Showing posts with label அரசியல் கட்டுரை. Show all posts
Showing posts with label அரசியல் கட்டுரை. Show all posts

Sunday, 25 June 2023

அரசியல் ஆசை நடிகர்களுக்காக...

ரஜினிகாந்தின் அரசியல் பிரவேசம் பற்றி பேசும் பெரும்பாலானோரின் கருத்துகளில் தவறாமல் இடம் பெறும் பெயர் எம்.ஜி.ஆர்.  ரஜினியை ஆதரிப்பவர்களும் சரி. எதிர்ப்பவர்களும் சரி. எம்.ஜி.ஆரை உதாரணம் காட்ட தவறுவதே கிடையாது. ஆனால், 30 ஆண்டுகளுக்கு மேலாக திரையுலகில் யாராலும் அசைக்க முடியாத உச்ச நடிகராக நீடித்ததை தவிர, எம்.ஜி.ஆருக்கும் ரஜினிக்கும் என்ன ஒற்றுமை இருக்கிறது என்பதை யோசிப்பதில்லை. அதுவே, அரசியலுக்கு தகுதி என்ற ரீதியில் பேசுகின்றனர். 



1950ம் ஆண்டில் கருணாநிதியின் கதை, வசனத்தில் வெளியான மந்திரி குமாரி படத்தில் நடித்தபோதே திராவிட இயக்கத்துடன் நெருக்கம் காட்ட ஆரம்பித்து விட்டார், எம்.ஜி.ஆர்.  தென்குமரி தொடங்கி இமயமலை வரையிலும் காங்கிரஸ் கட்சியின் ஆதிக்கம் கொடி கட்டி பறந்த காலத்திலேயே, அதற்கு நேர் மாறான நிலைப்பாட்டை எடுப்பதில் எந்த அளவுக்கு உறுதி வேண்டும். அதுவும் திரை உலகில் ஆரம்பகட்ட நடிகராக இருந்த ஒருவருக்கு... இந்த உறுதி ரஜினியிடம் இருக்கிறதா...? 

1951 முதல் 1967 வரை 17 ஆண்டு காலம், தமிழகத்திலும் மத்தியிலும் காங்கிரஸ் ஆட்சி இருந்த நேரத்தில், அப்போதுதான் புதிதாக தொடங்கப்பட்ட தி.மு.க.வில் உறுப்பினராக சேர்ந்ததோடு, நடிக்கும் நேரம் தவிர மற்ற சமயங்களில் தி.மு.க மேடைகளில் பிரச்சாரம் செய்வதற்காக ஊர் ஊராக சென்றவர், எம்.ஜி.ஆர். அதுபோன்று ஆளும் தலைமையை  தொடர்ந்து எதிர்க்கும் துணிச்சல் ரஜினியிடம் துளி கூட கிடையாது. 

எம்.ஜி.ஆரின் பாடல்களில் கூட நேரடியாகவே கொள்கை பிரச்சார நெடியை பார்க்கலாம்.  அதன் தாக்கம் தாங்க முடியாமல் அப்போதைய காங்கிரஸ் அரசு கொடுத்த நெருக்கடி அதிகம். பெற்றால்தான் பிள்ளையா படத்தின் பாடலில், 'மேடையில் முழங்கு... அறிஞர் அண்ணா போல்...'  என்ற பாடல் மேடையில் முழங்கு திரு.வி.க. போல் என மாற்றப்பட்டதே அதற்கு சாட்சி. இப்போதும் இரண்டு விதமான வரிகளில் அந்த பாடல்களை கேட்கலாம்.

முழுக்க முழுக்க காங்கிரஸ்காரரான ஏ.வி.எம். தயாரித்த அன்பே வா படத்திலேயே, 'உதய சூரியனின் பார்வையிலே... உலகம் விழித்துக் கொண்ட வேளையிலே...' என்ற வரிகளை வைத்தவர், எம்.ஜி.ஆர். அந்த வரிகள் கூட, 'புதிய சூரியனின் பார்வையிலே' என மாறியது. அவ்வளவு சென்சார் கெடுபிடி. ஆனாலும் கூட,  'ஓடும் ரயிலை வழி மறித்து, அதன் பாதை தனிலே தலை வைத்து...' என்ற எங்கள் தங்கம் பாடல் தொடங்கி, 'கூந்தல் கருப்பு... குங்குமம் சிவப்பு...' என காதல் பாடல் வரை தான் சார்ந்த திமுகவை எதிர்க் கட்சியாக இருந்தபோதும் நினைவூட்டிக் கொண்டே இருந்தவர், எம்.ஜி.ஆர். 



இது மட்டுமல்ல, நல்லவன் வாழ்வான் போன்ற கருப்பு வெள்ளை படங்களில் வரும் வீடுகளின் ஜன்னல், கதவுகளில் உதய சூரியன் போன்ற வடிவமைப்பு இருப்பதை பார்க்கலாம். ஈஸ்ட்மெண்ட் கால படங்களில் எம்.ஜி.ஆரின் காஸ்ட்யூமே கருப்பு, சிவப்பு வண்ணத்தில் தான் இருக்கும். இவை எல்லாம், காங்கிரஸ் ஆட்சியில் இருந்த 17 ஆண்டு காலத்தில் எம்.ஜி.ஆர். செய்த அட்ராசிட்டிகள். இதில் துளி அளவு துணிச்சலாவது ரஜினியிடம் இருந்ததா...? 

எம்.ஜி.ஆர்., கருணாநிதி, ஜெயலலிதா ஆகியோர் ஆட்சி செய்தபோது சிறிதளவு முணுமுணுப்பை கூட காட்டாத ரஜினி, இப்போது சிங்கம், புலி இல்லாத சமயத்தில் 'சிஸ்டம் சரியில்லை' என கூறிக் கொண்டு இருக்கிறார். இவ்வளவு தான் அவரது துணிச்சல். எம்.ஜி.ஆர். ஆட்சி செய்தபோதே, தி.மு.க தலைவர் கருணாநிதியின் கதை வசனத்தில் நடித்ததோடு, தி.மு.க. கரை வேட்டியையும்  கட்டியபடி படத்தில் நடித்து, மறைமுகமாக தி.மு.க. ஆதரவு நடிகர் போலவே வலம் வந்த விஜயகாந்திடம் இருந்த தைரியம் கூட ரஜினிக்கு கிடையாது. 

இது தவிர, அரசியல் அனுபவம் என்று பார்த்தால் கூட, எம்.ஜி.ஆருடன் ஏணி வைத்தால் கூட எட்டாது. எம்.ஜி.ஆர். தனது 45ஆவது வயதிலேயே (1962ம் ஆண்டு) எம்.எல்.சி.யாகி விட்டார். அதன்பிறகு, 1967 முதல் அவரது இறுதிநாள் வரை தமிழக சட்டப்பேரவைக்கு தொடர்ந்து எம்எல்ஏவாக தேர்ந்தெடுக்கப்பட்டு வந்தார். 1969ல் அண்ணா மறைந்ததும் ஏற்பட்ட கடுமையான சூழ்நிலையில், தி.மு.க.வில் பெரிய அளவில் சலசலப்பு ஏற்படாமல் கருணாநிதியை முதலமைச்சராக்கியதில் எம்.ஜி.ஆருக்கும் கணிசமான பங்கு உண்டு. பின்னர், கருணாநிதியுடன் கருத்து வேறுபாடு ஏற்பட்டு, அவரது ஆட்சியின் நெருக்கடியையும் சந்தித்தவர் எம்.ஜி.ஆர். 

எம்.ஜி.ஆர் தயாரித்து இயக்கி நடித்த 'உலகம் சுற்றும் வாலிபன்' படத்துக்கு கருணாநிதி தலைமையிலான தி.மு.க. ஆட்சி கொடுத்த தொல்லைகள் ரஜினிக்கு தெரியுமா...? போஸ்டர் கூட ஒட்ட விடாமல் தடுக்கப்பட்டது. படச்சுருள் பெட்டிகளுக்கும் பாதுகாப்பில்லை. அதை எல்லாம் எதிர் கொண்டு எம்.ஜி.ஆர். வெற்றி பெற்றார். அவரது சொந்த தயாரிப்பு மற்றும் இயக்கமான 'உலகம் சுற்றும் வாலிபன்' படத்தின் வெற்றியே அதற்கு சாட்சி. ஆனால், பா.ம.க.வின் எதிர்ப்பை கூட 'பாபா'வால் சமாளிக்க முடியவில்லையே...?

1977ம் ஆண்டில் தமிழக முதலமைச்சராவதற்கு முன் 25 ஆண்டு காலம் தமிழக அரசியலோடு பின்னிப் பிணைந்து இருந்தவர் எம்.ஜி.ஆர். முதலமைச்சராகும் முன் 15 ஆண்டு சட்டப்பேரவை அனுபவமும் உண்டு. நடிப்புடன் கூடவே, அவரது அரசியல் பயணம் நீடித்தது. திடீரென கட்சி ஆரம்பித்து, அடுத்த சில ஆண்டுகளில் தமிழக ஆட்சியை எம்.ஜி.ஆர். பிடிக்கவில்லை. எம்.ஜி.ஆரின் அரசியலோடு ரஜினியின் அரசியல் பிரவேசத்தை ஒப்பிடுபவர்கள் இதை புரிந்து கொள்ள வேண்டும். 

ரஜினி நல்லவர்... வல்லவர்... பச்சை தமிழர்... அவர் ஆட்சிக்கு வந்ததும் தமிழகத்தில் பாலாறும், தேனாறும் ஓடும்... இப்படி எதை வேண்டுமானாலும் கூறிக் கொள்ளலாம். ஆனால், எம்.ஜி.ஆருடன் மட்டும் ரஜினியின் அரசியலை ஒப்பிட வேண்டாம்.


அவர் அவர்தான்... 

ஒரே ஒரு சந்திரன் தான் உலகுக்கெல்லாம்...

= #நெல்லை_ரவீந்திரன்

Wednesday, 2 June 2021

கலைஞர் ஒரு சகாப்தம்


 

எம்.ஜி.ஆர் நடிப்பில் 70 ஆண்டுகளுக்கு முன்பு வெளியான படம் மந்திரி குமாரி. ராஜகுருவான எம்.என்.நம்பியாரின் மகன் எஸ்.ஏ.நடராஜன் கொள்ளைக்காரன். எஸ்.ஏ.நடராஜன் இறந்ததும் கொள்ளை கும்பலுக்குள் தகராறு வரும். அப்போது அந்த கும்பலில் ஒருவர் வந்து, சதா சர்வகாலமும் சமையலறையில் கிடக்கிறேனே எனக்கு என்ன கிடைக்கும்? என்பார். உடனே, நீ தான் உணவுத் துறை மந்திரி என்பார்கள். நான் அங்கும் இங்கும் சுற்றிக் கொண்டு இருக்கிறேனே எனக்கு என மற்றொருவர் கேட்க, நீதான் போக்குவரத்து மந்திரி என்பார்கள். 

சுதந்திரம் பெற்று முதலாவது பொதுத் தேர்தல் கூட நடக்காத நிலையில் வெளியான இந்த படத்தின் கதை வசனம் இன்றைய அரசியலுக்கும் கச்சிதமாக பொருந்தும். குண்டலகேசி காப்பியத்தை தழுவி இந்த கதை மற்றும் வசனம் எழுதியபோது கலைஞரின் வயது 27.

பின்னர் பராசக்தி, மனோகரா, பூம்புகார் என அவரது காவியங்கள் ஏராளம். எம்ஜிஆர் சிவாஜி எஸ்எஸ்ஆர் தொடங்கி விஜயகாந்த், வினீத், வடிவேலு, பிரசாந்த் வரை அவரது வசனத்தை பேசியவர்கள் தான். 1950களின் கிருஷ்ணன் பஞ்சு துவங்கி 1980களில் எஸ்ஏ சந்திரசேகர் போன்றவர்களை கடந்து 2000த்துக்கு பிந்தைய தமிழ் திரைப்பட இயக்குநர்கள் வரை பார்த்தவர்.

காங்கிரஸ், கம்யூனிஸ்ட் கட்சிகள் மட்டுமே கோலோச்சிய காலகட்டத்தில், அதுவும் காங்கிரசை சேர்ந்த ஒரு தயாரிப்பாளரின் படத்துக்குள்  கடவுள் மறுப்பு கொள்கைளை புகுத்துவது நினைத்து பார்க்க முடியாத சூழ்நிலையில், பராசக்தியில் அதை சாதித்தார். 

இளமைப் பருவத்தில் தொடங்கிய அந்த போர்க்குணம் தொடர்ந்ததாலேயே ஏழு தசம ஆண்டுகளாக தமிழக அரசியலில் உதய சூரியனாக ஒளிர்ந்தார். 1956 துவங்கி 2016 வரை அவர் மட்டுமே உதய சூரியனை பெற்றவர். இந்தியாவில் வேறு யாருமே இவ்வளவு நீண்ட காலம் சட்டப்பேரவை அங்கத்தினராக இருந்திருக்க முடியாது.

ராஜாஜி, காமராஜர், ஆர். வெங்கட்ராமன், பக்தவத்சலம், பெரியார், அண்ணா, எம்.ஜி.ஆர். ஜெயலலிதா, மூப்பனார், ராமதாஸ், விஜயகாந்த், ஓ.பி.எஸ் வரை மாநில அரசியலிலும், 

நேரு, இந்திரா, சரண்சிங், மொரார்ஜி தேசாய், வி.பி.சிங், குஜ்ரால், தேவேகவுடா, என்.டி.ராமராவ், வாஜ்பாய், மன்மோகன் சிங், சோனியா, மோடி என தேசிய அரசியலிலும் பல தலைமுறைகளை பார்த்தவர். 

ஆட்சி அதிகாரத்தில் இல்லாதபோதும் அவரது அரசியல் நகர்வைத்தான்  தமிழகம் எதிர்பார்த்து காத்திருந்தது. 

எழுத்து, பத்திரிகை துறையிலும் கலைஞரின் சாதனை சாமான்யமானதல்ல. கல்லூரி, பல்கலையில் பட்டம் பெற்றவர்கள் கூட, அவரது தமிழ் சொல்லாடல்களுக்கு முன் தூசி.

காலை நாளிதழ்களில் எந்த செய்தி, எப்படி தலைப்பாக வரும் எப்போது அதை  தந்தால் சரியாக இருக்கும் என்பதை எல்லாம் அறிந்து அதற்கேற்ற செய்திகளை தரும் அரசியல் தலைவர் கம் பத்திரிகையாளர் அவர் ஒருவரே. 

ஆட்சி அதிகாரம் இல்லாத நிலையிலும் அரை நூற்றாண்டாக ஒரு அரசியல் கட்சியை தனது கட்டுக்குள் வைத்திருந்து, நான்கைந்து தலைமுறை மக்களின் விருப்ப தலைவராக இருந்து, மாநில அரசியலில் இருந்து தேசிய அரசியல் வரை நீ​ண்ட காலம் தன்னை முன்னிலைப்படுத்துவது என்பது சாதாரண விஷயமல்ல.

கலைஞரின் அரசியலில் பலருக்கும் பல வித கருத்து வேறுபாடுகள் இருக்கலாம். ஆனால், அவரது 60 ஆண்டு ஆளுமை அனைவரையும் நிச்சயமாக வியக்கச் செய்யும். 

லட்சத்தில் ஒருவருக்கே சிறப்பான சொல்லாடல்களுடன் தமிழை பிழையற எழுதும் பாக்கியம் வாய்க்கும். லட்சத்தில் ஒருவருக்கே சிறப்பாக வசனங்களையும், புத்தகங்களையும் எழுதும் ஆற்றல்  அமையும்.  லட்சத்தில் ஒருவருக்கே சிறப்பான மேடைப் பேச்சு கை வரும். லட்சத்தில் ஒருவருக்குத்தான் மக்கள் செல்வாக்குடன் அரசியலிலும், ஆட்சியிலும் ஆதிக்கம் செலுத்தும் வரம் கிடைக்கும். 

எழுத்து, இலக்கியம், சினிமா, அரசியல், மக்கள் செல்வாக்கு, நீண்ட அரசியல் அனுபவம் என அனைத்தையுமே பெற்ற கலைஞர், கோடியில் ஒருவர். 

முக்கால் நூற்றாண்டுக்கு மேல் கடவுள் மறுப்பு கொள்கையில் தீவிரமாக இருந்தாலும், கருணா மூர்த்தியான இறைவனின் கருணை அவர் மீது அதிகம். ஒரு வகையில் பார்த்தால், அவரே ஆண்டவர் தானே...?

#நெல்லை_ரவீந்திரன்

Tuesday, 15 December 2020

எம்ஜிஆர் - 1977 Vs 2021

தமிழக அரசியலில் நடிகர்கள் நுழையும் போதெல்லாம் உதிர்க்கப்படும் வார்த்தை எம்ஜிஆர். ஆதரவோ, விமர்சனமோ... இதை எந்த தரப்பு உச்சரித்தாலும் அதன் அடி நாதத்தில் ஔிந்து கிடப்பது, அவர் ஒரு நடிகர் என்ற பார்வைதான். நடிகராக அவரைப்பற்றி பேசும் பலரும் அவரது அரசியல் பயணம் பற்றி அறியாதவர்கள் என்பதே உண்மை.

எம்ஜிஆரின் அரசில் பயணம் என்பது 1950களிலேயே துவங்குகிறது. எல்லா மனிதரைப் போலவே அனைத்து நடிகர்களுக்குள்ளும் அரசியல் சார்பு உண்டு. அதை எம்ஜிஆர் மறைக்கவில்லை. நடிப்பு தொழிலுடன்  திராவிட இயக்கங்களிலும் தனது முழு ஈடுபாட்டை காட்டினார். 1950களின் இறுதியில் திமுக ஆரம்பித்தபோது அதன் முழு நேர உறுப்பினர், எம்ஜிஆர்.



அவ்வளவு ஏன்? தனது படங்களிலும் திமுக கொள்கைகளையும் சின்னத்தையும் பிரபலப்படுத்துவதிலும் கவனம் செலுத்தினார். கருப்பு வெள்ளை படங்களில் இருந்து வண்ணப்படங்கள் வரை எம்ஜிஆர் பட காட்சி பின்னணிகளை நுணுக்கமாக பார்த்தால்  இதை அறியலாம். இது போன்ற துணிச்சல், அரசியல் ஆர்வம் கொண்ட நடிகர்கள் எவருக்காவது உண்டா என்றால் இல்லை என்பதே பதிலாகும். 1957ல் மிகுந்த பணக் கஷ்டத்தோடு நாடோடி மன்னன் படத்தை எம்ஜிஆர் தயாரித்தபோது, தனது எம்ஜிஆர்  பிக்சர்ஸின் லோகோவே திமுக கொடி தான்.

இத்தனைக்கும், அப்போது மத்தியிலும் மாநிலத்திலும் காங்கிரஸ் கட்சியின் ஏகபோக ஆட்சி. திமுக அப்போது தான் புதிதாக துளிர்விட்ட கட்சி. பொது சின்னம் கூட கிடையாது.

இதை, இன்றைய புதிய  நடிகர்கள் வரை தங்கள் புதுப்பட ரிலீசுக்காக மட்டுமே அரசியல் பேசுவதை ஒப்பிட்டு பார்க்க வேண்டும். 

1967 வரை காங்கிரஸ் ஆட்சிக்கு எதிராக (இது எம்ஜிஆரின் கதாநாயக பயணத்தில் 20 ஆண்டுகள்) திமுக பொதுக் கூட்டங்களில் பிரசாரம் செய்தவர் எம்ஜிஆர். காங்கிரஸ் சார்பு நிறுவனம் என்பதால் ஏவிஎம் பேனரில் கூட (அன்பே வா தவிர) அவர் நடித்ததில்லை. படப்பிடிப்பு தவிர்த்த மற்ற நேரங்களில் எல்லாம் திமுக கட்சிப் பணியாற்றியவர். இந்த துணிச்சல் இன்றைய பிரபல நாயக  நடிகர்களிடம் துளி கூட இல்லாத ஒன்று.

அதிமுக என்ற கட்சியை துவங்கும் முன், அவர் திமுக பிரமுகர், நிர்வாகி, அந்த கட்சியின் பொருளாளராக மூத்த தலைவர், அந்த கட்சியில் எம்எல்சி, எம்எல்ஏ மற்றும் அமைச்சர் பதவிக்கு நிகரான சிறு சேமிப்பு குழு தலைவர் என பதவிகளை வகித்தவர். அண்ணா மறைந்தபோது திமுகவின் முக்கிய நிர்வாகிகளில் ஒருவராக கருணாநிதி தலைமையிலான ஆட்சி அமைவதிலும் பங்கெடுத்தவர். 1972ல் அண்ணா இல்லாத தேர்தலில் கூட்டாக நின்ற காமராஜரையும், ராஜாஜியையும் கருணாநிதியுடன் கைகோர்த்து தோற்கடித்து திமுகவை ஆட்சியில் அமர்த்தியவர். அந்த தேர்தலில் பெற்றதை போன்ற இடங்களை இதுவரை தமிழகத்தில் எந்த ஆளுங்கட்சியும் பெறவில்லை.

அதாவது, அதிமுக ஆரம்பிப்பதற்கு முன்,  எம்ஜிஆரின் முழு நேர அரசியல் அனுபவம் கிட்டத்தட்ட 20 ஆண்டுகள். 

திமுக தலைவர் கருணாநிதியுடன் கருத்து வேறுபாடு ஏற்பட்டு அதிமுகவை துவக்கியபோது, எம்எல்ஏக்களில் பலர் தன்னுடன் வந்ததால் (அப்போது கட்சித்தாவல் தடை சட்டம் கிடையாது) எதிர்க்கட்சி தலைவராகவும் எம்ஜிஆர் இருந்தார். 

அந்த கால கட்டத்தில் கருணாநிதி தலைமையிலான திமுக ஆட்சியின் நெருக்கடிகளையும் எதிர் கொண்டவர், எம்ஜிஆர். அரசியல் ரீதியாகவும் (மதுரை மேயர் முத்து விவகாரம் ஒரு உதாரணம்) சினிமா ரீதியாகவும். எம்.ஜி.ஆர் தயாரித்து இயக்கி நடித்த 'உலகம் சுற்றும் வாலிபன்' பட ரிலீஸ் பற்றி அந்தக் கால கட்சிக்காரர்களிடம் கேட்டால் கதை கதையாக சொல்வார்கள்.

இப்படியாக பல அரசியல் அனுபவங்களுடன் தான் அதிமுக என்ற புதிய கட்சியுடன் 1977ல் தனியாக களம் புகுந்தார் எம்ஜிஆர். அவருக்கு முதல் தேர்தலிலேயே வெற்றி. தொடர்ந்து அடுத்தடுத்த மூன்று தேர்தல்களில் வென்ற தமிழகத்தின் ஒரே ஹாட்ரிக் முதல்வர் அவர்தான்.



இந்த வெற்றிகளுக்கு எம்ஜிஆரின் மக்கள் செல்வாக்கு ஒருபுறம் இருந்தாலும் அன்றைய அரசியல் சூழ்நிலைகளும் அவருக்கு சாதகமாக இருந்தது. அது என்ன சூழல்?

1977 சட்டப்பேரவை தேர்தலின் போது அண்ணா, காமராஜர், ராஜாஜி, பெரியார் இப்படி பெரிய தலைவர்கள் யாரும் கிடையாது. இந்திரா காங்கிரஸ் என்ற கட்சியே தமிழகத்தில் இல்லை. காமராஜரின் ஸ்தாபன காங்கிரஸ் கட்சியினரும் காமராஜர் மறைவால் குழம்பிக் கிடந்த சமயம். ஆக... பெரிய தலைவர்கள் இல்லாத தேர்தல். கருணாநிதி, எம்ஜிஆர் இருவரின் வயதும் 50 பிளஸ்.

அன்றைய சூழலில் ஆளும் திமுக மட்டுமே ஏகபோக கட்சி. அதுவும் எம்ஜிஆருக்கு தொடர் நெருக்கடிகளை கொடுத்து தெரிந்தோ தெரியாமலோ ஸிம்பதி கலந்த ஆதரவை எம்ஜிஆருக்கு அதிகரித்துக் கொடுத்தது. இறுதியாக, களத்தில் ஏகபோகமாக இருந்த திமுகவுக்கு மாற்றாக எம்ஜிஆரால் எளிதில் வெற்றி பெற முடிந்தது. 

அதன் பிறகு, இரண்டு கழகங்களின் ஆதிக்கம் தான். இந்த இடத்தில் காங்கிரஸ் கட்சியின் ஏமாளித்தனத்தை குறிப்பிட்டே ஆக வேண்டும். அப்போது உஷாராக இருந்திருந்தால் மூன்றாவது அணி, தேசிய கட்சிக்கான வாய்ப்பு போன்றவை ஒருசில மாநிலங்களில் இருப்பதை போலவே தமிழகத்திலும் கருகிப் போகாமல் இருந்திருக்கும். 


 ஆனால், 1980ல் இருந்தே இரண்டு கழகங்களின் தோளில் சவாரி செய்து சுகம் காண தொடங்கியது, காங்கிரஸ் கட்சி (இன்றைய காங்கிரஸ் நிலைக்கு அதுவும் காரணம். அதைப்பற்றி தனியாகவே எழுதலாம்). இது இரண்டு கழகங்களுக்கும் சாதகமானது. எம்ஜிஆரின் வள்ளல், ஏழை பங்காளன் என்ற தோற்றம், அவரை இறுதி வரை ஆட்சிக் கட்டிலில் அழகு பார்க்கச் செய்தது. 



இதுதான் எம்ஜிஆரின் உண்மையான  அரசியல் வரலாறு. இதில் ஏதாவது ஒன்றாவது எம்ஜிஆர் பெயரை கூறும் நடிகர்களுக்கு ஒத்துப் போகிறதா? 

மற்றொன்று, அதிமுகவை துவக்கி எம்ஜிஆர் களம் புகுந்தபோது திமுக என்ற ஒரு கட்சிதான். இப்போது, இரண்டு கழகங்கள் வலுவாக இருக்கின்றன. மூன்றாவது வரும் கட்சி ஆட்சியமைக்கும் பலத்துடன் வெற்றி பெறுவது கஷ்டம். ஒரு வாதத்துக்காக வைத்துக் கொண்டாலும் மகாராஷ்டிரா போல வேண்டுமானால் நடக்கலாம். ஆனால், தமிழக மக்கள் ஒருபோதும் ஆளுநருக்கு வேலை வைத்ததே இல்லை.

#நெல்லை_ரவீந்திரன்

Wednesday, 15 July 2020

காமராஜர்... சகாப்தம்...

 தமிழ்நாட்டின் இன்றைய கல்வி வளர்ச்சிக்கு அஸ்திவாரம். வெறும் 7% கல்வியறிவை 9 ஆண்டுகளில் 37% ஆக்கிய படிக்காத மேதை....

ஐஐடி மாதிரியான உயர்கல்வி நிறுவனங்களை 60 ஆண்டுக்கு முன்பே தமிழ் நாட்டுக்கு தந்த  தலைவர்...

தெற்கில் இருந்து வடக்கு வரை இன்று உச்சரிக்கப்படும்  அணைகளின் நீர்த்திவலைகள் ஒவ்வொன்றும் ஓயாமல் உச்சரிப்பது இவரது பெயரையே...

சென்னை எம்.ஆர்.எல்.(சிபிசிஎல்), நெய்வேலி, சேலம் என தொழில் வளத்தையும் மேம்படுத்திய கருப்பு தங்கம்...

அறிக்கைகளையே சாதனைகளாக பட்டியலிடும் மார்க்கெட்டிங் வித்தை  தலைவர்களை பார்த்துக் கொண்டிருக்கும் விழிகள் எல்லாம், இப்படி ஒரு தலைவர் இருந்தாரா என இமைக்க மறந்து நிற்கின்றன...

அரியணையை வென்ற மறு ஆண்டே, தேச சேவைக்காக  பதவியை துறந்த தியாக திருவிளக்கு...

இனம் காட்டும் நிறம். குணம் கூறும் உடை.  துணிச்சலை பறைசாற்றும் உடல்வாகு. கை கூப்பி வணங்கத் தோன்றும் முகம் என நான்கும் இணைந்த நல்லவர். ஒரு சில துளிகளுக்குள் அடக்க முடியாத மகா சமுத்திரம்.

மாதம் முழுவதும் கத்திரிக்காய் சாம்பார் சாப்பாடு என்றாலும் மனம் கோணாமல் சாப்பிடுவார். என்றைக்காவது ஒரு முட்டை வைத்து சாப்பிட்டால் அவருக்கு அது விருந்து சாப்பாடு. 

ஆண்டுக்கு இரண்டே இரண்டு நாட்கள் சீஸன் சமயத்தில் குற்றாலம் போய் தங்கி வருவதே அதிகபட்ச சந்தோஷம்!

பத்திரிகையாளர்களுக்கு அவர் கூறிய அறிவுரை எந்தக் காலத்திலும் பொருந்திச் செல்லக் கூடியது. ‘ஒண்ணு, நீங்க பத்திரிகைக்காரனா இருங்க. அல்லது அரசியல்வாதியாவோ பிசினஸ்மேனாவோ இருங்க. மூணாகவும் இருக்க முயற்சி பண்ணாதீங்க!’

ஆங்கிலம், இந்தி, மலையாளம், தெலுங்கு மொழிகளில் பேசுவார். அவரளவுக்குச் சுருக்கமாக பேச யாராலும் முடியாது.

உத்தர பிரதேச மாநிலத்தில் ஒரு பத்திரிகையாளர் சந்திப்பில் 50 கேள்விகளுக்கு ஏழு நிமிடத்தில் பதிலளித்தார். இரண்டரை மணி நேரத்தில் எட்டு ஊர்களில் கூட்டம் பேசியிருக்கிறார்.

இரண்டு முறை பிரதமர் வாய்ப்பு வந்தும் அதை நிராகரித்து லால் பகதூர் சாஸ்திரி, இந்திரா காந்தி ஆகியோரை பிரதமர் ஆக்கிவிட்டு  ‘கிங் மேக்கர்’ பட்டத்தை மட்டும் தக்க வைத்துக் கொண்டவர். 

வட இந்தியர்களுக்கு ‘காலா காந்தி’, பெரியாருக்கு ‘பச்சைத் தமிழர்’,  தமிழர்களுக்கு என்றும் அவரே பெருந்தலைவர்.



இருக்கும்போது கைவிட்டு விட்டு கல்லறைக்கு மலர் தூவும் குணாளர்களின் சிலுவைகளையும் மலர்களாய் சுகமாக சுமந்த குணாளா... குணக் கொழுந்தே...


Wednesday, 3 June 2020

கலைஞர்

 1) கையெழுத்து பத்திரிகை காலத்தில் தொடங்கி 80 ஆண்டுகளாக பத்திரிகை அனுபவம். அதிகாலையிலேயே எந்த பத்திரிகையில் என்ன செய்தி வந்திருக்கிறது என்பதை அறிந்து கொள்வதிலும் பத்திரிகைகளுக்கு எப்படி, எந்த நேரத்தில் செய்தி அனுப்பி வைக்க வேண்டும் என்பதையும் புரிந்து வைத்த புலிட்சர். 



2) பேசும்படம் காலம் தொடங்கி வண்ணப்படம், சினிமாஸ்கோப், டிஜிடல் யுகம் கடந்து சின்னத் திரையிலும் வசன மழை பொழிந்து வரும் வருணன். திரை இசைக்கு பாடல்களை வடித்து தரும் கவிச்சக்கரவர்த்தி


3) பள்ளிப்படிப்பை தாண்டாத போதிலும் பிஎச்டி மாணவர்களின் ஆராய்ச்சிக்கும் தீனி தரும் அட்சய பாத்திரம். 


4) தமிழ் கூறும் நல்லுலகில் தோன்றிய எழுத்தாளர்களில் ஆயிரம் பிறை கண்டவர்களில் ஒருவர். தொன்னூறைக் கடந்தும் தளரா நடையுடன் நூல் வடித்த எழுத்துச் சிற்பி. 


5) தமிழறிஞர்களுக்கும் புலப்படா சூட்சுமங்களை விளக்கி இலக்கியங்களுக்கு உரை எழுதிய தொல்காப்பியர். 


6) முத்தமிழின் மூன்றாம் தமிழில் கரை தேர்ந்து சிலப்பதிகாரம், காகிதப்பூ என தொடர்ந்து தமிழன்னைக்கு மணிமகுடம் சூட்டிய கலைஞர். 


7) தேர்தலில் தோல்வி முகம் காணாதவர். விரும்பினாலும், வெறுப்புடன் பார்த்தாலும் தமிழக அரசியலின் அரை நூற்றாண்டு கால நவீன சாணக்கியர்.  


8) திண்ணை பள்ளியில் கல்வி பயின்றாலும் 4 தலைமுறைகளை கடந்தும் கூட நவீன யுக தகவல் தொடர்பில் அப்டேட்டான ஆன்ட்ராய்டு இளைஞர். 


9) வயதில் 4 மடங்கு இளையோரின் விமர்சன கணைகளையும் எதிர் கொண்டவர். கடுமையான எதிரியும் கூட ஒளிந்து நின்று ரசிக்கத் தகுந்த ஏதேனும் ஒரு சிறப்பை தன்னுள் புதைத்து வைத்திருக்கும் ஆழ்கடல் அதிசயம். 


10) அனுதினமும் ஆதவனை தட்டி எழுப்பி அவனுக்கு இணையாக களைப்பின்றி சுழலும் முத்துவேலர் ஈன்ற முத்தின் சிறப்புகளை பத்துக்குள் அடக்க முடியுமா...?

#நெல்லை_ரவீந்திரன்

Tuesday, 25 June 2019

ஜனநாயகத்தின் கருப்பு தினம்

45 ஆண்டுகளுக்கு முன்.... 

இதே நாளில்... 

1975 ஜூன் 25... 

இந்திய ஜனநாயகத்தின் கருப்பு தினம். 

அன்றைய தினம் தான் ரேபரேலி தொகுதி எம்பியாக தேர்வான தனது தேர்தல் வெற்றிக்கு எதிராக அலகாபாத் உயர் நீதிமன்றம் தீர்ப்பளித்தது என்ற ஒரே காரணத்துக்காக இந்திய அரசியலமைப்பு சட்டத்தின் 352வது பிரிவை அமல் படுத்தி நாடு முழுவதும் நெருக்கடி நிலையை அறிவித்தார், அன்றைய பிரதமர் இந்திரா காந்தி. அவருடைய ஆணையை ஏற்று எமர்ஜென்சி அல்லது மிசா எனப்படும் நெருக்கடி நிலை உத்தரவை பிறப்பித்தவர் அப்போதைய ஜனாதிபதி பக்ருதீன் அலி முகமது. 

அதற்கு முன் 1962ம் ஆண்டு சீனாவுடன் யுத்தம் நடந்தபோதும், 1971ம் ஆண்டு பாகிஸ்தானுடன் யுத்தம் நடந்தபோதும் இரண்டு முறை நெருக்கடி நிலை அமலில் இருந்தது. ஆனால், 1975 மிசா நிலைமை முற்றிலும் வேறானது. கொடுமைகள் நிறைந்தது.

சுதந்திரம் பெற்றதில் இருந்தே அதிகாரத்தில் தொடர்ந்து நீடித்து வந்த குடும்பத்தை சேர்ந்த நபரால்... பாகிஸ்தான் போரில் கிடைத்த வெற்றி மற்றும் வங்க தேசம் பிரிவினையால் இரும்பு பெண்மணியாக பார்க்கப்பட்ட இந்திரா காந்தியால்... அலகாபாத் உயர் நீதிமன்றம் அளித்த தீர்ப்பை ஜீரணிக்க முடியவில்லை. தெய்வத்துக்கு சாதாரன மனிதன் தண்டனை தருவதா...? என்ற மனோபாவத்தில் எழுந்த எண்ணம்...! 

இந்திராவின் எமர்ஜென்சி ஐடியாவுக்கு பின்னணியில் இருந்தவர்கள், அவரது இளைய மகன் சஞ்சய் காந்தி, அவரது தனி உதவியாளர் ஆர்.கே.தவான், அப்போதைய மேற்கு வங்க முதல் மந்திரி சித்தார்த்த சங்கர் ரே மற்றும் இவர்களுடன் அப்போதைய ஜனாதிபதி பக்ருதீன் அலி முகமது. 

இந்த நால்வர் அணியின் ஆலோசனையால் விளைந்த நெருக்கடி நிலையால் ஒரே நாள் இரவில் தேசிய அளவில் ஜெயப்பிரகாஷ் நாராயண் (ஜேபி), மொரார்ஜி தேசாய், வாஜ்பாயி, அத்வானி என எதிர்க்கட்சி தலைவர்கள் ஆகியோர் ஒட்டு மொத்தமாக கைது செய்யப்பட்டனர். இந்திராவுக்கு எதிராக தேர்தல் வழக்கு போட்டவர் உட்பட... அதன்பிறகும் ஆச்சார்யா கிருபளாணி, சரண் சிங் என இந்திராவை எதிர்த்த தலைவர்கள் ஒவ்வொருவரும் வரிசையாக கைதாகினர். 

தலைவர்கள் எப்படி கைது செய்யப்பட்டனர் என்பதற்கு அன்றைய இளம் தலைவர்களில் ஒருவரான ஜார்ஜ் பெர்ணாண்டஸ் (பின்னாளில் கார்கில் யுத்தத்தின் போது வாஜ்பாயி ஆட்சியில் ராணுவ மந்திரியாக இருந்தவர்) இரும்புச் சங்கிலியால் பிணைக்கப்பட்டு கைது செய்யப்பட்ட படமே சாட்சி. 

அரசியல் கட்சித் தலைவர்கள், தொண்டர்கள், அரசை எதிர்க்கும் மக்கள் என எதிர்ப்படுவோரை கைது செய்ய உள்நாட்டு பாதுகாப்பு சட்டம் (மிசா) பயன் படுத்தப்பட்டது. மாநில அளவிலும் ஆட்சிகள் கலைக்கப்பட்டன. அதற்கு இணையான கொடுமைகளும் அரங்கேறின. இன்றைய திமுக தலைவர் ஸ்டாலின் மற்றும் திமுக பிரமுகர்களும் சிறையில் ‘மிசா’ கொடுமைகளுக்கு ஆளானவர்களே. 

அதே நேரத்தில், இந்திரா காந்தியுடன் கருத்து வேறுபாடு ஏற்பட்டு தமிழகத்தில் ஸ்தாபன காங்கிரஸ் என தனியாக கட்சி நடத்தி வந்த பெருந்தலைவர் காமராஜரும் கூட எமர்ஜென்சியால் மனம் நொந்து இருந்தார். 1975ம் ஆண்டு அக்டோபர் 2ம் தேதி காந்தியடிகள் பிறந்த நாளன்றாவது  எமர்ஜென்சி முடிவுக்கு வரும் (1977 ஜனவரி வரை எமர்ஜென்சி இருந்தது) என எதிர்பார்த்து இருந்த காமராஜரின் காதுக்கு ஆச்சார்யா கிருபளானி கைதான செய்தி தான் எட்டியது. அந்த அதிர்ச்சியிலேயே காமராஜர் உயிர் துறந்தார் என்பது வரலாறு. 

எந்த பதவியிலும் இல்லாத இந்திரா காந்தியின் இளைய மகன் சஞ்சய் காந்திதான் நெருக்கடி நிலை காலத்தில் அதிகார மையமாக இருந்தார் என்றால்  நிலைமையை யூகித்துக் கொள்ளலாம். நெருக்கடி நிலை பிறப்பிக்கப்பட்ட அடுத்த நிமிடமே நாட்டில் உள்ள முக்கியமான பத்திரிகை அலுவலகங்களுக்கு மின் சப்ளை துண்டிக்கப்பட்டது. கருத்து சுதந்திரம் மற்றும் சாதாரண குடிமகனுக்கு அரசியலமைப்பு சட்டம் அளித்துள்ள ஆறு அடிப்படை உரிமைகள் பறிக்கப்பட்டன. 



பத்திரிகைகளுக்கும் கடுமையான கட்டுப்பாடுகள் விதிக்கப்பட்டன. அதிகாரிகளின் தணிக்கைக்கு பிறகே பத்திரிகைகள் வெளியாக முடியும். அரசுக்கு எதிரான சர்ச்சையான செய்திகள் இருந்தால் அதை நீக்கி விட்டு வேறு செய்தியை சேர்க்க வேண்டும். துக்ளக், இந்தியன் எக்ஸ்பிரஸ் போன்ற பத்திரிகைகள் அதற்கு உடன் படாமல் அந்த செய்திகள் இருந்த இடத்தை மட்டும் வெற்றிடமாகவே வைத்து பத்திரிகைகளை வெளியிட்டன. 



1975 ஜூன் முதல் ஆறு மாதங்களுக்கு ஒரு முறை என்ற வீதத்தில் நெருக்கடி நிலை நீடிக்கப்பட்டு 19 மாதங்கள் வரை நீடித்தது. இந்த கால கட்டத்தில் காரணம் எதுவும் கூறப்படாமலேயே ஒன்றரை லட்சம் பேர் (இது சர்வதேச நாடுகளின் கணக்கு) கைது செய்யப்பட்டனர். டெல்லி ஜுமா மசூதி அருகே குடிசைகளில் வசித்த இரண்டரை லட்சம் முஸ்லிம்கள் துரத்தப்பட்டனர். நாடு முழுவதும் 2 கோடி ஆண்களுக்கு கட்டாயமாக குடும்பக் கட்டுப்பாடு செய்யப்பட்டது. 



ஹிட்லர், முசோலினி, இடி அமீன் போன்றவர்களை நினைவூட்டிய ‘மிசா’ கொடுமைகள் அரங்கேறி 45 ஆண்டுகளாகி விட்டன. கறுப்பு நாட்களாக கடந்து போன அந்த 19 மாதங்களும் இந்திய ஜனநாயகத்தில் ஒரு கசப்பான வரலாறு.

- #நெல்லை_ரவீந்திரன்

Sunday, 9 June 2019

இதே நாளில் அன்று

எமர்ஜென்சிக்கு பிறகு ஆட்சிக்கு வந்த ஜனதா அரசு கவிழ்ந்ததால் 1980 ஜனவரியில் நடந்த நாடாளுமன்ற பொதுத் தேர்தலில் அறுதி பெரும்பான்மையுடன் வென்று மத்திய ஆட்சியை 3 ஆண்டுகளுக்கு பின் மீண்டும் கைப்பற்றி இருந்தார், இந்திரா காந்தி. தமிழ் நாட்டில் திமுக காங்கிரஸ் கூட்டணி 38 இடங்களை பிடித்தது. அப்போது தமிழகத்தில் ஆட்சியில் இருந்த எம்ஜிஆரின் அதிமுக 2 எம்பி இடங்களை மட்டுமே பிடித்தது.

இதனால், ஆட்சியை கைப்பற்ற இதுவே சரியான தருணம் என நினைத்த கருணாநிதி, எம்ஜிஆரின் ஆட்சியை கலைக்குமாறு இந்திராவுக்கு நிர்பந்தம் கொடுத்தார். விளைவு, மத்திய ஆட்சிக்கு வந்த மறு மாதமே எம்ஜிஆர் ஆட்சியை கலைத்தார் இந்திரா. தமிழகத்தில் எம்ஜிஆர் அரசு உட்பட இந்தியா முழுவதும் ஜனதா ஆதரவு கட்சிகளின் அரசு மற்றும் ஜனதா கட்சி அரசு என ஒரே நாளில் 17 மாநிலங்களின் ஆட்சியை கலைத்தார் இந்திராகாந்தி. அப்போதெல்லாம் 356 பிரிவை பயன்படுத்தி எதிர்க்கட்சி மற்றும் பிடிக்காத முதல்வர்களின் அரசுகளை கலைப்பது காங்கிரசுக்கு கைவந்த கலை.

இப்படியாக, எம்ஜிஆர் ஆட்சி கலைக்கப்பட்டு 1980ல் தமிழக சட்டப்பேரவை தேர்தல் அறிவிக்கப்பட்டது. திமுக, காங்கிரஸ் கூட்டணி மீண்டும் களமிறங்கியது. நாடாளுமன்ற தேர்தல் தோல்வியால் ஜனதா, அதிமுக இடையே உரசல் ஏற்பட்டு இரண்டும் தனியாக போட்டியிட்டன. குமரி அனந்தனின் காகாதேகா, பழ. நெடுமாறன் கட்சி போன்ற சிறிய கட்சிகளுடன் கூட்டு சேர்ந்து 177 இடங்களில் அதிமுக களமிறங்கியது.

நாடாளுமன்ற தேர்தல் முடிந்த ஐந்தாவது மாதத்தில் நடைபெற்ற இந்த சட்டப்பேரவை தேர்தலில் எம்ஜிஆரின் அதிமுக அமோக வெற்றி பெற்றது. அதிமுக அணியில் அதிமுக மட்டும் 130 இடங்களை பிடித்து, இரண்டாவது முறையாக முதல்வரானார் எம்ஜிஆர். தமிழக மக்களின் நாடாளுமன்ற தேர்தல் தீர்ப்பை வைத்து கருணாநிதியும் இந்திராவும் கணித்த கணிப்பு பொய்யாக முடிந்தது.

தமிழக அரசியலில் காமராஜருக்கு பிறகு தொடர்ந்து இரண்டாவது முறையாக தேர்தலில் வென்றார், எம்ஜிஆர். (இந்த பட்டியலில் 2016ல் ஜெயலலிதா இடம் பெற்றார்) அப்படி இரண்டாவது முறையாக ஆட்சியை கைப்பற்றி தமிழக  முதல்வராக எம்ஜிஆர் மீண்டும் பதவியேற்றது இதே நாளில் தான்... 9-6-1980.



அதன்பிறகு, 1984 தேர்தலிலும் மூன்றாம் முறையாக ஆட்சியை கைப்பற்றி தமிழகத்தில் யாருமே முறியடிக்காத ஹாட்ரிக் வெற்றியை எம்ஜிஆர் அழுத்தமாக பதிவு செய்தார் என்பது வரலாறு.

Monday, 20 May 2019

நாடாளுமன்ற தேர்தல் -25

இந்தியாவின் இரண்டாவது காங்கிரஸ் அல்லாத ஆட்சிக்கான முயற்சியும் இரண்டே ஆண்டுகளில் தோல்வியில் முடிந்தாலும், 40 ஆண்டு கால காங்கிரஸ் கட்சியின் ஏகபோக ஆதிக்கத்தின் முடிவுரை துவங்கி வைக்கப்பட்டது. பிரதமர் சந்திரசேகர் அரசு கவிழ்ந்து 1991ம் ஆண்டு நாடாளுமன்ற பொதுத் தேர்தல் அறிவிக்கப்பட்டது. மே மாதத்தில் காஷ்மீர், பஞ்சாபில் 19 தொகுதிகள் தவிர்த்து நாடு முழுவதும் 534 தொகுதிகளுக்கு மூன்று கட்டங்களாக தேர்தல் அறிவித்தார்கள். 

திமுக ஆட்சி கலைக்கப் பட்டதால், தமிழக சட்டப்பேரவை தேர்தலும் ஒன்றாக நடந்தது. ராஜீவ் தலைமையிலான காங்கிரஸ் கட்சி, தமிழகத்தில் ஜெயலலிதா தலைமையிலான அதிமுகவுடன் கூட்டணி அமைத்தது. எம்ஜிஆரின் கூட்டணி பார்முலாப்படி, சட்டப்பேரவை தொகுதிகளில் அதிமுகவுக்கு மூன்றில் இரண்டு பங்கு, நாடாளுமன்ற தொகுதிகளில் காங்கிரசுக்கு மூன்றில் இரண்டு பங்கு என ஒதுக்கப்பட்டது. இதனால், 11 மக்களவை தொகுதிகளில் மட்டும் அதிமுக களமிறங்கியது. 

இதுதவிர, பாஜக இடதுசாரிகள் உள்ளிட்ட கட்சிகள் களத்தில் இறங்கின. அத்வானியின் ரத யாத்திரையை தொடர்ந்து ராமர் கோவிலை தேர்தல் கோஷத்தில் முன் வைத்தது பாஜக. 1980 தேர்தல் போலவே, காங்கிரஸ் மட்டுமே நிலையான ஆட்சியை தர முடியும் என்ற கோஷத்தை எழுப்பியது. 1991 மே 20ம் தேதியன்று 211 தொகுதிகளில் முதல்கட்ட வாக்குப்பதிவு முடிந்தது. 

இந்த நிலையில் தான் அந்த அதிர்ச்சி சம்பவம் நடந்தது. தமிழகத்தில் மே 21ம் தேதியன்று தமிழகத்தில் பிரசாரத்துக்கு வந்த முன்னாள் பிரதமர் ராஜீவ் காந்தி, ஸ்ரீபெரும்புதூரில் மனித வெடிகுண்டு தாக்குதலில் கொல்லப்பட்டார். அவருடன் பாதுகாப்பு அதிகாரிகள், பொதுமக்கள் என உயிரிழந்தது, நாடு முழுவதும் பேரதிர்ச்சியை ஏற்படுத்தியது. தமிழகத்தில் கலவரம் வெடித்தது. திமுகவுக்கு எதிராக வன்முறை தலைவிரித்து ஆடியது. வெளி மாநிலங்களில் தமிழர்களை விரோதமாக பார்க்க, மீதமுள்ள இரண்டு கட்ட வாக்குப்பதிவை தேர்தல் ஆணையம் ஒத்தி வைத்தது.





ஒத்தி வைக்கப்பட்ட 300க்கும் மேற்பட்ட தொகுதிகளுக்கு ஜூன் மாதத்தில் தேர்தல் நடந்தது. தமிழகத்திலும் 1991 ஜூன் மாதத்தில் தான் இரண்டு தேர்தல்களும் நடைபெற்றன. ராஜீவ் கொலையால் நாடே உறைந்திருந்ததால் வாக்குச் சாவடிக்கு வர மக்கள் அச்சப்பட்டனர். இதனால், அதுவரை இல்லாத அளவில் 53% வாக்குகளே பதிவாகின. தேர்தல் முடிவுகள் வித்தியாசமாக வெளியாகின.

(நினைவுகள் சுழலும்)

= நெல்லை ரவீந்திரன்

Friday, 17 May 2019

நாடாளுமன்ற தேர்தல் -24

1989 நாடாளுமன்ற தேர்தலுக்கு பிறகு பாஜக, கம்யூனிஸ்ட் கட்சிகளின் ஆதரவோடு முதன்முறையாக அமைந்த சிறுபான்மை அரசு, நித்திய கண்டம் பூரண ஆயுசு என்ற நிலையிலேயே நாட்களை கடத்தியது. பிற்படுத்தப்பட்ட மக்களுக்கு இட ஒதுக்கீடு வழங்கும் மண்டல் கமிஷன் பரிந்துரையை விபி சிங் அறிமுகம் செய்தபோது, ஆட்சி நாற்காலியின் முதலாவது கால் ஆடத் தொடங்கியது. உயர் வகுப்பினர் அதிகமாக இருக்கும் வட மாநிலங்களில் மாணவர்களின் போராட்டம் அதிகரித்தது.



மற்றொருபுறம், அயோத்தியில் ராமர் கோவில் கட்டுவதற்காக நாடு முழுவதும் ரத யாத்திரையை ஆரம்பித்தார், பாஜக தலைவர் அத்வானி. இதற்கிடையே, ஜனதா தளத்துக்குள்ளேயே தலைவர்களிடையே வேறுபாடு ஆரம்பித்தது. இந்த சூழ்நிலையில், பீகாருக்குள் ரத யாத்திரையை நுழைய விடாமல், அத்வானியை கைது செய்தார், அம்மாநில முதலமைச்சர் லாலுபிரசாத் யாதவ். சமஸ்திபூரில் 1990 அக்டோப் 23ம் தேதி நடந்த இந்த கைதைத் தொடர்ந்து, விபி சிங் அரசுக்கு அளித்து வந்த ஆதரவை வாபஸ் பெற்றது, பாஜக. 


இதனால், நாடாளுமன்றத்தில் நம்பிக்கை வாக்கெடுப்பு கோரும் நிலைமைக்கு ஆளானது, விபிசிங் அரசு. பதவியேற்ற ஓராண்டுக்குள் நவம்பர் 7ம் தேதி நடந்த நம்பிக்கை வாக்கெடுப்பில் தோல்வியடைந்து, ஆட்சியை பறி கொடுத்தது, இந்தியாவின் முதலாவது சிறுபான்மை கூட்டணி அரசு. ஏற்கனவே உரசிக் கொண்டிருந்த சந்திரசேகர், 64 எம்பிக்களுடன் ஜனதா தளத்தில் இருந்து வெளியேறி சமாஜ்வாடி ஜனதா என்ற கட்சியை தொடங்கினார்.

இவரது கட்சி ஆட்சியமைக்க, வெளியில் இருந்து ஆதரவு அளித்தது, ராஜீவின் காங்கிரஸ் கட்சி. தேவிலால் துணை பிரதமராகவே நீடித்தார். 1979ல் சரண்சிங் பிரதமரானது போலவே, பத்து ஆண்டுகள் கழித்து அதே காட்சிகள் அரங்கேறின. கதாபாத்திரங்கள் மட்டும் மாற்றம். அன்று இந்திரா, இப்போது அவது மகன் ராஜீவ். அப்போது சரண்சிங் இப்போது அவரது சீடர் சந்திரசேகர். அப்போது மொரார்ஜி பதவியிழந்து அரசியல் ஓய்வு பெற்றார். இப்போது அந்த இடத்தில் விபி சிங்.



சரண்சிங் அரசு போலவே ஆறே மாதத்தில் சந்திரசேகர் அரசும் ஆறே மாதத்தில் கவிழ்ந்தது. ராஜீவை உளவு பார்த்ததாக கூறி ஆதரவை வாபஸ் பெற்றது, காங்கிரஸ். இதனால், 1991 மார்ச் மாதம் தனது பதவியை ராஜினாமா செய்தார், சநதிரசேகர். ஒன்றரை ஆண்டுகளிலேயே அடுத்த பொதுத் தேர்தலை நாடு சந்தித்தது. 1991 மே மாதத்தில் நாடாளுமன்ற தேர்தல் அறிவிக்கப்பட்டது. 'காங்கிரசால் மட்டுமே ஐந்தாண்டு நிலையான ஆட்சியை தர முடியும்' என்ற கோஷம் முன் வைக்கப்பட்டது.

இதற்கிடையே பதவியில் இருந்த ஆறு மாதத்துக்குள் சட்டம் ஒழுங்கை காரணம் காட்டி தமிழகத்தில் திமுக ஆட்சியை கலைத்திருந்தது, சந்திரசேகர் அரசு. ஜெயலலிதா கோரிக்கையை ராஜீவின் பரிந்துரையின் பேரில் சந்திரசேகர் நிறைவேற்ற, அதற்கு ஒப்புதல் அளித்தார், அப்போதைய ஜனாதிபதி வெங்கட்ராமன். இதனால் 1991 நாடாளுமன்ற தேர்தலுடன் சேர்ந்து தமிழக சட்டப்பேரவை தேர்தலும் நடந்தது. தமிழக தேர்தல் களத்தில் நடந்த அந்த பயங்கரம், நாட்டையே அதிர்ச்சிக்குள்ளாக்கியது.

(நினைவுகள் சுழலும்)

- நெல்லை ரவீந்திரன்

Wednesday, 15 May 2019

நாடாளுமன்ற தேர்தல் 23

ராஜீவ் காந்திக்கு எதிராக தேர்தலுக்கு முன்பே எதிர்க்கட்சிகள் ஒன்று திரண்டு ஜனதா தளம் தலைமையில் தேசிய முன்னணி என்ற கூட்டணியை உருவாக்கி சந்தித்த நாடாளுமன்ற தேர்தல், 1989 நவம்பரில் நடைபெற்றது. தேர்தல் முடிவுகள் ராஜீவின் காங்கிரசுக்கு பலத்த அதிர்ச்சியை கொடுத்தது. 1984 தேர்தலில் 400க்கு மேல் வென்ற காங்கிரசுக்கு இந்த தேர்தலில் 195 இடங்களே கிடைத்தது. தனது சொந்த செல்வாக்கில் சந்தித்த ஒரே தேர்தலில், ராஜீவ் தோல்வியடைந்தார் என்ற வரலாறை, இந்திய தேர்தல் களம் தனதாக்கிக் கொண்டது. ஆனாலும் நாடாளுமன்றத்தில் அதிக இடங்களை பெற்ற கட்சி காங்கிரஸ்தான். தமிழகம், ஆந்திரா என தென் மாநிலங்கள், வழக்கம்போல காங்கிரசுக்கு கை கொடுத்திருந்தன. ஆனால்,  ஆட்சியமைக்க 272 பேர் தேவை.

மறுபுறம் ராஜீவுக்கு எதிராக அமைத்த தேசிய ஜனநாயக கூட்டணியில் ஜனதாதளம் 142 இடங்களுடன் இரண்டாவது பெரிய கட்சியாக வென்றது. அந்த கூட்டணியின் முக்கிய பங்காளியான தெலுங்கு தேசம் 2 இடத்தில்தான் வென்றது. திமுக ஒன்றில் கூட வெற்றி பெறவில்லை. தமிழகத்தில் ஆட்சியில் திமுக இருந்த போதிலும், 1989 நாடாளுமன்ற தேர்தலுக்கு சில மாதங்களுக்கு முன்னதாக, ஜெயலலிதா தலைமையில் ஒன்று சேர்ந்த அதிமுக மற்றும் காங்கிரஸ் கூட்டணி, புதுச்சேரியையும் சேர்த்து 39 இடங்களில் வென்றது. திமுக அணியில் நாகை தொகுதியில் வலது கம்யூனிஸ்ட் மட்டும் வென்றது.

கடந்த தேர்தலில் 2 இடங்களை பெற்றிருந்த பாஜக, இந்த தேர்தலில் 89 இடங்களை பிடித்தது. இது தவிர மார்க்சிஸ்ட் 34 உட்பட இடதுசாரி கட்சிகளும் கணிசமான இடங்களை பிடித்தது. இதையடுத்து, எதிர்க்கட்சிகள் ஒன்று சேர்ந்து தேசிய முன்னணி கூட்டணியின் தலைவரான விபி சிங்கை பிரதமராக தேர்வு செய்தன. தேசிய முன்னணி கூட்டணி ஆட்சி அமைத்தது. சுதந்திர இந்தியாவில் முதலாவது சிறுபான்மை அரசு இதுதான். பல கட்சிகள் ஒன்று சேர்ந்து அமைத்த அரசும் இதுதான்.



150க்கு சற்று அதிகமான எம்பிக்களின் ஆதரவுடன் ஆட்சியமைத்த  விபி சிங் அரசுக்கு பாஜகவும் இடதுசாரி கட்சிகளும் ஆட்சியில் பங்கேற்காமல் வெளியில் இருந்தபடி ஆதரவை அளித்தன. அந்த வகையில் பாஜக மற்றும் கம்யூனிஸ்டுகளை ஒரே புள்ளியில் இணைத்த ஒரே அரசும் விபி சிங் அரசுதான். தேசிய முன்னணியில் இருந்த எல்லா கட்சிகளுக்கும் அமைச்சர் பதவி அளித்தார், விபி சிங். கூட்டணிக்குள் குழப்பம் ஏற்படாமல் தவிர்க்க துணை பிரதமர் பதவி, ஜனதா தளம் தலைவர்களில் ஒருவரான தேவிலாலுக்கு கொடுக்கப்பட்டது.



ஒரு இடத்தில் கூட வெற்றி பெறாவிட்டாலும் மாநிலங்களவை திமுக உறுப்பினராக இருந்த முரசொலி மாறனுக்கு நகர்ப்புற வளர்ச்சி துறை அமைச்சர் பதவி வழங்கினார். அவர்தான் திமுக சார்பாக பதவியேற்ற முதலாவது மத்திய அமைச்சர். 1977ம் ஆண்டிலேயே மத்திய அமைச்சரவையில் அதிமுக இடம் பெற்றதை இங்கே நினைவில் கொள்ளலாம். 

இப்படியாக பாஜக, இடதுசாரி ஆதரவோடு 1989 டிசம்பர் 2ம் தேதி பதவியேற்ற விபி சிங் அரசு, அடுத்த ஓராண்டு கூட முழுமையாக நிலைக்கவில்லை. அடுத்த ஒன்றரை ஆண்டுகளில் அடுத்த பொதுத் தேர்தலை நாடு சந்தித்தது. அதற்குள் பல அரசியல் அதிர்ச்சிகளும் குழப்பங்களும்...

(நினைவுகள் சுழலும்)

- நெல்லை ரவீந்திரன்

Monday, 13 May 2019

நாடாளுமன்ற தேர்தல் -22

1984 நாடாளுமன்ற தேர்தல் மற்றும் சட்டப்பேரவை தேர்தல் முடிந்த 3 ஆண்டுகளில் எம்ஜிஆர் மறைந்தார். இப்போது போலவே, அதிமுக பிளவுபட்டதோடு இரட்டை இலை சின்னம் முடக்கப்பட்டு பின்னர் கட்சி ஒன்று சேர்ந்து சின்னமும் மீட்கப்பட்டது. இப்போது போலவே அப்போதும் இந்த முயற்சிகளுக்கு பக்கபலமாக இருந்தது, அன்றைய மத்திய அரசு. அதாவது ராஜீவ் தலைமையிலான மத்திய அரசு. இப்படியாக 1984 முதல் 1989 நாடாளுமன்ற தேர்தலுக்குள் அதிமுகவில் குழப்பம் ஏற்பட்டு, ஜெயலலிதா தலைமையில் மீண்டும் கட்சி ஒன்று சேர்ந்தது.


 (இந்த விபரங்களை எனது தமிழக சட்டப்பேரவை தேர்தல் வரலாறு பதிவில் பார்க்கலாம் http://thileeban81.blogspot.com/2016/04/?m=1)


அதிமுக அணிகள் இணைப்புக்கு முன்னதாக 1989 நாடாளுமன்ற தேர்தலுக்கு சில மாதங்களுக்கு முன் இரட்டை இலை சின்னம் இல்லாமலேயே நடந்த தமிழக தேர்தலில் திமுக வென்று, 12 ஆண்டுகளுக்கு பிறகு மீண்டும் முதல்வரானார், கருணாநிதி.


அதே நேரத்தில், 1984 தேர்தலில் மிகப்பெரிய வெற்றியை பெற்ற ராஜீவ்காந்தி அரசின் மீது,  போபார்ஸ் ராணுவ பீரங்கி ஊழல் புகார் எழுந்தபோது அந்த ஆட்சியின் முடிவுரை வரையப்பட்டு, இந்தியாவின் முதலாவது பல கட்சிகளின் கூட்டணி ஆட்சி முறைக்கு முகவுரை எழுதப்பட்டது. ராஜீவ் அமைச்சரவையில் நிதி மற்றும் ராணுவ அமைச்சராக இருந்த விபி சிங் எழுப்பிய இந்த புகாரால் பதவி பறிக்கப்பட்டு கட்சியில் இருந்தும் நீக்கப்பட்டார். எதிர்க்கட்சிகளின் பிரச்சார பீரங்கியாக போபார்ஸ் பேர ஊழல் மாறியது.



நாடாளுமன்ற கூட்டுக்குழு அறிக்கையை அவையிலேயே கிழித்து எறிந்து ஆவேசமாக பேசினார், காங்கிரஸ் கூட்டணியான அதிமுகவை சேர்ந்த எம்பி ஆலடி அருணா. பாஜக, இடதுசாரிகள், திமுக, தெலுங்கு தேசம், அசாம் கண பரிசத் என ஏராளமான கட்சிகளும் ராஜீவுக்கு எதிராக அகில இந்திய அளவில் ஒன்று திரண்டன. இதற்கிடையே, இலங்கையில் அமைதி ஏற்படுத்துவதாக கூறி, ராஜீவ் அனுப்பிய இந்திய ராணுவம், அங்குள்ள தமிழர்களையும் விடுதலைப் புலிகளையும் பகைத்ததால் எழுந்த கோபமும் அவர் மீது சேர்ந்தது.

ராஜீவுக்கு மாமா உறவு முறை கொண்டவரான அன்றைய பிரபல தலைவர்களில் ஒருவரான அருண் நேருவும் அவருக்கு எதிராக இருந்தார்.

இப்படியான சூழலில் காங்கிரசில் இருந்து வெளியேற்றப்பட்ட விபி சிங், அருண் நேருவுடன் சேர்ந்து 'ஜன மோர்ச்சா' என்ற கட்சியை தொடங்கினார். பிறகு ஜனதாதளம் கட்சியுடன் இணைந்தார். மறுபுறம், ராஜீவுக்கு எதிரான கட்சிகளை ஒன்றிணைக்கும் பணியை தொடங்கினார், தெலுங்கு தேசம் தலைவர் ராமாராவ். அந்த முயற்சியின் விளைவாக தோன்றியது தேசிய முன்னணி என்ற பல கட்சி கூட்டணி.



திமுக, தெலுங்கு தேசம், அசாம் கணபரிசத், ஜனதா தளம், ராஷ்டிரிய ஜனதா தளம் என பல கட்சிகள் அமைத்த தேசிய முன்னணி கூட்டணியின் தலைவராக, விபி சிங் தேர்வானார். கூட்டணியின் ஒருங்கிணைப்பாளர் ராமாராவ். போபர்ஸ் என்ற ஒற்றைச் சொல்லே ராஜீவுக்கு எதிராக இந்திய அளவில் கட்சிகள் ஒன்று திரள வழி வகுத்தது. 1989 தேர்தலில் ராஜீவை வீழ்த்த வேண்டும் என்ற ஒற்றை அஜென்டாவுடன் தயாரானது, தேசிய முன்னணி கூட்டணி. அவர்கள் எதிர்பார்த்தபடியே 1989 நாடாளுமன்ற தேர்தலும் வந்தது. அதன் முடிவுகள் இரு தரப்புக்குமே அதிர்ச்சி கலந்த ஆச்சரியத்தை அளித்தன.

(நினைவுகள் சுழலும்)

- நெல்லை ரவீந்திரன்

Sunday, 5 May 2019

நாடாளுமன்ற தேர்தல் -21

 இந்திரா காந்தி கொல்லப்பட்டு சரியாக 60 நாட்களுக்குள் 1984 டிசம்பர் இறுதி வாரங்களில் நாடாளுமன்ற தேர்தல் நடைபெற்றது. அசாம் மற்றும் பஞ்சாப் மாநிலங்களை தவிர்த்து மற்ற இடங்களில் நடந்த அந்த தேர்தலில் ராஜீவ் தலைமையிலான காங்கிரஸ் கட்சி 404 இடங்களை வென்று மிகப்பெரிய வெற்றியை பெற்றது. அதன்பிறகு இரண்டு மாநில தொகுதிகளில் 10ஐ காங்கிரஸ் கைப்பற்றியது. இந்திரா காந்தியின் அனுதாப அலையில் மற்ற கட்சிகள் காணாமல் போயின.

ஜனசங்கத்தில் இருந்து மாறிய பிறகு, பாஜக போட்டியிட்ட அந்த முதல் தேர்தலில் வெறும் 2 இடங்களில் மட்டுமே வென்றது. கம்யூனிஸ்ட் உள்ளிட்ட மற்ற தேசிய கட்சிகளின் நிலையும் அப்படியே. ஆனால், இந்திரா காந்தி அனுதாப அலையிலும் கூட,  ஆந்திராவில் என்டி ராமாராவ் தலைமையிலான தெலுங்கு தேசம் கட்சி 30 இடங்களை வென்று, அகில இந்திய அளவில் 2ம் இடத்தை பிடித்தது. 



சுதந்திர இந்தியாவில் மாநில கட்சி ஒன்று இரண்டாம் இடத்தை பிடித்தது அதுவே முதன்முறை. தற்போதைய மக்களவையில் அதிமுக 37, திரிணாமுல் காங்கிரஸ் 39 என நான்காவது, மூன்றாவது பெரிய கட்சிகளாக இருப்பதை இங்கே குறிப்பிடுவது அவசியம். இதற்கு என்டிஆர் தான் முன் உதாரணம்.


இது ஒருபுறம் இருக்க, தமிழகத்தில் எம்ஜிஆர் நோய்வாய்ப்பட்டு இருந்ததால் அந்த அனுதாப அலையும் சேர்ந்தது. 'எம்ஜிஆர் ஃபார்முலா' அடிப்படையில் உருவான அதிமுக காங்கிரஸ் கூட்டணி, வரலாறு காணாத மிகப்பெரிய வெற்றியை பதிவு செய்தது. நாடாளுமன்ற தேர்தல், தமிழக சட்டப்பேரவை தேர்தல் இரண்டிலும் இந்த கூட்டணி வென்றது. மொத்தம் உள்ள 39 மக்களவை தொகுதிகளில் 37ஐ (அதிமுக -12, காங்கிரஸ் - 25) இந்த கூட்டணி கைப்பற்றியது. இரண்டு இடங்களை மட்டுமே திமுக பிடித்தது.

நாடாளுமன்ற தேர்தலுடன், 1984 டிசம்பர் 24ல் நடந்த தமிழக சட்டப்பேரவை தேர்தலில் 195 இடங்களை (அதிமுக 132, காங்கிரஸ் 61, குமரிஅனந்தனின் காந்தி காமராஜ் தேசிய காங்கிரஸ் 2) அதிமுக கூட்டணி வென்று, தமிழக அரசியல் வரலாற்றில் தொடர்ந்து மூன்றாவது முறையாக முதல்வராகி ஹாட்ரிக் சாதனை படைத்தார் எம்ஜிஆர். இந்த ஹாட்ரிக் சாதனை எம்ஜிஆருக்கு முன்னும் பின்னும் இன்னும் முறியடிக்கப்படவில்லை. நேரடியாக தேர்தல் களம் காணாமல், அமெரிக்காவில் இருந்தபடியே இந்த சாதனையை படைத்தார், எம்ஜிஆர்.



இப்படியாக தமிழகத்திலும், அகில இந்திய அளவிலும் பல அதிசயங்களை ஏற்படுத்தியது, 1984ம் ஆண்டு தேர்தல். அப்போது, இந்தியாவின் இளம் பிரதமராக அறியப்பட்ட ராஜீவ்காந்தி, தொழில்நுட்பம் உட்பட பல விஷயங்களில் ஆர்வம் காட்டியதோடு, ஐந்து ஆண்டுக்கு ஒருமுறை பஞ்சாயத்து தேர்தல் நடத்துவதை கட்டாயமாக்கும் 'பஞ்சாயத் ராஜ்' சட்டத்தையும் கொண்டு வந்தார். 

ஆனால், 1989ல் நடந்த அடுத்த நாடாளுமன்ற தேர்தல் முடிவுகள் அவருக்கு மிகப் பெரிய அதிர்ச்சியை கொடுத்தது. இந்திய ஆட்சி முறையிலும் புதிய பாதையையும் ஏற்படுத்தி தந்தது.

(நினைவுகள் சுழலும்)

- நெல்லை வை.ரவீந்திரன்

Monday, 29 April 2019

நாடாளுமன்ற தேர்தல் -20

காங்கிரஸ் மூத்த தலைவர்களை வெற்றி பெற்றதில் தொடங்கி, பங்களாதேஷ் நாட்டை உருவாக்கியது, பாகிஸ்தான் போர் வெற்றி, இரண்டாண்டு எமர்ஜென்சி, பிரதமராகவே தோல்வியடைந்த ஒரே நபர் என்ற போதிலும் மீண்டும் வென்று ஆட்சியை கைப்பற்றிய மன உறுதி என வளர்ந்து காலிஸ்தான் தீவிரவாதிகளை பொற்கோயிலுக்குள்ளேயே சென்று துவம்சம் செய்தது வரை பார்த்த இந்திய மக்கள், இந்திராவை வியப்புடன் பார்த்து ஆச்சரியப்பட்டுக் கிடந்தனர். ஆனால் இந்த காலிஸ்தான் தீவிரவாதிகளுக்கு எதிரான துணிச்சல்தான் அவருக்கு முடிவுரையை எழுதியது. 



புளூ ஸ்டார் ஆபரேஷன் முடிந்த நான்கே மாதத்தில் 1984 அக்டோபர் 31ம் தேதியன்று காலை சுட்டுக் கொல்லப்பட்டார் இந்திராகாந்தி. இரும்பு பெண்மணியின் சரித்திரம் அவரது சொந்த மெய்க் காவலர்களான சீக்கிய இனத்தை சேர்ந்த சத்வந்த் சிங், பியாந்த் சிங் என்ற இருவரால் சரிந்தது. இதன் தொடர்ச்சியாக, சீக்கியர்களுக்கு எதிரான கலவரம் மூண்டதில் ஆயிரக்கணக்கானோர் கொல்லப்பட்டனர். இன்னமும் நீடிக்கும் அந்த கலவர வழக்கில் குற்றஞ்சாட்டப்பட்ட காங்கிரஸ் தலைவர்களில் தற்போதைய மத்திய பிரதேச முதல்வர் கமல்நாத்தும் ஒருவர். இது தனியொரு அத்தியாயம்.

இந்திராகாந்தி சுட்டுக் கொல்லப்பட்டதும் புதிய பிரதமரை தேர்வு செய்யும் படலம் காங்கிரஸ கட்சியில் தொடங்கியது. அதில் முன்னணியில் இருந்தவர்களில் பிரணாப் முகர்ஜியும் ஒருவர். ஆனால், சஞ்சய் காந்தி மறைவால் அரசியலுக்கு வந்து அமேதி எம்பி யான ராஜீவ் காந்திக்கு அந்த பதவி வந்து சேர்ந்தது. கட்சியின் ஒற்றுமை என்ற காரணத்தால் அரசியலில் நுழைந்த மூன்றே ஆண்டில் பிரதமர் பதவி தேடிவந்தது ராஜீவ் காந்தி வசம். பிரதமரான சில வாரங்களிலேயே நாடாளுமன்ற தேர்தலை சந்திக்க தயாரானார், ராஜீவ்.

இது ஒருபுறம் இருக்க, தமிழகத்தில் காங்கிரசின் கூட்டணி தலைவரான எம்ஜிஆர், 1984ம் ஆண்டு இறுதியில் கடுமையாக நோய் வாய்ப்பட்டார். சென்னை அப்பலோவில் இருந்து அமெரிக்காவின் புரூக்ளின் மருத்துவமனைக்கு கொண்டு செல்லப்படட எம்ஜிஆருக்கு இந்திரா காந்தியின் மறைவு செய்தி கூட சொல்லப்படவில்லை. ஆம். இந்திராவின் இறுதிச் சடங்கின்போது அமெரிக்காவில் இருந்தார் எம்ஜிஆர்.



இதற்கிடையே, நாடாளுமன்ற தேர்தலை சந்திக்க ராஜீவ் காந்தி தயாரானதால், தமிழக சட்டப்பேரவை தேர்தலையும் ஆறு மாதங்களுக்கு முன்பே எதிர்கொள்ள தீர்மானித்தது, அதிமுக அரசு. 1985 ஜூன் மாதம் வரை ஆட்சியின் பதவிக்காலம் இருந்தது. அப்போதைய இடைக்கால முதல்வர் நெடுஞ்செழியன், மூத்த அமைச்சர் ஆர்எம் வீரப்பன் போன்ற முக்கிய தலைவர்களின் ஆலோசனையை தொடர்ந்து இரண்டு தேர்தலையும் சேர்த்து எதிர்கொள்ள தமிழகம் தயாரானது. 

1984ம் ஆண்டின் இறுதி நாட்களில் நடந்த அந்த தேர்தல்களின் போது, புரட்சித் தலைவர் எம்ஜிஆர், நேரடியாக தேர்தல் களத்தில் இல்லை. 

இரும்பு மனுஷி இந்திரா காந்தியோ இந்த உலகிலேயே இல்லை. ஆனால், இருவரும் தான் அந்த தேர்தலின் பிரதானமாக இருந்தனர். இப்படியொரு சூழ்நிலையில் 1984ம் ஆண்டு தேர்தலை காங்கிரசும் அதிமுகவும் சந்தித்தன. 

(நினைவுகள் சுழலும்)

- வை.ரவீந்திரன்

Saturday, 27 April 2019

நாடாளுமன்ற தேர்தல் -19

1980 தேர்தலுக்கு பிந்தைய அரசியல் சூழல்கள், அதிமுக காங்கிரஸ் இடையிலான பந்தத்தை உறுதி செய்தன. 'மத்தியில் காங்கிரஸ், மாநிலத்தில் அதிமுக' என்பதே அந்த பந்தத்தின் பிரதான அம்சம். நாடாளுமன்ற தேர்தலாக இருந்தால் மூன்றில் இரண்டு பங்கு தொகுதிகள் காங்கிரசுக்கும் சட்டப்பேரவையாக இருந்தால் மூன்றில் இரண்டு பங்கு அதிமுகவுக்கும் ஒதுக்கப்படும் என்பதே அந்த ஒப்பந்தம். இவ்வாறாக, கூட்டணி நீடிக்க இந்திரா காந்தியும் எம்ஜிஆரும் செல்வாக்கு மிகுந்த தலைவர்களாக உயர்ந்தனர்.

இவ்வாறாக, அடுத்த தேர்தலை நோக்கி சென்றது. அந்த தேர்தலுக்கு முன்னால் ஒரு பயங்கர சம்பவம் நடந்தது. அதற்கு 'காலிஸ்தான்' என்ற இயக்கம் பற்றி சில வரிகள் தெரிந்து கொள்வது நல்லது. பஞ்சாப், அரியானா உட்பட சீக்கியர்களின் பூமியை தனி நாடாக அறிவிக்க கோரி 1970களில் உருவானது தான் 'காலிஸ்தான்' இயக்கம். வெளிநாடுவாழ் சீக்கியர்கள் துணையோடு உருவான இந்த இயக்கத்தை பாகிஸ்தானும் ஊக்குவித்ததாக கூறுவது உண்டு. 



இப்போது காஷ்மீர் போல, அப்போது பஞ்சாபும் இந்தியாவின் தலைவலி. நாடாளுமன்ற தேர்தல் கூட தனியாகவே நடக்கும் அல்லது பல மாதங்கள் நடக்காமலே கூட இருந்தது உண்டு.  காலிஸ்தான் தீவிரவாதிகளின் வன்முறைக்கு அளவில்லை என்பதை சொல்லி தெரிய வேண்டியதில்லை. இந்த சூழ்நிலையில் தான், அதன் தளபதி பிந்தரன் வாலே, சீக்கியர்களின் புனித தலமான பொற்கோவிலுக்குள் இருந்தபடி வன்முறையை அரங்கேற்ற தொடங்கினார்.



இதனால், காலிஸ்தான் தலைமை பீடமாக பொற்கோவில் மாறி வருவதை தடுப்பதற்கான நடவடிக்கையை தொடங்கினார், பிரதமர் இந்திரா காந்தி. 'ஆபரேசன் புளு ஸ்டார்' என்ற பெயரில் பொற்கோவில் முன் ராணுவத்தை நிறுத்தினார். கோவிலுக்குள் இருந்த தீவிரவாதிகளை சரணடைய சொன்ன ராணுவததின் எச்சரிக்கை பலனளிக்கவில்லை. இந்திரா உத்தரவின் பேரில், பொற்கோவிலுக்குள் நுழைந்தது ராணுவம்.



1984 ஜூன் முதல் தேதியில் இருந்து எட்டு நாட்கள் கோவிலுக்குள் முகாமிட்டு, உள்ளிருந்த தீவிரவாதிகளை துவம்சம் செய்தது இந்திய ராணுவம். புனிதமான பொற்கோவிலுக்குள் ரத்த ஆறா...? என கொதித்தது சீக்கியர்களின் உள்ளம். இதனால் விளைந்தது, இந்தியா அதுவரை காணாத ஒரு அதிர்ச்சிகரமான துயரம். அது...?

(நினைவுகள் சுழலும்)

- நெல்லை ரவீந்திரன்

Thursday, 25 April 2019

நாடாளுமன்ற தேர்தல் -18

1980ம் ஆண்டு நடந்த நாடாளுமன்ற பொதுத் தேர்தலில் இந்திரா காந்தி பிரமாண்டமான வெற்றியை பெற, அப்போதைய பிரதமர் சரண்சிங்கின் ஜனதா கட்சி 41 இடங்களையும் சந்திரசேகரின் ஜனதா கட்சி 31 இடங்களையும் மட்டுமே பெற்றன. இது தவிர மார்க்சிஸ்ட் 37 இடங்களை வென்றிருந்தது. தமிழகத்தில் காங்கிரஸ் அணியில் இருந்த திமுக 16 இடங்களை கைபபற்றியது. ஆளுங்கட்சியான எம்ஜிஆரின் அதிமுக சிவகாசி, கோபி என இரண்டு தொகுதிகளில் மட்டுமே வென்றது.

இந்த வெற்றியின் களிப்பால், இந்திரா கந்தி பாரதமரான உடனேயே ஆட்சி கலைப்பு அரங்கேறியது. கருணாநிதியின் நெருக்கடியால் எம்ஜிஆர் ஆட்சியை கலைத்தார் இந்திராகாந்தி. அப்போதெல்லாம் 356 சட்டப்பிரிவை பயன்படுத்தி ஆட்சியை கலைப்பது சாதாரணமான நிகழ்வுகளாக இருந்து. இதனால், தமிழக மக்கள் மறுபடியும் ஒரு தேர்தலை சந்தித்தனர்.

1980 ஜனவரியில்  நாடாளுமன்ற தேர்தல் முடிந்த நிலையில் மே மாதம் தமிழக சட்டப்பேரவை தேர்தல் நடந்தது. இந்த தேர்தலில் தலா 114 என தொகுதிப் பங்கீட்டோடு களமிறங்கின, திமுக காங்கிரஸ் அணி. அதில் முஸ்லிம் லீக்குக்கு 6 இடங்கள் ஒதுக்கப்பட்டன. அதிமுக அணியில் மார்க்சிஸ்ட், குமரி அனந்தனின் காந்தி காமராஜ் தேசிய காங்கிரஸ் கட்சிகள் இருந்தன.

ஆனால், திமுகவின் கணக்கு பொய்யானது. ஜனவரி நாடாளுமன்ற தேர்தலில், இந்திராவை ஆதரித்த தமிழக மக்கள் மே மாத சட்டப்பேரவை தேர்தலில் அம்ஜிஆரையே மீண்டும் தேர்வு செய்தனர். இந்த தேர்தல் முடிவில் அதிமுக கூட்டணி 162 இடங்களை பிடித்தது. அதிமுக மட்டும் 129 இடங்களுடன் தனிப் பெரும்பான்மை பெற்றது. தலா 114ல் களமிறங்கிய  திமுகவுக்கு 37 காங்கிரசுக்கு 31 என வெற்றி கிடைத்தது.



மூன்றே மாதங்களில் நிகழ்ந்த இந்த மாற்றத்தை பார்த்து ஆச்சரியமடைந்த இந்திரா காந்தி, அதன்பிறகு எம்ஜிஆருடன் நட்பு பாராட்டினார். மத்திய அரசின் உதவி தேவை என்பதால் முதல்வர் எம்ஜிஆரும் நட்புக்கரம் நீட்டினார். இந்த நட்பானது அடுத்த 16 ஆண்டு காலத்துக்கு அதிமுக காங்கிரஸ் கூட்டணிக்கு அச்சாரமானது.

இந்த காலகட்டத்தில் தான், 1980ல் அமேதி தொகுதியில் வென்ற இந்திராவின் இளைய மகன் சஞ்சய் காந்தி அகால மரணம் அடைந்தார். அந்த தொகுதிக்கு 1981ல் நடந்த இடைத்தேர்தல் மூலமாக அரசியலில் காலடி எடுத்து வைத்தார் விமானியாக இருந்த இந்திராவின் மூத்த மகன் ராஜீவ் காந்தி. 



இப்படியாக அரசியல்களம் பல மாற்றங்களை சந்தித்த நிலையில், எம்ஜிஆரும் இந்திராவும் அசைக்க முடியாத தலைவர்களாக மாறிக் கொண்டு இருந்தனர். அவர்கள் தான், 1984 நாடாளுமன்ற தேர்தலின் மையமாக இருநதனர்.

(நினைவுகள் சுழலும்)

- நெல்லை ரவீந்திரன்

Monday, 22 April 2019

நாடாளுமன்ற தேர்தல் 17

 கருத்து வேறுபாடு, அதிகார போட்டிகளால் இந்தியாவின் முதலாவது கூட்டணி அரசு, முழுமையாக கரை சேராமல் பாதியிலேயே கவிழ்ந்தது. 1977ல் பதவிக்கு வந்த ஜனதா அரசு கவிழ்ந்ததால் மூன்றே ஆண்டுகளில் நாடாளுமன்ற பொதுத் தேர்தல் வந்தது. 1980 ஜனவரியில் நடந்த அந்த தேர்தலின்போது, 1977ல் பிரதமராக இருந்தபோதே  ரேபரேலி தொகுதியில் தோல்வியடைந்த அனுபவத்தை இந்திரா காந்தி மறக்கவில்லை. அதனால்,  தென்னிந்தியாவையே தனது பாதுகாப்பு பிரதேசமாக பார்த்தார்.

1978 இடைத்தேர்தல் மூலமாக கர்நாடகாவின் சிக்மகளூருவில் வென்ற அவர், 1980ல் ஆந்திர மாநிலம் மேடக் தொகுதியை தேர்வு செய்தார். முந்தைய தேர்தலில் பலமாக இருந்த எதிர்க்கட்சிகள் இந்த முறை சிதறிக் கிடந்தன. 85 வயதை எட்டிய மொரார்ஜி தேசாயும் களத்தில் இல்லை. ஆனாலும் சரண்சிங், சந்திரசேகர் என 1980 தேர்தல் களம் சூடாகவே தகித்தது.



தமிழகத்தில் 1977 தேர்தலில் ஜனதாவுடன் இருந்து இந்திராவை மிகக்கடுமையாக விமர்சித்த திமுக 1980ல் இந்திரா காங்கிரசுடன் கூட்டணி அமைத்தது. அதுவும் காங்கிரசுக்கு 22 தொகுதிகளை திமுக ஒதுக்கியது. எம்ஜிஆரின் செல்வாக்கு வளர்ந்ததே இதற்கு காரணம். அதே நேரத்தில் நெருக்கடி நிலையின்போதே இந்திராவுடன் கூட்டணி அமைத்திருந்த எம்ஜிஆர், இந்த தேர்தலில் சரண்சிங்கின் ஜனதா அணியில் சேர்ந்திருந்தார்.

மிகவும் பரபரப்பான இந்த தேர்தலில் இந்திராகாந்தி எதிர்பார்த்தபடியே தென் மாநிலங்கள் அவரை கைவிடவில்லை. எதிர்க்கட்சி தலைவர்களின் அதிகார போட்டியை பார்த்து வெறுத்துப் போயிருந்த இந்திய மக்களுக்கு இரும்பு பெண்மணியாக  இந்திரா காந்தி தெரிந்தார். அவரது நெருக்கடி நிலை கால அனுபவங்களை மூன்றே ஆண்டுகளில் மறந்து அவரையே மீண்டும் கொண்டாடினார்கள். ஏகபோக வெற்றியை ருசித்தது காங்கிரஸ். அகில இந்திய அளவில் 374 இடங்களை காங்கிரஸ் வென்று மீண்டும் பிரதமரானார் இந்திராகாந்தி. தமிழகத்தில் காங்கிரஸ் திமுக கூட்டணி 37 இடங்களை பெற்றது. இதன் விளைவு அடுத்தடுத்த நாட்களில் தமிழக அரசியலில் வெப்பம் கூட்டியது.

(நினைவுகள் சுழலும்)

- நெல்லை ரவீந்திரன்

Friday, 8 March 2019

நாடாளுமன்ற தேர்தல் - 8

இந்திய பிரதமராக 1966ல் பதவியேற்ற சில மாதங்களிலேயே காங்கிரஸ் மூத்த தலைவர்களின் அதிருப்தியை இந்திரா ஏராளமாக சம்பாதிக்கத் தொடங்கினார். ஏற்கனவே நேருவின் போக்கால் பத்து ஆண்டுகளுக்கு முன் தனிக்கட்சியை ராஜாஜி தொடங்கியது போலவே, இந்திராவுக்கு எதிரான மனநிலைக்கு மொரார்ஜி தேசாய், நிஜலிங்கப்பா போன்ற மூத்த தலைவர்கள் வந்திருந்தனர்.

கம்யூனிஸ்டை போலவே இந்தியாவின் முதல் பெரிய கட்சியும் பிளவை நோக்கிய பாதையில் பயணம் செய்தது. இத்தகைய சூழ்நிலையில் இந்தியாவின் 4வது பொதுத்தேர்தல் நெருங்கியது. இதற்குள் பாண்டிச்சேரி போன்ற மாநிலங்கள் இந்திய குடியரசுக்குள் முழுமையாக வந்திருந்தன. 1967ம் ஆண்டு நடந்த அந்த தேர்தலில், லோக்சபா இடங்களின் எண்ணிக்கை 26 அதிகரித்து 520 ஆக உயர்ந்திருந்தது.

இரண்டு நாடுகளுடன் நடந்த போர்கள். காங்கிரஸ் கட்சியின் இரண்டு பிரதமர்களின் மறைவு. நேருவின் வாரிசு இந்திரா அறிமுகம் என பல சாதகங்களுடன் தேர்தலை சந்தித்தாலும் 1967 தேர்தல் காஙகிரசுக்கு இனிமையானதாக இல்லை என்றே கூறலாம்.



காங்கிரஸ் கட்சி மீதான இந்திய மக்களின் மயக்கமும் இந்த தேர்தலில் மெதுவாக தெளியத் தொடங்கியது. இருபது ஆண்டுகளாக ஏகபோகமாக இருந்த காங்கிரசின் ஆதிக்கம் சரிய தொடங்கியது.

நாடாளுமன்றத்தோடு மாநில சட்டப்பேரவைகளுக்கும் சேர்த்து மொத்தமாக தேர்தல் நடைபெற்றது. தமிழகம் உட்பட பல மாநிலங்களில் காங்கிரஸ் கட்சிக்கு அதிர்ச்சியையும் காமராஜருக்கு பேரதிர்ச்சியையும் தந்தது 1967ம் ஆண்டு தேர்தல்.

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் - 7


1962 தேர்தல் முடிந்து 1967 தேர்தலுக்குள் 5 ஆண்டுகளில் கட்சிகளில், ஆட்சியில் ஏராளமான மாற்றங்கள். எல்லாவற்றுக்கும் மேல் இரண்டு போர்களை இந்த ஐந்து ஆண்டுகளுக்குள் இந்தியா பார்த்தது. பதினைந்து ஆண்டுகளாக ஒரே பிரதமர் இருந்த நாட்டில் ஐந்து ஆண்டுகளில் 4 பிரதமர்கள் ஆட்சி செய்தார்கள். கிங் மேக்கராக காமராஜர் உயர்ந்ததும் இந்த 5 ஆண்டில் தான்.

1962 பிப்ரவரியில் தேர்தல் முடிந்த சில மாதங்களில் சீனாவுடன் போர் மேகம் சூழ்ந்தது. அக்டோபரில் அது போராக வெடித்தது. சுமார் 35 நாட்களுக்கு இந்தியா - சீனா போர் நடைபெற்றது. இந்த போர் முடிந்த இரண்டு ஆண்டுகளிலேயே அதன் நீட்சியாக மற்றொரு போர் மேகம் இந்தியாவை சூழ்ந்தது. 1965ம் ஆண்டில் இந்தியா, பாகிஸ்தான் இடையே ஒரு யுத்தம் தொடங்கியது.

இது ஒருபுறம் இருக்க, அதுவரையிலும் இந்தியாவின் இரண்டாவது பெரிய கட்சியாக இருந்து வந்த கம்யூனிஸ்ட் கட்சி பிளவுபட்டது. 1964ம் ஆண்டில் இந்திய கம்யூனிஸ்ட் கட்சியில் இருந்து மார்க்சிஸ்ட் கம்யூனிஸ்ட் கட்சி உருவானது.

1964ம் ஆண்டில் நேரு மறைந்ததும் காங்கிரஸ் கட்சியில் அடுத்தடுத்து பிரச்னைகள் உருவாகின. முன்னதாக, கட்சிக்குள் ஒருவருக்கு ஒரு பதவி என 'கே' பிளானை அறிமுகப்படுத்தியதோடு, தமிழக முதல்வர் பதவியையும் ராஜினாமா செய்தார், காமராஜர். தேசிய அரசியலுக்குள் காமராஜர் நுழைந்ததும் தமிழகத்தில் காங்கிரஸ் சரிவை நோக்கி பயணித்தது.



நேரு மறைவுக்கு பிறகு, இடைக்கால பிரதமராக குல்சாரிலால் நந்தா பதவியேற்றார். இரண்டு வாரங்களில் காமராஜர் தலையீட்டால் லால்பகதூர் சாஸ்திரி பிரதமரானார். அவரும் பாகிஸ்தான் போர் முடிந்த சில வாரங்களில் 1966ல் மறைந்தார். மீண்டும் இடைக்கால பிரதமராக குல்சாரிலால் நந்தா பதவியேற்க அடுத்த பிரதமர் தேடுதல் தொடங்கியது.



கட்சிக்குள் மூத்த தலைவர்கள் பலருக்குள் கடும் போட்டி. இறுதியாக, காமராஜரின் முயற்சியால் நேருவின் மகள் இந்திராகாந்தி பிரதமரானார். மொரார்ஜி தேசாய் துணை பிரதமராக பதவியேற்றார். இதுபோன்ற ஏராளமான சிக்கல்களுக்கிடையே 1967 தேர்தல் நெருங்கியது.

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் - 6

சுதந்திர இந்தியாவின் 3வது பொதுத் தேர்தலுக்கு முன்னும் பின்னும் பெரிய அரசியல் நிகழ்வுகள் அரங்கேறின. ஆளுங்கட்சியான காங்கிரசில் நேருவின் ஆதிக்கம் மிக அதிகமாக இருப்பதாக கூறி, தேர்தலுக்கு முன்னதாக 1959ல் தனிக்கட்சியை தொடங்கினார் ராஜாஜி. அதுதான் சுதந்திரா கட்சி. காமராஜரின் கை ஓங்கியதும் கூட ராஜாஜியின் முடிவுக்கு காரணம். 1954ல் சென்னை மாகாண முதல்வரான காமராஜரின் செல்வாக்கு தேசிய அளவில் அதிகரிக்கத் தொடங்கியது.



இதுபோல, தேர்தலுக்கு பின், இந்தியாவின் இரண்டாவது பெரிய கட்சியான இந்திய கம்யூனிஸ்டில் பிளவு ஏற்பட்டு 1964ல் மார்க்சிஸ்ட் கம்யூனிஸ்ட் தோன்றியது.
அதுவரையிலும் இருந்த இரட்டை உறுப்பினர்கள் தொகுதி முறை ஒழிக்கப்பட்டு முதன்முறையாக தொகுதிக்கு ஒரு எம்பி என 1962 தேர்தலில் தேர்வு செய்யப்பட்டனர். மொத்தம் 494 இடங்களுக்கு எம்பிக்கள் தேர்வு செய்யப்பட்டனர். இதில், 361 இடங்களை காங்கிரஸ் கட்சி கைப்பற்றி மூன்றாவது முறையாக பிரதமராக தேர்வானார், நேரு.

இந்திய கம்யூனிஸ்ட் 29, ராஜாஜியின் சுதந்திரா கட்சி 18, ஜனசங்கம் 14, சுயேச்சைகள் 20 என டபுள் டிஜிட் வெற்றிகள் ஏராளம். முதன் முறையாக அங்கீகரிக்கப்பட்ட கட்சியாக பாராளுமன்றத்துக்குள் நுழைந்தது, திமுக. அந்த கட்சியில் 7 பேர் எம்பிக்களாக வெற்றி பெற்றனர்.

சென்னை மாகாணத்தில் மொத்தம் இருந்த 41 தொகுதிகளில் 31 தொகுதிகளை காமராஜர் தலைமையில் காங்கிரஸ் கட்சி அள்ளியது. திமுக 7 இடங்களிலும் இந்திய கம்யூனிஸ்ட் 2 இடத்திலும் பார்வர்டு பிளாக் ஒரு தொகுதியிலும் வென்றன. காங்கிசுக்கு மாற்றாக இந்திய கம்யூனிஸ்டுக்கு பதில் திமுக தலையெடுத்தது.

1962 பாராளுமன்ற தேர்தலுடன் சென்னை மாகாண சட்டப்பேரவை தேர்தலும் நடைபெற்றது. இதில், திமுக 50 இடங்களை வென்றும் காஞ்சிபுரத்தில் அண்ணா தோல்வியடைந்தார். இதனால், முதன்முறையாக மாநிலங்களவை மூலமாக நாடாளுமன்றத்துக்கு அடி எடுத்து வைத்தார், அண்ணா.

அதே நேரத்தில், நேருவுக்கு எதிராக ராஜாஜி உள்ளிட்ட சில மூத்த தலைவர்கள் களமிறங்கியபோதும் 1962 பொதுத் தேர்தலில் நேருவே வென்று பிரதமரானார். ஆனால், அடுத்த பொதுத் தேர்தலுக்குள் 4 பிரதமர்களை இந்தியா பார்த்தது.

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் - 5

முதல் தேர்தலில் கட்சிகளுக்கு சின்னம் கிடையாது. ஒவ்வொரு கட்சிக்கு ஒவ்வொரு நிறத்தில் பெட்டி இருக்கும். எந்த கட்சிக்கு வாக்களிக்க விருப்பமோ அதற்கான நிற பெட்டியில் வாக்குச் சீட்டை போட வேண்டும். ஆனால், 1957 தேர்தலில் கட்சிகளுக்கு சின்னம் ஒதுக்கப்பட்டது. காங்கிரஸ் கட்சியின் அப்போதைய சின்னம் இரட்டை காளை மாடு. இந்திய கம்யூனிஸ்டுக்கு (அப்போது ஒரே கம்யூனிஸ்ட்) நெல்கதிர் அரிவாள் சின்னம். சுயேச்சைகளுக்கும் தனியாக சின்னங்கள் ஒதுக்கப்பட்டன.


வாக்குச்சீட்டுகளை பெட்டியில் போடும் முறை என்பதால், பெட்டிகளை அப்படியே தூக்கிக் கொண்டு ஓடுவது, பெட்டிக்குள் மையை ஊற்றுவது, வாக்குச் சாவடியையே கைப்பற்றி முறைகேடு செய்வது போன்றவை எல்லாம் பின்னாளில் நடைபெற்ற தேர்தல் சம்பவங்கள். அதுபோன்று சம்பவத்தை முதலில் அறிமுகம் செய்தது 1957 தேர்தல் தான். அறிமுகம் செய்தவர்கள் பீகார்காரர்கள். அந்த மாநிலத்தின் பெகுசராய் மாவட்டத்தில் மதிஹானி சட்டப்பேரவை தொகுதிக்குட்பட்ட ரட்சியாகி கிராமத்தில் தான் சுதந்திர இந்தியாவின் முதலாவது தேர்தல் சம்பவத்தை அரங்கேற்றினார்கள். வாக்குச்சாவடியை கைப்பற்றி முறைகேடு நடந்தது.


ஐந்து ஆண்டுகளுக்கு ஒருமுறை தேர்தல் நடைமுறை ஜரூராக நடந்ததால் 1957ல் அநேக மாநில சட்டப்பேரவை தேர்தல்களும் ஒன்றாக நடைபெற்றன. அதுபோல தமிழகத்திலும் தேர்தல் நடந்தது. அந்த தேர்தலில்தான் முதன் முறையாக தேர்தலை சநதித்தது, திமுக. அங்கீகாரம் பெறவில்ல என்பதால் சுயேச்சை சின்னங்களிலேயே பலர் களமிறங்கினார்கள். சட்டப்பேரவை தேர்தலில் போட்டியிட்ட கருணாநிதி உட்பட பலருக்கு உதயசூரியன் கிடைத்தது. காஞ்சிபுரத்தில் திமுக தலைவர் அண்ணாவுக்கு சேவல் சின்னம்தான் கிடைத்தது.



இந்த தேர்தலில் சென்னை மாகாணத்தின் 34 எம்பிக்களில் 24 பேர் காங்கிரசில் இருந்து வெற்றி பெற்றனர். திமுக, கம்யூனிஸ்டுக்கு தலா 2 பேர். சுயேச்சைகள் 6 பேர். 1957ம் ஆண்டு நடந்த இந்த தேர்தல் மூலம் முதன்முறையாக திமுக சார்பாக நாடாளுமன்றத்துக்கு எம்பிக்கள் சென்றனர்.


அகில இந்திய அளவில் 403 தொகுதிகளில் இருந்து தேர்வான 494 எம்பிக்களில் 371 பேர் காங்கிரஸ்காரர்கள். 27 பேர் கம்யூனிஸ்ட் கட்சியினர். இதுபோல, ஜெயபிரகாஷ் நாராயணின் பிரஜா சோசலிஸ்ட் கட்சியில் 19 பேர் தேர்வாகினர். ஜனசங்கம் கட்சியில் இருந்து 4 பேர் வெற்றி பெற்றிருந்தனர். இந்த தேர்தலில்தான் மிக அதிக அளவிலான 42 சுயேச்சை எம்பிக்கள் வெற்றி பெற்றனர். இந்த சாதனை இதுவரை நடந்த எந்த ஒரு நாடாளுமன்ற தேர்தலிலும் முறியடிக்கப்படவே இல்லை. இப்படியான பல ருசிகரங்களை 1957 தேர்தல் பதிவு செய்தது.
(நினைவுகள் சுழலும்)

- நெல்லை ரவீந்திரன்