருக்காக இந்த மாளிகை வசந்த மாளிகை' என சிவாஜிக்கும் ஜனரஞ்சக பாடல்களில் காதல் மாளிகை கட்டிக் கொடுத்திருக்கிறார், கேவி மகாதேவன்.


எம்ஜிஆரை வைத்து சாண்டோ சின்னப்பா தேவர் தயாரித்த 16 படங்களுக்கும் இவர் தான் இசையமைப்பாளர். ‘மனுஷனை மனுஷன் சாப்பிடுறான்டா, தம்பி பயலே….‘ ‘உன்னை அறிந்தால்.. நீ உன்னை அறிந்தால் உலகத்தில் போராடலாம்…‘, ஓடி ஓடி உழைக்கணும் ஊருக்கெல்லாம் கொடுக்கணும்..‘ ‘கடவுள் எனும் முதலாளி கண்டெடுத்த தொழிலாளி விவசாயி‘, 'நெஞ்சமுண்டு நேர்மையுண்டு ஓடு ராஜா...' என எம்ஜிஆரின் தத்துவ பாடல்களுக்கு மட்டுமல்ல, எம்ஜிஆரின் சொந்த தயாரிப்பான அடிமைப்பெண் படத்துக்கும் இசையமைத்தது கேவி.மகாதேவன் தான்.



ராஜராஜன், மாட்டுக்கார வேலன், என் அணணன், பல்லாண்டு வாழ்க, பட்டிக்காட்டு பொன்னையா என எம்ஜிஆர் நடித்த சுமார் 40 படங்களுக்கு இசையமைத்திருக்கிறார், கேவி மகாதேவன். எம்எஸ்வி பாடலோ என நினைக்கும் 1960களின் பல பாடல்கள் இவருடையதாக இருப்பதையும் அறிய முடிகிறது.


‘பணம் பந்தியிலே, குணம் குப்பையிலே...‘ ‘ மணமகளே, மருமகளே வா வா..‘ உன்னை சொல்லி குற்றமில்லை என்னை சொல்லி குற்றமில்லை...‘ ‘ஏரிக்கரையின் மேலே போறவளே பொன் மயிலே நில்லு கொஞ்சம் நானும் வாரேன்...‘, 'அமுதும் தேனும் எதற்கு நீ அருகினில் இருக்கையிலேயே எனக்கு...', 'போறவளே போறவளே பொன்னுரங்கம் என்ன புரிஞ்சிக்காம போறியே என் கண்ணு ரங்கம்...' என காலத்தால் அழியாத கீதங்களை தந்தவரும் அவரே. 



இயக்குநர், கதாசிரியர், நடிகர் என பல அவதாரம் எடுத்த ஏ.பி.நாகராஜனின் பேவரைட் இவர்தான்.  ஏ.பி.நாகராஜன் இயக்கிய, சூப்பர் ஹிட் பாடல்கள் இடம் பெற்ற திருவிளையாடல், சரஸ்வதி சபதம், திருவருட் செல்வர், தில்லானா மோகனாம்பாள் படங்களின் இசையமைப்பாளர் கேவி மகாதேவன்.   

வசந்த மாளிகை, படிக்காத மேதை, எங்கள் தங்க ராஜா, நவராத்திரி, மக்களை பெற்ற மகராசி என சிவாஜி கணேசனுக்கும் ஏராளமான படங்களுக்கு இசையமைத்திருக்கும் அவரின் கைவண்ணங்கள் தான், ‘சித்தாடை கட்டிக்கிட்டு, சிங்காரம் பண்ணிக்கிட்டு...‘ ‘தைப்பிறந்தால் வழி பிறக்கும் தங்கமே தங்கம்..' போன்ற காலம் கடந்து நிலைத்து நிற்கும் பாடல்கள். ரசிகனுக்கு பிடித்தமான இசையை கர்நாடக இசையுடன் கலந்து ஊட்டுவது கேவி மகாதேவனின் ஸ்டைல்.  1950களின் இறுதியில் வெளியாகி பாக்ஸ் ஆபீஸ் ஹிட் அடித்ததோடு தமிழில் இருந்து இந்திக்கு சென்ற முதல் படமான சம்பூர்ண ராமாயணத்துக்கும் இவர்தான் இசை. 

'இரவினில் ஆட்டம் பகலினில் தூக்கம்..' என காற்றினில் கீதம் இசைத்த இவரது இசை ஆட்டம் 1970களிலும் ஓயவில்லை. சிவகுமார் நடித்த ஏணிப்படிகள் படத்தின் இசையும் இவரே. அந்த படத்தின் ‘பூந்தேனில் கலந்து, பொன் வண்டு எழுந்து...‘ ‘ஏனுங்க மாப்பிள்ளை என்ன நினைப்பு, இங்க என்னாத்த கண்டிங்க இந்த சிரிப்பு..‘ பாடல்களை கேட்காத 1980ஸ் கிட்ஸ் எவருமே இருக்க முடியாது.

அந்த ராத்திரிக்கு சாட்சி இல்லை, மேல் மருவத்தூர் ஆதிபராசக்தி என 1980களின் பிற்பகுதி வரை தமிழில் இசையமைத்த அவர், தெலுங்கில் 1994 வரை பாடல்களை தந்திருக்கிறார். அரை நூற்றாண்டுக்கு மேலாக திரை இசையில் திலகமாக இருந்த கேவி மகாதேவன், 1980ல் தெலுங்கில் வெளியாகி, இசைக்காகவே ஹிட்டடித்து இன்றளவும் பேசப்படும் சங்கராபரணம் படத்தின் மூலம் கர்நாடக இசையில் தான் எப்பவுமே தான் ஒரு மேதை என்பதை சினிமா உலகுக்கு காட்டினார். அதில் இருந்து பத்தாண்டுகள் கழித்து இவர் இசையமைத்த ‘ஸ்வாதிகிரணம்' தெலுங்கு படம் இசைக்காகவே விருதுகளை அள்ளி குவித்தது.

எம்எஸ் விஸ்வநாதனுக்கே வாய்ப்பு வழங்கியவர்.  ஜெயலலிதாவை ‘அடிமைப்பெண்‘ படத்தின் மூலம் (அம்மா என்றால் அன்பு...) பாடகியாக்கியவர்.  அதே படத்தில், 'ஆயிரம் நிலவே வா ஓராயிரம் நிலேவே வா...' பாடல் வழியாக எஸ்பி. பாலசுப்பிரமணியம் என்ற காலத்தை வென்ற பாடகரை தமிழ் ரசிகர்களுக்கு தந்தவர் என ஏராளமான பெருமைகளுக்கு சொந்தக்காரர், திரை இசை திலகம் கேவி மகாதேவன்

(பவளங்கள் ஜொலிக்கும்...)

#நெல்லை_ரவீந்திரன்

Tuesday, 11 August 2020

அறிந்த பொக்கிஷம்... அறியாத பவளங்கள்... 11

தமிழ் சினிமாவில் நீண்ட காலம் இருந்து முத்திரை பதித்தவர்கள் ஒரு பக்கம் இருக்க ஒரிரு படங்களை மட்டுமே கொடுத்து ஜொலிக்கும் பவளங்களும் உண்டு. அவர்களில் ஒருவர் தாதா மிராசி. மேற்கு வங்காளத்தை சேர்ந்தவர். சினிமா கதாசிரியர், இயக்குநர். நடிகர் திலகத்தின் நெருங்கிய நண்பர்களில் ஒருவர். அண்ணாவின் ஆசை, பூவும் பொட்டும், மூன்று தெய்வங்கள், ரத்த திலகம் இப்படி ஒரு சில படங்கள் மட்டுமே அவர் இயக்கி இருக்கிறார். 



ஆரம்பத்தில் ஜனரஞ்சகமாக செல்லும் திரைக்கதை திடீரென கிரைம் எல்லைக்குள் போவது தாதா மிராசியின் ஸ்டைல். இவரது பிரதான கதாபாத்திரங்கள் பெரும்பாலும் குற்ற உணர்வை மறைத்து மருளுபவையாகவே இருக்கும். மேற்சொன்ன படங்களில் கூட அப்படித்தான்.

ஜெயிலில் இருந்து தப்பித்து திருட வந்த வீட்டிலேயே அளிக்கும் உபசரிப்பை பார்த்து மருளும் மூன்று திருடர்கள தான் மூன்று தெய்வங்கள் கதை. அண்ணாவின் ஆசையும் படமும் அப்படித்தான். ஆனால், போரடிக்காமல் படத்தை கொண்டு செல்வது தாதாமிராசியின் ஸ்டைல். அதில் புதிய பறவை தனி முத்திரை.

இன்று வரை சினிமா ரசிகர்களால் உச்சரிக்கப்படும் ஒரு வசனம். சரோஜாதேவியின் "கோப்பால்... கோப்பால்..." என்பதை மறுக்க முடியாது.  இந்த வசனம் இடம் பெற்ற படம் "புதிய பறவை". சிவாஜி கணேசனின் சொந்த தயாரிப்பான இந்த படத்துக்கு அவரது எவர்கிரீன் ஹிட் வரிசையில் முக்கிய இடம் உண்டு. அவரது ரசிகர்களாக இல்லாதவர்களும் கொண்டாடும் படம், புதிய பறவை. இது வங்காளி திரைப்படம் ஒன்றின் ரீ மேக்.



மனைவியை கொலை செய்து விட்டு, மற்றொரு பெண் மீது காதல் ஏற்பட, மனதுக்குள் கொலையையும் காதலையும் கலந்து தவிக்கும் ஆன்ட்டி ஹீரோ வேடம், அந்த படத்தில் சிவாஜிக்கு.

மிகப்பெரிய மல்டி மில்லியனரான சிவாஜி, இரவு நேர கிளப்பில் பாடல்களை பாடும் சவுகார் ஜானகியை காதலித்து மணமுடித்து விட்டு, நடத்தையால் கோபமடைந்து அவரை கொன்று ரயில் தண்டவாளத்தில் வீசி விடுவார். இது சிங்கப்பூரில் நடக்கும்  சம்பவம். அதன்பிறகு, எதுவுமே தெரியாதது போல ஊட்டி பங்களாவுக்காக வரும் சிவாஜியை கப்பலில் கூடவே பின்தொடர்ந்து வரும் ரகசிய போலீஸ் அதிகாரிகளாக எம்ஆர் ராதா, சரோஜாதேவி.

படத்தின் ஆரம்பமே கப்பல் பயண காட்சிதான். இரவு நேர கிளப் டான்ஸ், பாடல், மது விருந்து, மேலை நாட்டு நடனம் என வித்தியாசமான தளத்தில் செல்லும் கதை, இடைவேளைக்கு பிறகு திகில் பிளஸ் கிரைம் பாதையில் செல்லும் போது தாதா மிராசியின் திறமை பளிச்சிடும். எம்எஸ்வி, ராமமூர்த்தி இரட்டையர்களின் இசையும் பாடல்களும் சேர்ந்து ரசிகர்களுக்கு புல் மீல்ஸ் விருந்து என்றே சொல்லலாம்.

"லதா, அத்தனையும் நடிப்பா... என்கிட்ட உண்மையை வரவழைக்க காதல் தானா உனக்கு கிடைத்தது..." என சிவாஜி பேசும் கிளைமாக்ஸ் வசனம், எவர்கிரீன்.

காதலையும் கிரைமையும் கலந்து கொடுத்த தாதா மிராசி, இந்த படத்தில் நடித்தும் இருக்கிறார். பிளாஸ்பேக்கில் சிவாஜியின் தந்தையாக வந்து சவுகார் ஜானகியால் குடும்ப மானம் பறிபோவதை கண்டு பொறுக்காமல் உயிரிழக்கும் கோடீஸ்வரர், தாதா மிராசி தான்



சிவாஜியின் நண்பரான இவர், சித்ராலயா கோபுவிடம் சினிமா கதை ஒன்றை சொன்ன விதம் தான், "காதலிக்க நேரமில்லை" படத்தில் டிஎஸ் பாலையாவுக்கு நாகேஷ் கதை சொல்லும் காட்சிக்கான இம்ப்ரஷன் என்பது கூடுதல் தகவல்

(பவளங்கள் ஜொலிக்கும்...)

#நெல்லை_ரவீந்திரன்

Saturday, 8 August 2020

அறிந்த பொக்கிஷம்... அறியாத பவளங்கள்... 10

எந்த வேஷம் கொடுத்தாலும் ஸ்கோர் பண்ணுபவரே சிறந்த நடிகர் என்றால் இவரே மகா நடிகர். தமிழை விட தெலுங்கில் இரு மடங்கு படங்களில் நடித்திருந்தாலும் தமிழுக்கு இவர் தந்த 50 பிளஸ் படங்கள் ஒவ்வொன்றும் தரமான நடிப்புக்கு கட்டியம் கூறுபவை. அவர்தான் எஸ்வி ரங்காராவ். ஆறடி உயரம், முன் வழுக்கை, கவுரவ தொப்பை என ஒரு நடுத்தர குடும்ப தலைவருக்கே உரித்தான தோற்றம். அதனால் தான் இவரது சினிமாவை பார்த்து முடித்ததும் ரங்காராவ் என்ற தந்தை கண்ணுக்குள்ளேயே நிறைந்திருப்பார்.



படிக்கும் போதும், அரசு பணியில் இருந்த போதும் நடிப்பின் மீது தீராத ஆர்வம் கொண்டிருந்த இவர், முதலில் தெலுங்கில் அறிமுகமாகி பின்னர் தமிழில் என்ட்ரி ஆனவர். இவரை முழுமையாக முதலில் அடையாளம் காட்டிய படம் "பாதாள பைரவி". நேபாள மந்திரவாதி வேடத்தில் வந்து பலே பிம்பலக்கா என அடிக்கடி கூறும் வசனம் ஹீரோவை தாண்டி இவர் மீது கவனத்தை திருப்பியது. இந்த படத்தின் தயாரிப்பாளர்கள் நாகிரெட்டி, சக்கரபாணி இருவருக்கும் இவர் மீது கரிசனம் உண்டு.


34 வயதிலேயே சாவித்திரியின் தந்தையாக வேஷம் போட ஆரம்பித்த ரங்கா ராவ், பணக்கார தந்தை, பாசமிகு தந்தை, ஏழைத் தந்தை, கவுரவமான பணக்கார தந்தை என பெரிய அளவில் அரிதாரத்தை மாற்றாமலேயே தனது நடிப்பால் பல விதமான தந்தை கேரக்டர்களை கண் முன்னே உலவ விட்டவர். மிஸ்ஸியம்மா படத்தில் கவுரவமான ஜமீன்தார், எங்க வீட்டு பிள்ளை, சபாஷ் மீனாவில் நகைச்சுவையுடன் கூடிய ஜமீன் தந்தை, கற்பகம் படத்தில் ஜெமினியின் பாசமான மாமனார், கருப்பு நிறத்துடன் அவலங்களை எதிர் நோக்கும் விஜயகுமாரிக்கு பாசமிகு மாமனாராக நானும் ஒரு பெண் படம் என ரங்காராவை தவிர வேறு எவரையும் தந்தையாக தமிழ் சினிமாவில் நினைத்துப் பார்க்கவே முடியாது.  கேரக்டர்களில் அப்படியே வாழ்ந்திருப்பார் மனுஷன்.



அலட்டல் இல்லாத ஜமீன்தாராகவும், செல்வந்தராகவும் தோன்றிய அவர், பெரும் பணக்காரர்கள் இரவு நேரத்தில் வீட்டில் அணியும் ஹவுஸ் கோட் என்ற ஆடைக்கே அடையாளம் தந்தவர். சிவாஜி கணேசனுடன் படிக்காத மேதை படத்தில் மிகப்பெரும் தனவந்தராக தோன்றி பெர்க்லே சிகரெட்டை புகைக்கும் ஸ்டைலே தனி. (அந்த கால விலை உயர்ந்த சிகரெட் அது. ரங்காராவுக்கு பிடித்தமானது. அதன் விளம்பர நடிகராகவும் இருநதிருக்கிறார்) அந்த படத்திலேயே அனைத்தையும் இழந்து துயரத்தின் விளிம்பில் நிற்கும் தந்தையாக நடித்திருப்பாரே, இரண்டும் வேறு விதம். "எங்கிருந்தோ வந்தான், இடைச்சாதி நான் என்றான், இங்கிவனை யான் பெறவே என்ன தவம் செய்து விட்டேன்..." என்ற பாடலில் சிவாஜிக்கும் ரங்காராவுக்கும் இடையே நடிப்பில் பெரிய போட்டியையே பார்க்க முடியும்.


தந்தை வேடத்துக்கு மட்டுமே ஆனவர் அல்ல அவர். புராண கால கதாபாத்திரங்கள் பலவற்றுக்கு உயிர் கொடுத்தவரும் அவரே. கம்சன், இரணியன், ராவணன் (சோபன்பாபு நடித்த ராமாயணம்) கடோத்கஜன், யமன், கீசகன், நரகாசுரன், துரியோதன், அரிச்சந்திரன், அக்பர் (அனார்கலி படம்), மகேந்திர வர்ம பல்லவர் (பார்த்திபன் கனவு) இப்படி ஏராளமான  கதாபாத்திரங்கள் இப்படித்தான் இருந்திருப்பார்கள் என நினைக்க வைத்தவர். பிளாக் மேஜிக் மந்திரவாதிகளுக்கான பிம்பத்தை காண்பித்தவரும் ரங்கா ராவ் தான்.



இன்றளவும் சினிமா ரசிகர்கள் முணுமுணுக்கும் "கல்யாண சமையல் சாதம், காய்கறிகளும் பிரமாதம், அந்த கவுரவர் பிரசாதம், இதுவே எனக்கு போதும்... " என்ற பாடலில் பீமனின் ராட்சத புதல்வன் கடோத்கஜனாக தோன்றி கல்யாண விருந்தை ஒற்றை ஆளாக சாப்பிட்டு அதகளம் பண்ணும் ரங்காராவின் நடிப்பு மறக்க முடியாதது. அந்த படத்தில் தர்மர், அர்சுனன், சகுனி, துரியோதனன், அபிமன்யு வேடங்களில் என்டிஆர், நாகேஸ்வர ராவ், நம்பியார், ஜெமினி, சாவித்திரி, தங்கவேலு என பெரிய பெரிய நட்சத்திர பட்டாளங்களே நடித்திருந்தாலும் மாயாபஜார் என்றால் ரங்காராவ் தான்.


எந்தவொரு வேடத்தையும் அநாயாசமாக தூக்கிப்போட்டு செல்லும் ரங்காராவின் கம்பீரமான வசன உச்சரிப்பிலேயே ஒரு மரியாதை ரசிகர்களுக்குள் தோன்றுவதை தவிர்க்க முடியாது. ஒரே விதமான வேடமாகவே இருந்தாலும் படத்துக்கு படம் வித்தியாசம் காட்டுவதில் வல்லவர் அவர். தேவதாஸ் படத்தில் மகனின் காதலை பிரிக்கும் ஜமீன்தாராகவும், பக்த பிரகலாதாவில் இரண்ய கசிபுவாகவும் எம்ஜிஆரின் நம்நாடு படத்தில் கொடூரமான அரசியல்வாதியாகவும், சிவாஜியின் ராஜா படத்தில் போதையில் நாயகியின் ஆடையை அவிழ்க்கும் காம வெறியனாகவும் வில்லன் நடிப்பிலும் வெரைட்டி காட்டியவர், ரங்காராவ்.


கண்கண்ட தெய்வம், அன்பு சகோதரர்கள் படங்களில் அண்ணன் தம்பி பாசத்துக்கு உதாரணமாக வாழ்ந்தவர். அடிப்படையில் தெலுங்கு நடிகர் என்பதால் அவரது வேட்டி கட்டும் பாங்கும் அப்படியே இருக்கும். அதையே சினிமாவில் தந்தைக்கான அடையாளமாக மாற்றியவர், எஸ்.வி.ரங்காராவ்.



நடிப்பு சலிக்கும்போது ஓய்வெடுக்க செல்லும் நடிகர்களுக்கு இவரே முன்னோடி. ஆந்திராவில் தனது வீட்டின் அடியில் பாதாள அறை ஒன்றை கட்டியிருந்த அவர், அதில் ஆறு மாதம் வரையிலும் கூட ஓய்வெடுத்தது உண்டாம். 



அண்ணன், தம்பி பாசம் என்றதும் அனைவருக்கும் நினைவுக்கு வரும் "முத்துக்கு முத்தாக, சொத்துக்கு சொத்தாக, அண்ணன் தம்பி பிறந்து வந்தோம் கண்ணுக்கு கண்ணாக..." பாடல் இடம் பெற்ற அன்பு சகோதரர்கள் (1974) தான் தமிழில் அவரது கடைசி படம். 

கல்லூரி முடித்த காலங்களில், காக்கிநாடா நாடக குழுவில் சேர்ந்து சீஸர், ஷைலாக் வேடங்களில் எல்லாம் நடித்து விட்டு கடைசி வரை ஷேக்ஸ்பியராக  நடிக்காமல் போனது அவரது நிறைவேறாத ஆசை. 20 வயதிலேயே நாடகங்களில் 60 வயது முதியவர் வேடங்களில் நடித்திருக்கிறார்.



கால் நூற்றாண்டு கால தனது சினிமா வாழ்க்கையில் தந்தை, ஜமீன்தார், மிகப் பெரிய மனிதர் என நடித்த ரங்காராவ், அந்த வேடங்களில் மட்டும் தான் முதுமையில் வாழ்ந்திருக்கிறார். நிஜ வாழ்வில் முதுமையை அடையும் முன் 55 வயதிலேயே இறந்து விட்டார்.

(பவளங்கள் ஜொலிக்கும்...)

#நெல்லை_ரவீந்திரன்

Thursday, 6 August 2020

அறிந்த பொக்கிஷம்... அறியாத பவளங்கள்... 9

கமலின் குணா படத்தில் ஒரு பாடல். "உன்னை நான் அறிவேன், என்னையன்றி யாரறிவார்... கண்ணில் நீர் வழிந்தால்... யாரிவர்கள் மாயும் மானிடர்கள்...", 30 விநாடிகளில் இழைந்து குழைந்து ஒலிக்கும் இந்த குரல் வழியே, குணாவில் தொடங்கி பின்னோக்கி பயணம் செய்தால் கிட்டத்தட்ட அரை நூற்றாண்டுக்கு முந்தைய சினிமாவை நோக்கி அழைத்துச் செல்கிறது. எல்ஆர் ஈஸ்வரி போலவே ஆளுமையான அந்த குரல் வளத்துக்குச் சொந்தக்காரர், எஸ்.வரலட்சுமி. பாடகி மற்றும் நடிகை. குணாவிலும் கமலின் தாயாக அவர்தான் நடித்து பாடியிருப்பார்.



ஆந்திராவை பூர்வீகமாக கொண்ட எஸ்.வரலட்சுமி, 10 வயதில் குழந்தை நட்சத்திரமாக அறிமுகமான படம் பால யோகினி. 1938ல் வெளியான அந்த படத்தில் துறவி வேடத்தில் நடித்திருப்பார். அதன் பிறகு பல படங்களில் குழந்தை நட்சத்திரமாக நடித்த எஸ்.வரலட்சுமிக்கு, 1947ல் வெளியான எம்ஜிஆரின் மனைவி வி.என்.ஜானகி ஹீரோயினாக நடித்த "ஆயிரம் தலை வாங்கிய அபூர்வ சிந்தாமணி" படத்தில் 

முக்கிய கதாபாத்திரம் கிடைத்தது. அதன்பிறகு சுமார் 55 ஆண்டு காலம் தமிழ், தெலுங்கு திரையில் இடைவிடாத நடிப்பு, பாடல் பயணம்.


ஜி.ராமநாதன் தொடங்கி எஸ்வி வெங்கட்ராமன், டிஆர் பாப்பா, எம்எஸ்வி, கேவி மகாதேவன், குன்னக்குடி வைத்தியநாதன், இளையராஜா வரையிலான இசையமைப்பாளர்களிடம் பாடி இருக்கிறார்,  எஸ்.வரலட்சுமி. அதிக அளவில் தெலுங்கு படங்களில் பாடி, என்டிஆர் போன்ற முன்னணி நடிகர்களின் ஹீரோயினாக நடித்திருந்தாலும் தமிழ் சினிமாவிலும் அவரது பங்களிப்பை ஒதுக்கி விட முடியாது.



ராஜராஜ சோழன் படத்தில் சிவாஜியின் மூத்த சகோதரி குந்தவி பிராட்டியாக நடித்து அவர் பாடிய பாடல்கள் "ஏடு தந்தானடி தில்லையிலே, அதை பாட வந்தேன் அவன் எல்லையிலே", "தஞ்சை பெரிய கோயில் பல்லாண்டு வாழ்கவே". இதுபோல சிவாஜி, சிவகுமார், ஜெயலலிதா நடித்த கந்தன் கருணை படத்தில் இந்திராணியாக நடித்து "வெள்ளிமலை மன்னவா, வேதம் நீ அல்லவா..." பாடல். இவை எல்லாம் இன்றும் மனதை கொள்ளை கொள்ளும் ரகங்கள். 


வீரபாண்டிய கட்டபொம்மன் படத்தில் சிவாஜியின் ஜோடியாக ஜக்கம்மா ராணி வேடத்திலும் வரலட்சுமி நடித்திருக்கிறார். "சிங்கார கண்ணே உன் தேனூறும் சொல்லாலே..." பாடல் இன்றும் முணுமுணுக்க வைக்கும். சிவாஜியுடன் ஜோடியாக நடித்தாலும் டூயட் அவருடன் பாடாத நாயகி எஸ்.வரலட்சுமி தான்.



எம்ஜிஆருடன் மாட்டுக்கார வேலன் படத்தில் மாமியாராகவும் (ஜெயலலிதாவுக்கு தாயார் வேடம்) நீதிக்கு தலைவணங்கு படத்தில் எம்ஜிஆரின் தாயாராகவும் நடித்த எஸ்.வரலட்சுமியின் "இந்த பச்சைக் கிளிக்கொரு செவ்வந்திப் பூவில் தொட்டிலை கட்டி வைத்தேன்..." தாலாட்டுப் பாடல் ஹிட் ரக வரிசையில் ஒன்று. ரஜினியின் அடுத்த வாரிசு (1983) படத்தில் ஜமீன்தாரி ராணியம்மா ராஜலட்சுமியாக நடித்தவரும் இவரே.


அரை நூற்றாண்டுக்கு மேல் இடைவிடாமல், அமைதியாக சினிமாவில் பயணித்த இவர், எம்.எஸ்.சுப்புலட்சுமி, எம்ஜிஆர், விஎன் ஜானகி, ஜெயலலிதா, என்டிஆர், சிவாஜி, நாகேஸ்வர ராவ், ரஜினி, கமல் என திரையுலக ஜாம்பவான்களுடன் நடித்திருக்கிறார். மறக்க முடியா பாடல்களை பாடிய எஸ். வரலட்சுமியின் நடிப்பும் மறக்க முடியாததே. அதற்கு ஒரு உதாரணம் கே.பாலச்சந்தரின் பூவா தலையா படம்.



ஜெமினி, ஜெய்சங்கர் இருவரும் அண்ணன், தம்பியாக நடித்த அந்த படத்தில் மாமியாராக எஸ்.வரலட்சுமியின் வில்லத்தன நடிப்பு அபாரம். அவரது மேனரிசம், வசன உச்சரிப்பு, உடல் மொழிகளை எல்லாம் உற்ற கவனித்து பார்த்தால் ஒன்று புரியும். பூவா தலையா படத்தின் பாதிப்புதான், "கந்தா கடம்பா கதிர்வேலா" மற்றும் ரஜினியின் "மாப்பிள்ளை" படங்கள் என்பது. 

தமிழ், தெலுங்கு சினிமா உலகில் 55 ஆண்டுகளாக குழந்தை நட்சத்திரம், நடிகை, பாடகி என இடைவிடாமல் பயணம் செய்த எஸ்.வரலட்சுமி, கவிஞர் கண்ணதாசனின் அண்ணி. கண்ணதாசனின் அண்ணனும் தயாரிப்பாளருமான ஏஎல் சீனிவாசனின் இரண்டாவது மனைவி தான் எஸ்.வரலட்சுமி.

(பவளங்கள் ஜொலிக்கும்...)

#நெல்லை_ரவீந்திரன்

Tuesday, 4 August 2020

அறிந்த பொக்கிஷம்... அறியாத பவளங்கள்...8

தமிழ் சினிமாவில் ரத்த உறவுகள் அடுத்தடுத்து நுழைவது, காலம் காலமாக தொடரும் வழக்கம். அதில் முன்னோடியாக திருவிதாங்கூர் சகோதரிகளை சொல்லலாம். இன்றைய கேரளா, அன்றைய திருவிதாங்கூர் சமஸ்தானத்தை சேர்ந்த அந்த அக்காள், தங்கைகள் பரத நாட்டியத்தில் மிகச் சிறந்தவர்கள். தமிழ் சினிமாவின் ஆரம்ப நாட்களில் நடனம் என்றால் இவர்கள்  தான். அதுவும் அரசர்கள் கதைகளாக படங்களாகவே பெரும்பாலும் எடுக்கப் பட்டதால் தவிர்க்க முடியாதவர்களாகவே இருந்தார்கள்.



இந்த மூன்று சகோதரிகளில் ஒருவரை தமிழ் சினிமா ரசிகர்கள் அனைவருக்குமே தெரியும். அவர்தான் நாட்டிய பேரொளி பத்மினி. மற்ற இருவர், பத்மினியின் அக்காள் லலிதா, தங்கை ராகிணி. சினிமாவில் இவர்களின் குரு அன்றைய நடன இயக்குநர் வழுவூர் ராமையா பிள்ளை.


மூத்தவரான லலிதா, 1947ல் இருந்து சுமார் இருபது ஆண்டுகள் தமிழ் சினிமாவில் நடனம், நடிப்பு என நீடித்திருக்கிறார். டிஎஸ் பாலையாவும் எம்ஜிஆரும் நடித்த மோகினி, மதுரை வீரன், மந்திரி குமாரி, எவிஎம்மின் வேதாள உலகம், எம்ஜிஆரும் அவரது மனைவி ஜானகியும் இணைந்து நடித்த மருதநாட்டு இளவரசி, பாக்தாத்  திருடன் என லலிதாவின் படங்கள் தமிழில் ஏராளம். தமிழ், தெலுங்கு, மலையாளம், இந்தி மொழிகளிலும் இவரது பங்கு உண்டு. 


இதுபோல ராகிணியின் பங்களிப்பும் 1975 வரை தமிழ் சினிமாவில் இருந்தது. இவர் பெங்காளி, சிங்கள மொழி சினிமாக்களிலும் நடனமாடி இருக்கிறார், நடித்திருக்கிறார்.  ராகிணியின் படங்களில் சிவாஜி கணேசனின் உத்தம புத்திரன், வீரபாண்டிய கட்ட பொம்மன், எம்ஜிஆரின் படங்களான மதுரை வீரன், மன்னாதி மன்னன், சக்கரவர்த்தி திருமகள், ராணி சம்யுக்தா, பரிசு, ஜெயலலிதா நடித்த ராமன் தேடிய சீதை போன்ற படங்கள் பிரபலமானவை. 


நடனத்துக்காக மட்டுமே நடன காட்சிகளில் மட்டுமே பத்மினி சகோதரிகள் தோன்றினாலும் பல படங்களில் கதாபாத்திரங்களிலும் பத்மினியின் சகோதரிகள் நடித்திருக்கிறார்கள்.



சிவாஜி நடித்த, டிஎம் சவுந்தரராஜனுக்கு புகழை பெற்றுத் தந்த தூக்கு தூக்கி படத்தில் மூன்று சகோதரிகளுமே முக்கிய வேடங்களில் நடித்திருக்கின்றனர். இதுபோல மதுரை வீரன், மந்திரி குமாரி, வனசுந்தரி படங்களிலும் லலிதா, பத்மினி, ராகிணி சகோதரிகளின் பங்கு உண்டு. 


பிரபல நடிகையாகி விட்ட பத்மினியை ரசிகர்கள் அறிந்த அளவுக்கு அவரது இரண்டு சகோதரிகளை அறிந்திருக்க மாட்டார்கள். ஆனால் நடனம் நடிப்பு லலிதா, ராகிணியின் பங்கு தமிழ் சினிமாவில் அதிகம். 

லலிதா, பத்மினி, ராகிணி என்ற திருவிதாங்கூர் நடன சகோதரிகளின் உறவினர்கள் தான் 1990 களில் முன்னணி நடிகையான 'இது நம்ம ஆளு' ஷோபனா, "காதல்தேசம், ஆவாரம் பூ, சந்திரமுகி"வினீத் மற்றும் 'பூவே உனக்காக' உள்பட பல படங்களில் அம்மா வேடங்களில் நடித்த சுகுமாரி என்பது கூடுதல் தகவல்

(பவளங்கள் ஜொலிக்கும்...)

#நெல்லை_ரவீந்திரன்

Sunday, 2 August 2020

அறிந்த பொக்கிஷம்... அறியாத பவளங்கள்... 7

"இசைத் தமிழ் நீ செய்த அரும் சாதனை.. நீ இருக்கையிலே எனக்கு பெரும் சோதனை... வேருக்கு நீர் ஊற்றி உரமிட்ட தலைவா... உன் ஊருக்கு பழி நேர்ந்தால் உனக்கன்றி எனக்கில்லை..." திருவிளையாடல் படத்தில் இப்படி பாடியதும் சிவ பெருமானே விறகு வெட்டியாக வந்து மதுரையின் மானத்தை காப்பாற்றுவாரே. சிவனையே அழைத்த பாட பத்திரர் தான், டிஆர் மகாலிங்கம்.


கிட்டத்தட்ட கால் நூற்றாண்டு கால சினிமா, நாடகம், இசை வாழ்க்கைக்கு சொந்தக்காரரான அவர், எம்கே தியாகராஜ பாகவதர், கிட்டப்பா, பியு சின்னப்பா காலத்து ஆள். தமிழ் சினிமாவின் ஆரம்ப காலத்தில் நன்றாக பாடவும் தெரிந்திருந்தால் மட்டுமே ஹீரோவாக முடியும் என்ற நிலைமை நீடித்திருந்த 1940களில் திரைத் துறைக்கு வந்தவர். 


சினிமாவில் பின்னணி குரல் கொடுத்து பிரபலமானவர் திருச்சி லோகநாதன் என்றால் திரையில் தோன்றி பாடல்களால் மனதை கவர்ந்து ஹீரோவாக பத்தாண்டுகளுக்கு மேல் புகழ் நாட்டியவர் டிஆர் மகாலிங்கம். தியாகராஜ பாகவதருக்கு இணையாக கர்நாடக இசை அறிந்த இவர், கமல், ஜெமினி வரிசையில் முந்தைய தலைமுறையின் ஆண் அழகன். 


எஸ்வி சுப்பையா தொடங்கி எம்எஸ் விஸ்வநாதன் வரை பாடல்களை பாடிய டிஆர் மகாலிங்கம் ஹீரோவாக அறிமுகமான படம், 1940ல் வெளியான பூலோக ரம்பை.  இவருக்கு புகழ் வெளிச்சம் பாய்ச்சியது ஸ்ரீவள்ளி (1945) படம். அதில் நாயகன் முருக கடவுளாக நடித்தவர், டிஆர் மகாலிங்கம். மாலையிட்ட மங்கை, நாம் இருவர், வேதாள உலகம், பவளக்கொடி, ஞான சவுந்தரி, ஆடவந்த தெய்வம் என அக்கால ஹிட் படங்களின் நாயகன். 



டிஆர் மகாலிங்கம் பாடிய "செந்தமிழ் தேன் மொழியாள் நிலாவென சிரிக்கும் மலர்க் கொடியாள்..", "ஆடை கட்டி வந்த நிலவோ..." பாடல்கள் எல்லாம் என்றும் தித்திக்கும் ரகம்.

சினிமாவும் வேண்டாம் ஒன்றும் வேண்டாம் என சொந்த ஊருக்கே திரும்பிச் சென்று நான்காண்டுகள் நாடகங்களை நடத்தி வந்த டிஆர் மகாலிங்கத்தை கண்ணதாசன் திரும்ப அழைத்து வந்து நடிக்க வைத்தபோது அப்போதும் நாயகனாக ஹிட் கொடுத்தவர் டிஆர் மகாலிங்கம்.


பாடகர், நடிகர் என இருந்தவர் தயாரிப்பாளர் அவதாரம் எடுத்ததால் நஷ்டமடைந்து சினிமாவை விலக்கி வைக்க நேரிட்டது. குடும்பப் பின்னணி கதைகளுடன் எம்ஜிஆர், சிவாஜி படங்கள் 1960களில் வரவேற்பை பெறத் துவங்கியதும் நாயகனில் இருந்து குணச்சித்திர வேடங்களுக்கு மாறினார். பாடவும் நடிக்கவும் வாய்ப்பு உள்ள படங்களை ஒப்புக் கொண்டார். அதில் ஒன்று தான் திருவிளையாடல்.



இதுபோல அகத்தியர் (1972)படத்தில் சீர்காழி கோவிந்த ராஜனுடன் இணைந்து நாரதர் வேடத்தில் நடித்திருப்பார். இருவரும் இணைந்து பாடும் இசையாய் செந்தமிழாய் இருப்பவனே... பாடலும் மலை நின்ற திருக்குமரா, மால் மருகா பாடலும் இன்றளவும் முணுமுணுக்க வைக்கும் ரகம்.

திருநீலகண்டர், திருமலை தெய்வம் மற்றும் ராஜராஜ சோழன் படத்தில் கருவூர் தேவர் என நடித்த டிஆர் மகாலிங்கம், சிவாஜி கணேசனுடன் "தென்றலோடு உடன் பிறந்தாள் செந்தமிழ் பெண்ணாள்.." பாடலை பாடி இருக்கிறார். நடிகர் திலகம் பாடிய ஒரே பாடல் இதுதான். 

டி.ஆர். மகாலிங்கத்தின் பாடல்களை கவனித்தால் ஒன்று தெரியும். செந்தமிழ் தேன் மொழியாள் தொடங்கி தென்றலோடு உடன் பிறந்தாள் வரை பலவும் தமிழின் புகழ் பாடல்கள் தான். அண்ணா, கலைஞர், காமராஜருடன் நெருங்கிய நட்பு கொண்டிருந்த  இவர், கவலை இல்லா மனிதன் படத்தில் பாடிய பாடல் "திராவிட பொன் நாடே, எங்கள் திராவிட பொன் நாடே..."



உச்சஸ்தாயில் பாடும் திறமை கொண்ட மகாலிங்கம், படங்களில் நடித்த போதிலும் மேடை நாடகங்கள் போடுவதிலும் பிசியாகவே இருந்தார். 53வது வயதில் இறக்கும்போது கூட அவரது கைவசம் 70க்கும் மேற்பட்ட நாடக ஒப்பந்தங்கள் இருந்ததென்றால் பார்த்துக் கொள்ளுங்கள்.

(பவளங்கள் ஜொலிக்கும்...)

#நெல்லை_ரவீந்திரன்

Friday, 31 July 2020

அறிந்த பொக்கிஷம்... அறியாத பவளங்கள்...6

இருபது ஆண்டுகளுக்கு முன்பு வரை, திருமண மகால்கள் காலம் துவங்கும் முன்பு, மணமாகி புகுந்த வீட்டுக்கு புது மணப்பெண் புறப்படும்போது ஒரு பாடல் கட்டாயமாக ஒலிக்கும். அது, "புருஷன் வீட்டில் வாழப்போற பொண்ணே, தங்கச்சி கண்ணே, சில புத்திமதிகள சொல்லுறேன் கேளே முன்னே". அந்த குரலுக்குச் சொந்தக்காரர் திருச்சி லோகநாதன்.



ஊமைப்படங்களில் இருந்து பேசும் படமாக சினிமா உலகம் மாறிய புதிதில் எட்டு கட்டையில் பாடவும், சுருதி சுத்தமாக வசனம் பேசவும் தெரிந்தவர்கள் மட்டுமே நடிக்க முடியும். இரவல் குரலுக்கு நிச்சயமாக சினிமாவில் இடம் கிடையாது. அதில் இருந்து டப்பிங் நுட்பத்துக்கு சினிமா மாறியபோது முதலில் ஒலித்த குரல் இவருடையது. 

1947ல் வெளியான ராஜகுமாரி படத்தில் எம்.என்.நம்பியாருக்கு குரல் கொடுத்திருந்தார், திருச்சி லோகநாதன். அதுதான் தமிழ் சினிமாவின் முதல் பின்னணி குரல். அதன்பிறகு, 1965 வரையிலும் சுமார் 20 ஆண்டுகளில் அன்றைய முன்னணி இசையமைப்பாளர் பலரின் பாடல்களுக்கு பாடி இருக்கிறார்.

தமிழ், தெலுங்கில் பாடல்களை பாடியிருக்கும்  திருச்சி லோகநாதனின் ஒவ்வொரு பாடலும் தனி ரகம். மந்திரி குமாரி (1950) படத்தில் வில்லன் நடராஜனுக்காக இவர் பாடிய "வாராய் நீ வாராய் புலி என்னை தொடர்ந்தே புள்ளி மான் நீயே வாராய்", "உலவும் தென்றல் காற்றினிலே" பாடல்கள் கிளாசிக்கல். 

டவுண் பஸ் படத்தில் "பொன்னான வாழ்வே மண்ணாகிப் போமா துயரம் இதுதானா...", தை பிறந்தார் வழி பிறக்கும் படத்தில் "ஆசையே அலைபோலே நாமெல்லாம் அதன்மேலே..." வண்ணக்கிளி படத்தில் "அடிக்கிற கைதான் அணைக்கும், அணைக்கிற கைதான் அடிக்கும்..இனிக்கிற வாழ்வே கசக்கும், கசக்கிற வாழ்வே இனிக்கும்..." பாடல்கள் எல்லாம் சோக ரகங்கள் என்றால்

ஆரவல்லி படத்தின் "சின்னக் குட்டி நாத்தனா, சில்லறைய மாத்தினா..." "ஏபிசிடி படிக்கிறேன், ஈஎப்ஜிஎச் எழுதுறேன்...", இரும்புத்திரை படத்தின் "கையில வாங்கினேன் பையில போடல, காசு போன இடம் தெரியல, என் காசு போன இடம் தெரியல..." என இவரது ஜாலி பாடல்கள் தனி ரகம்.

எவர்கிரீன் பாடலான "கல்யாண சமையல் சாதம், காய்கனிகளும் பிரமாதம், அந்த கவுரவர் பிரசாதம், இதுவே எனக்கு போதும்..." என அசாத்திய சிரிப்புடன் கடோத்கஜன் அரக்கன் போலவே பாடும் பாடல் இன்றைய தலைமுறையை கூட நின்று கேட்க வைக்கும்.

சிவாஜி கணேசன் நடித்த கப்பலோட்டிய தமிழன் படத்தில், "வெள்ளிப் பனி மலை மீதுலவுவோம், அடி மேலை கடல் முழுதும் கப்பல் விடுவோம்..." கர்ணன் படத்தில் "நாணி சிவந்தன மாதரார் கண்கள்..." என அவரது குரல் ஒவ்வொரு பாடலிலும் வெவ்வேறு விதமாக ஜாலம் காட்டும். 

1950களில் பிரபல பின்னணி பாடகராக இருந்த திருச்சி லோகநாதன் ஒரு பாடலுக்கு 500 ரூபாய் வரை சம்பளம் வாங்கியிருக்கிறார். இந்தியா சுதந்திரம் பெற்ற சமயத்தில் தங்கம் விலை சவரனுக்கு 15 ரூபாய் என்றால் கணக்கு போட்டு பார்த்துக் கொள்ளுங்கள். அதே நேரத்தில் சம்பள விஷயத்திலும் அவர் கறார் ரகம். 

1954ல் வெளியான சிவாஜியின் தூக்கு தூக்கி படத்தில் எட்டு பாடல்களுக்கு நான்காயிரம் கேட்டபோது தயாரிப்பாளர்கள் பேரம் பேசியதால், "மதுரையில் இருந்து ஒருத்தர் பாட வந்திருக்கிறார் அவரை பாடச் சொல்லுங்கள்" என கூறி விட்டு போய் விட்டாராம். அந்த மதுரைக்காரர் தான் டிஎம் சவுந்தரராஜன். 

எதை மனதில் வைத்து திருச்சி லோகநாதன் சொன்னாேரோ தெரியவில்லை. மந்திரி குமாரி (1950) படத்திலேயே "அன்னம் இட்ட வீட்டிலே கன்னக்கோல் வைத்தே" என்ற பாடலை பாடிய போதிலும் அதிக அளவில் வாய்ப்பு இல்லாமல் இருந்த டிஎம்எஸ்சுக்கு தூக்கு தூக்கி ஒரே படத்தில் எட்டு பாடல்கள் கிடைத்தது. அந்த படம் அவரை தூக்கி விட்டதால், அதன் பிறகு டிஎம்எஸ்சுக்கு ஏறுமுகம் தான்.

அதே நேரத்தில், 1960களுக்கு பின் முழுக்க முழுக்க பின்னணி பாடல்களே கோலோச்ச துவங்கியதோடு நடிகர்களின் குரலுடன் பாடலின் குரலையும் ஒப்பிட்டுப் பார்க்கும் மனநிலை கொண்ட ரசிகர்களும் அதிகரித்தனர். தனித்துவமாக ஒலிக்கும் திருச்சி லோகநாதனின் குரல் நடிகர்களின் குரலுக்கு ஒத்துப்போகாத நிலையில் 1965ல் அவரது இசை பயணம் முடிவுக்கு வந்தது.

தமிழின் முதல் நகைச்சுவை ஜோடியான காளி என்.ரத்னம் - சி.டி. ராஜகாந்தம் தம்பதியின் மருமகன்தான் திருச்சி லோகநாதன். இவரது வாரிசுகளும் பின்னணி பாடகர்கள் தான். 

நிழல்கள் படத்தின் "பூங்கதவே தாழ் திறவாய், பூவாய் பெண் பாவாய்...", மெல்லப் பேசுங்கள் (1983) படத்தின் "செவ்வந்தி பூக்களில் செய்த வீடு, வெண்பஞ்சு மேகமே கோலம் போடு...", கோழி கூவுது "அண்ணே அண்ணே சிப்பாய் அண்ணே..." என 1980களில் பின்னணி பாடிய தீபன் சக்கரவர்த்தி, 

கமல் நடித்த நாயகன் படத்தில் "அந்தி மழை மேகம்" முதலாளியம்மா படத்தில் "ஆத்தோரம் ஆலமரம்" உள்ளிட்ட பாடல்களை பாடிய டிஎல் மகாராஜன் இருவரும் திருச்சி லோகநாதனின் இசை வாரிசுகளே...

(பவளங்கள் ஜொலிக்கும்...)

#நெல்லை_ரவீந்திரன்

Wednesday, 29 July 2020

அறிந்த பொக்கிஷம்... அறியாத பவளங்கள்...5

மாயி படத்தில் கோக்கு மாக்கு பண்ணி கோவை சரளாவுக்கும் வடிவேலுவுக்கும் கல்யாணம் பண்ணி வைக்கும் அந்த தாத்தாவை எளிதில் மறக்க முடியாது. உனக்காக எல்லாம் உனக்காக படத்தில் கார்த்திக் தாத்தாவாக கவுண்டமணியுடன் சேர்ந்து அடிக்கும் லூட்டியும் சாதாரண ரகம் கிடையாது. அந்த தாத்தா காக்கா ராதாகிருஷ்ணன்.



அவரது திரையுலக பிரவேசம் 70 ஆண்டுகளுக்கு முந்தையது. ஆறேழு வயதிலேயே நாடகம் நடிக்கத் தொடங்கி, நவாப் ராஜமாணிக்கம் நாடகக் குழு, என்எஸ் கிருஷ்ணன் நாடகக் குழு போன்றவற்றில் நடித்துக் கொண்டிருந்தார். ராதாகிருஷ்ணனின்முதல் திரைப்படம் 1949ல் வெளியான மங்கையர்க்கரசி. டேய் வேலை வேணும்னா காக்கா பிடிக்க தெரியணும்டான்னு அம்மா சொன்னதற்காக அப்பாவியாய் ஒரு காக்காவை மரத்தில் ஏறி பிடித்துக் கொண்டு வேலை கேட்க செல்லும் வேடம். அதில் இருந்து ராதாகிருஷ்ணன் என்ற பெயருக்கு முன்னால் "காக்கா" ஒட்டிக் கொண்டது.


மங்கையர்க்கரசிக்கு பிறகு, அண்ணா வசனத்தில் நல்ல தம்பி, தாய் மகளுக்கு கட்டிய தாலி, கருணாநிதி வசனத்தில் மனோகரா, எம்ஜிஆருடன் தாய்க்குப்பின் தாரம் என ஏராளமான படங்களில் நடித்திருக்கிறார், காக்கா ராதாகிருஷ்ணன். நடிகர் திலகம் சிவாஜிகணேசன், இவரது நெருங்கிய நண்பர், சினிமாவுக்கு முன்பே. சிவாஜியை நாடகக் குழுவில் அறிமுகம் செய்து வைத்தவரே இவர்தான்.



கண்ணடிப்பது போல ஒரு பக்கம் சுருங்கி இருக்கும் கண், இவரது ஸ்பெஷாலிட்டி. தமிழ், தெலுங்கு என 500க்கும் மேல் படங்களில் நடித்திருக்கும் காக்கா ராதாகிருஷ்ணன், 1962 வரை சுமார் 15 ஆண்டுகாலம் தமிழில் நகைச்சுவை மற்றும் குணச்சித்திர வேடங்களில் கலக்கியவர்.

அண்ணா, கருணாநிதி இருவரின் வசனத்திலும் நடித்திருக்கும் இவரது படங்களில் உத்தம புத்திரன், ஆரவல்லி, வன சுந்தரி, மனோகரா, தாய்க்குப்பின் தாரம் போன்றவை பெயர் சொல்பவை. மனோகராவில் சிவாஜியின் தம்பி இவர்தான். மாலையிட்ட மங்கை (1958) படத்தில் இவரது ஜோடி மனோரமா. அதாவது ஆச்சி மனோரமாவின் முதல் திரை நாயகன் காக்கா ராதாகிருஷ்ணன்.

நடுவில் சுமார் கால் நூற்றாண்டு காலம் சினிமாவில் இருந்து ஒதுங்கியவர். நடிகர் சங்கத் தேர்தலில் எம்ஜிஆரை எதிர்த்ததால் இந்த நிலைமை என்றும் கூறுவது உண்டு. இந்த அஞ்ஞான காலத்தில் தபால்காரன் தங்கை (1970) குறிப்பிடத்தக்கது.

குணா படத்தின் மூலம் வைல்ட் கார்டு ரவுண்ட் என்ட்ரி போல 1992 முதல் மீண்டும் அவர் நடிக்கத் துவங்கினார். குணா, வசூல் ராஜா எம்பிபிஎஸ், காதலுக்கு மரியாதை, உன்னைத்தேடி என கலக்கிய காக்கா ராதாகிருஷ்ணன், தேவர் மகன் படத்தில் சிவாஜி கணேசனுக்கு தம்பியாக நடித்ததை மறக்க முடியாது. முடக்கு வாதத்தால் பாதிக்கப்பட்டு வீல் சேரில் இருந்தபடியே நாசருடன் இணைந்து மிரட்டும் வில்லத்தனம் ஆஸம்.



ஆனாலும் லூசு தாத்தாவாகவும் இன்னசண்ட் தாத்தாவாகவும் அவர் கலக்கியதுதான் செகண்ட் இன்னிங்ஸில் இக்கால ரசிகர்கள் மனதில் இருப்பவை. பிரபுதேவா, கார்த்திக், அஜித், விஜய்,  கவுண்டமணி, வடிவேலு என இந்த தலைமுறை நடிகர்களுடன் சிக்ஸரடித்த காக்கா ராதாகிருஷ்ணன் பற்றி நாகேஷ் சொன்ன வார்த்தைகள்...

"நேரம் மட்டும் சரியாக கூடி இருந்தால் இவன் எங்கள எல்லாம் மிஞ்சி எங்கோ போயிருப்பான்"

(பவளங்கள் ஜொலிக்கும்...)

#நெல்லை_ரவீந்திரன்

Tuesday, 28 July 2020

அறிந்த பொக்கிஷம்... அறியாத பவளங்கள்... 4



சினிமாவில் இப்போதெல்லாம் அவ்வளவு எளிதாக விலங்குகளை காண்பிக்க முடியாது. அதற்கு ஆயிரத்தெட்டு ஃபார்மாலிட்டிஸ். ஆனால், இவர் படம் என்றால் நிச்சயம் புலி, சிறுத்தை, யானை மாதிரியான மிருகங்கள் கண்டிப்பாக இருக்கும். அவர்தான் இன்றைய தலைமுறையினர் பலரும் அறிந்திராத தயாரிப்பாளர் சாண்டோ சின்னப்பா தேவர். ஆடு ஒன்று பிரதானமாக நடித்த ஆட்டுக்கார அலமேலு படம் வரை அவரது தயாரிப்புகள் தமிழ் சினிமாவில் ஏராளம். கட்டுமஸ்தான உடல், ஆஜானுபாகுவான தோற்றம் காரணமாக சாண்டோ (சாண்டோ என்பது ஒருவரின் பெயர், அவரைப் பற்றியது என்ன என்பது தனிக்கதை) ஒட்டிக் கொண்டது.



கொங்கு மண்டலத்தை சேர்ந்த இவர் விவசாய, பஞ்சாலை கூலி தொழிலாளியாக இருந்து நடிக்க வந்து தயாரிப்பாளராக உயர்ந்தவர். சின்ன சின்ன வேஷம் போட்டுக் கொண்டிருந்த தேவர், ராஜகுமாரி (1947) படத்தில் மெயின் வில்லன் ஆனார். அந்த படம் தான் எம்ஜிஆர் நாயகனாக நடித்த முதல் படம். எம்ஜிஆரின் முதல் வில்லன் தேவர் தான். இரண்டாவது வில்லன் நம்பியார். படம் மந்திரி குமாரி (1950).

ராஜகுமாரியில் எம்ஜிஆருடன் தேவருக்கு ஆரம்பித்த நட்பு மிக ஆழமாக மாறியது. அடுத்தடுத்த எம்ஜிஆர் படங்களில் சண்டைக் காட்சிகளில் தேவருக்கு இடம் உண்டு. சர்வாதிகாரி, குலேபகாவலி என எம்ஜிஆர் படங்களில் வில்லன் குரூப்பில் சாண்டோ எம்எம்ஏ சின்னப்பா தேவரை முரட்டு மீசையுடன் பார்க்கலாம். 

தமிழ் சண்டை காட்சிகள் நிறைந்த படம் என்ற வார்த்தைகளை 40, 50 வயதினர் மறந்திருக்க முடியாது. அதை அறிமுகம் செய்தவர் தேவர் என்றே கூறலாம். வாள் சண்டை காட்சிகள் பிரதானமாக இருந்த தமிழ் சினிமாவில் சிலம்பம், குஸ்தி டைப் சண்டை காட்சிகளை பிரபலமாக்கியவர் அவரே.



நட்பின் காரணமாக தேவரை தயாரிப்பாளராக்கினார், எம்ஜிஆர். தேவர் பிலிம்ஸ் என்ற பேனரில் சின்னப்பா தேவர் தயாரித்த முதல் படம் எம்ஜிஆர் - பானுமதி நடித்த தாய்க்குப்பின் தாரம். காளையை அடக்குவது, சிலம்பம், முறைப்பெண் என கிராமத்துக்கே உரித்தான அம்சங்கள் நிறைந்தது அந்த படம். தமிழ் சினிமாவில் தந்தை மகன் பாசத்தை கூறும் பாடல் உண்டு என்றால், அது இந்த படத்தின் பாடல் மட்டுமே.

அதன்பிறகு, அன்று பிரபலமாக இருந்த ரஞ்சன் (நீலமலை திருடன் படம்) போன்ற வேறு சில நடிகர்களை வைத்து படம் தயாரித்து தோல்வியடைந்த தேவர், பின்னர் எம்ஜிஆருடன் மீண்டும் கைகோர்த்து 10 ஆண்டுகளில் 16 படங்களை தயாரித்தார். வேட்டைக்காரன், விவசாயி, தாய்சொல்லை தட்டாதே, நீதிக்குப்பின் பாசம் என தொடங்கி நல்லநேரம் வரை நீடித்தது இந்த காம்பினேஷன். எம்ஆர் ராதா - எம்ஜிஆர் விவகாரம் வரை இந்த அணியில் கண்ணாம்பாள், எம்ஆர் ராதா இருவருக்கும் பெற்றோர் வேடம் நிச்சயம் உண்டு. பெரும்பாலும் நாயகனின் விதவை தாயாக கண்ணாம்பாள். நாயகியின் தந்தையாக எம்ஆர் ராதா இருப்பார்.

தயாரிப்பாளரானாலும் எட்டு முழ வேட்டி, வெள்ளை நிற மேல் துண்டு மட்டுமே அவரது உடை. கடைசி வரை தேவரை மொதலாளி என்றே அழைத்தவர் எம்ஜிஆர். 16 படங்களில் பலவற்றை இயக்கிய எம்.ஏ.திருமுகம் MA, சின்னப்பா தேவரின் சகோதரர். 1960களில் குறிப்பிடத்தக்க இயக்குநராக திருமுகம் இருந்தார்.

சினனப்பா தேவர், மிக தீவிரமான முருக பக்தர்.  தனிப்பிறவி  படத்தில் எம்ஜிஆருக்கு முருகன் வேஷம் போட்டு அழகு பார்த்தவர். எம்ஜிஆரையே முருகா என அழைப்பது தேவரின் வழக்கம். படங்களில் கிடைக்கும் லாபத்தில் கணிசமான தொகையை மருதமலை, பழனி என முருகனின் அறுபடை வீடுகளுக்கு ஏராளமான திருப்பணிகள் செய்து மகிழ்ந்தவர். 1960களில் சரியான பாதை மற்றும் மின்வசதி இல்லாமல் இருந்த மருதமலைக்கு அந்த வசதிகளை செய்து தந்தவர்.

தெய்வ பக்தியால் தேவர் தயாரித்த படங்கள் தெய்வம், திருவருள், துணைவன். தெய்வம் படத்தின் பாடல்கள் இன்றளவும் பக்தி பாடல்கள் வரிசையில் அனைவரையும் கவருபவை. மருதமலை மாமணியே முருகையா... நாடறியும் சுவாமி மலை... மாதிரியான பாடல்கள் சின்ன உதாரணங்கள்.



சிவாஜி கணேசனை வைத்து இவர் படம் எடுத்ததே இல்லை. சிவாஜிக்கான கதை தன்னிடம் வரவில்லை என்பது தேவர் கூறிய விளக்கம். அதே நேரத்தில் இந்தியிலும் படங்களை தயாரித்த தேவர், ராஜஷே்கன்னாவை வைத்து எடுத்த ஹாதி மேரே ஸாதி படம் சூப்பர்ஹிட். அந்த படம் தான் தமிழில் யானைகளுடன் எம்ஜிஆர் நடித்த நல்லநேரம் ஆனது. 

தேவர் பிலிம்ஸ் போலவே தண்டாயுதபாணி பிலிம்ஸ் என்ற பெயரிலும் படங்களை தயாரித்தார் சாண்டோ சின்னப்பா தேவர். ரஜினி நடித்த தாய் மீது சத்தியம் படம்தான் தேவரின் கடைசி படம். தயாரிப்பில் படம் இருந்தபோதே இறந்து விட்டார்.

ஆனால், அவரது தயாரிப்பு நிறுவனத்தின் மூலம் படங்களை தயாரித்தார், அவரது மருமகன் தியாகராஜன். ரஜினியின் ஆரம்பகால ஹிட் படங்களான ரங்கா, தாய்வீடு, அன்புக்கு நான் அடிமை, தர்மத்தின் தலைவன் போன்றவை தேவர் பிலிம்ஸ் தயாரிப்புகளே...

(பவளங்கள் ஜொலிக்கும்)

#நெல்லை_ரவீந்திரன்

Saturday, 25 July 2020

அறிந்த பொக்கிஷம்... அறியாத பவளங்கள்... 3

தமிழ் சினிமா எனும் பொக்கிஷத்தில் புதைந்து கிடக்கும் பவளங்களில் இருந்து இன்று மின்னும் பவளம், காளி என்.ரத்னம். எழுபது ஆண்டுகளுக்கு முன்பே அவர்  மறைந்தாலும் அவரை மறக்க முடியாது. நாடக உலகின் தந்தை பம்மல் சம்பந்த முதலியாரிடம் பயிற்சி பெற்றவர், காளி என்.ரத்னம். அப்போதெல்லாம் சினிமாவுக்கு முந்தைய பயிற்சி களம் நாடகம்தான். அதில் முக்கியமானவராக இருந்தார்.

எம்.ஜி.ஆர், அவரது அண்ணன் சக்ரபாணி போன்றவர்களை நாடக குழுக்களில் ஆதரித்து வளர்த்தவர். நடிகராக இருப்பவருக்கு உடல் முக்கியம் என எம்ஜிஆர் அறிவுரை கூறுவதுண்டு என்பதை பல நடிகர்கள் சொல்லக் கேட்டிருக்கலாம். அந்த அறிவுரையை எம்ஜிஆருக்கு சொல்லிக் கொடுத்தவரும் இவர்தான். ஆரம்ப காலங்களில் குஸ்தி, மல்யுத்தம் என தற்காப்பு கலைகளை எம்ஜிஆருக்கு கற்றுக் கொடுத்த வாத்தியார் காளி என்.ரத்னம். அதாவது, வாத்தியாரின் வாத்தியார்.



தலையை முழுமையாக மழித்து மொட்டை தலையுடன் தான் இருப்பார், காளி என்.ரத்னம். நடிக்கும் படங்களின் கதாபாத்திரத்துக்கு ஏற்ப விக் வைத்துக் கொள்வார் அல்லது தலைப்பாகை கட்டிக் கொள்வார். வாய் நிறைய வெற்றிலையை குதப்பிக் கொள்வதும் உண்டு.


தமிழ் திரையுலகின் முதலாவது ஆக்சன் ஹீரோ பியு சின்னப்பா நடித்த உத்தம புத்திரன் (இது சிவாஜியின் உத்தம புத்திரனுக்கு 20 ஆண்டு முந்தையது) படத்திலேயே முன்னணி நகைச்சுவை நடிகர். ஆமாம். இன்றைய நகைச்சுவை நடிகர்களுக்கு நான்கு தலைமுறை முந்தியவர் காளி என்.ரத்னம்.



இவரும் சிடி ராஜகாந்தமும் இணைந்து கலக்கிய காமெடிகள் கிளாசிக் ரகம். என்எஸ்கே-மதுரம் ஜோடி கலக்கிய காலகட்டத்தில் காளி என் ரத்னம் ஜோடியும் தமிழ் சினிமாவை கலக்கியது. என்எஸ்கிருஷ்ணன் தம்பதி போலவே, இந்த ஜோடியும் நிஜத்திலும் தம்பதியே. காளி என்.ரத்னம்-சி.டி.ராஜகாந்தம்  இவர்களின் மருமகன் தான், அககால பிரபல பின்னணி பாடகர் திருச்சி லோகநாதன்.


இன்றைக்கு 80 ஆண்டுகளுக்கு முன் 1941ல் வெளிவந்த சபாபதி படம் ஒன்று போதும். காளி என்.ரத்னம் என்ற நடிகர் எக்காலத்துக்கும் உரியவர் என்பதை சொல்ல. ஒரே விதமான செந்தமிழ் வசனங்களும், பாடல்களும் ஆக்கிரமித்திருந்த காலத்தில் சபாபதி திரைப்படம் வித்தியாசமானது. படத்தின் ஹீரோ டி.ஆர்.ராமச்சந்திரனுக்கு சம்பளம் 70 ரூபாய். ஆனால், காளி என்.ரத்னத்தின் சம்பளம் அந்த படத்தில் 3000 ரூபாய்! 


அன்றைய முன்னணி இயக்குநர்கள் எல்லீஸ் ஆர்.டங்கன், சேலம் மாடர்ன் தியேட்டர்ஸ் சுந்தரம் போன்றவர்களின் ஃபேவரைட் இவர்தான். பதிபக்தி, சந்திரகாந்தா, ஸ்ரீமுருகன், ஆயிரம் தலை வாங்கிய அபூர்வ சிந்தாமணி. இவை எல்லாம் காளி என்.ரத்னம் நடித்த ஹிட் படங்களில சில. 


1946ல் வெளியான ஸ்ரீமுருகன் படத்தில் பிரதான வேடத்தில் எம்ஜிஆர் நடித்திருந்தார். கதாநாயக அந்தஸ்தை நெருங்கி சென்று கொண்டிருந்த சமயம் அது. அந்த படத்தில் சிவன் வேடத்தில் நடித்த எம்ஜிஆரின் ருத்ரதாண்டவம், அக்கால சினிமா ரசிகர்களிடம் பெரிய வரவேற்பை பெற்றிருந்தது.

நாடக காலம் தொடங்கி சினிமா வாழ்க்கையிலும் எம்ஜிஆருக்கு  உதவியாக இருந்தவர், காளி என்.ரத்னம். ஆனால், தமிழ் சினிமாவின் முதலாவது மூத்த நகைச்சுவை நாயகனை 52 வயதிலேயே இறைவன் தன்னிடம் அழைத்துக் கொண்டது காலத்தின் கோலம்.

சரி. வாத்தியாரின் வாத்தியாரான இந்த காளி என்.ரத்னம் யார். எப்படி நடிப்பார்? சன் லைஃப் சேனலை அதிகமாக  பார்ப்பவர்களுக்கு நிச்சயமாக இந்த கேள்வி எழாது. அடுத்த முறை 'சபாபதி' ஔிபரப்பாகும் போது காளி என்.ரத்னம், டிஆர் ராமச்சந்திரன், மற்றுமொரு நகைச்சுவை நடிகர் சாரங்கபாணி மூவரும் அடிக்கும் லூட்டியை மிஸ் பண்ணாதீங்க...



(பவளங்கள் ஜொலிக்கும்)

#நெல்லை_ரவீந்திரன்