நாடாளுமன்ற தேர்தல் -24

1989 நாடாளுமன்ற தேர்தலுக்கு பிறகு பாஜக, கம்யூனிஸ்ட் கட்சிகளின் ஆதரவோடு முதன்முறையாக அமைந்த சிறுபான்மை அரசு, நித்திய கண்டம் பூரண ஆயுசு என்ற நிலையிலேயே நாட்களை கடத்தியது. பிற்படுத்தப்பட்ட மக்களுக்கு இட ஒதுக்கீடு வழங்கும் மண்டல் கமிஷன் பரிந்துரையை விபி சிங் அறிமுகம் செய்தபோது, ஆட்சி நாற்காலியின் முதலாவது கால் ஆடத் தொடங்கியது. உயர் வகுப்பினர் அதிகமாக இருக்கும் வட மாநிலங்களில் மாணவர்களின் போராட்டம் அதிகரித்தது.

மற்றொருபுறம், அயோத்தியில் ராமர் கோவில் கட்டுவதற்காக நாடு முழுவதும் ரத யாத்திரையை ஆரம்பித்தார், பாஜக தலைவர் அத்வானி. இதற்கிடையே, ஜனதா தளத்துக்குள்ளேயே தலைவர்களிடையே வேறுபாடு ஆரம்பித்தது. இந்த சூழ்நிலையில், பீகாருக்குள் ரத யாத்திரையை நுழைய விடாமல், அத்வானியை கைது செய்தார், அம்மாநில முதலமைச்சர் லாலுபிரசாத் யாதவ். சமஸ்திபூரில் 1990 அக்டோப் 23ம் தேதி நடந்த இந்த கைதைத் தொடர்ந்து, விபி சிங் அரசுக்கு அளித்து வந்த ஆதரவை வாபஸ் பெற்றது, பாஜக. 

இதனால், நாடாளுமன்றத்தில் நம்பிக்கை வாக்கெடுப்பு கோரும் நிலைமைக்கு ஆளானது, விபிசிங் அரசு. பதவியேற்ற ஓராண்டுக்குள் நவம்பர் 7ம் தேதி நடந்த நம்பிக்கை வாக்கெடுப்பில் தோல்வியடைந்து, ஆட்சியை பறி கொடுத்தது, இந்தியாவின் முதலாவது சிறுபான்மை கூட்டணி அரசு. ஏற்கனவே உரசிக் கொண்டிருந்த சந்திரசேகர், 64 எம்பிக்களுடன் ஜனதா தளத்தில் இருந்து வெளியேறி சமாஜ்வாடி ஜனதா என்ற கட்சியை தொடங்கினார்.

இவரது கட்சி ஆட்சியமைக்க, வெளியில் இருந்து ஆதரவு அளித்தது, ராஜீவின் காங்கிரஸ் கட்சி. தேவிலால் துணை பிரதமராகவே நீடித்தார். 1979ல் சரண்சிங் பிரதமரானது போலவே, பத்து ஆண்டுகள் கழித்து அதே காட்சிகள் அரங்கேறின. கதாபாத்திரங்கள் மட்டும் மாற்றம். அன்று இந்திரா, இப்போது அவது மகன் ராஜீவ். அப்போது சரண்சிங் இப்போது அவரது சீடர் சந்திரசேகர். அப்போது மொரார்ஜி பதவியிழந்து அரசியல் ஓய்வு பெற்றார். இப்போது அந்த இடத்தில் விபி சிங்.

சரண்சிங் அரசு போலவே ஆறே மாதத்தில் சந்திரசேகர் அரசும் ஆறே மாதத்தில் கவிழ்ந்தது. ராஜீவை உளவு பார்த்ததாக கூறி ஆதரவை வாபஸ் பெற்றது, காங்கிரஸ். இதனால், 1991 மார்ச் மாதம் தனது பதவியை ராஜினாமா செய்தார், சநதிரசேகர். ஒன்றரை ஆண்டுகளிலேயே அடுத்த பொதுத் தேர்தலை நாடு சந்தித்தது. 1991 மே மாதத்தில் நாடாளுமன்ற தேர்தல் அறிவிக்கப்பட்டது. 'காங்கிரசால் மட்டுமே ஐந்தாண்டு நிலையான ஆட்சியை தர முடியும்' என்ற கோஷம் முன் வைக்கப்பட்டது.

இதற்கிடையே பதவியில் இருந்த ஆறு மாதத்துக்குள் சட்டம் ஒழுங்கை காரணம் காட்டி தமிழகத்தில் திமுக ஆட்சியை கலைத்திருந்தது, சந்திரசேகர் அரசு. ஜெயலலிதா கோரிக்கையை ராஜீவின் பரிந்துரையின் பேரில் சந்திரசேகர் நிறைவேற்ற, அதற்கு ஒப்புதல் அளித்தார், அப்போதைய ஜனாதிபதி வெங்கட்ராமன். இதனால் 1991 நாடாளுமன்ற தேர்தலுடன் சேர்ந்து தமிழக சட்டப்பேரவை தேர்தலும் நடந்தது. தமிழக தேர்தல் களத்தில் நடந்த அந்த பயங்கரம், நாட்டையே அதிர்ச்சிக்குள்ளாக்கியது.

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் 23

ராஜீவ் காந்திக்கு எதிராக தேர்தலுக்கு முன்பே எதிர்க்கட்சிகள் ஒன்று திரண்டு ஜனதா தளம் தலைமையில் தேசிய முன்னணி என்ற கூட்டணியை உருவாக்கி சந்தித்த நாடாளுமன்ற தேர்தல், 1989 நவம்பரில் நடைபெற்றது. தேர்தல் முடிவுகள் ராஜீவின் காங்கிரசுக்கு பலத்த அதிர்ச்சியை கொடுத்தது. 1984 தேர்தலில் 400க்கு மேல் வென்ற காங்கிரசுக்கு இந்த தேர்தலில் 195 இடங்களே கிடைத்தது. தனது சொந்த செல்வாக்கில் சந்தித்த ஒரே தேர்தலில், ராஜீவ் தோல்வியடைந்தார் என்ற வரலாறை, இந்திய தேர்தல் களம் தனதாக்கிக் கொண்டது. ஆனாலும் நாடாளுமன்றத்தில் அதிக இடங்களை பெற்ற கட்சி காங்கிரஸ்தான். தமிழகம், ஆந்திரா என தென் மாநிலங்கள், வழக்கம்போல காங்கிரசுக்கு கை கொடுத்திருந்தன. ஆனால்,  ஆட்சியமைக்க 272 பேர் தேவை.

மறுபுறம் ராஜீவுக்கு எதிராக அமைத்த தேசிய ஜனநாயக கூட்டணியில் ஜனதாதளம் 142 இடங்களுடன் இரண்டாவது பெரிய கட்சியாக வென்றது. அந்த கூட்டணியின் முக்கிய பங்காளியான தெலுங்கு தேசம் 2 இடத்தில்தான் வென்றது. திமுக ஒன்றில் கூட வெற்றி பெறவில்லை. தமிழகத்தில் ஆட்சியில் திமுக இருந்த போதிலும், 1989 நாடாளுமன்ற தேர்தலுக்கு சில மாதங்களுக்கு முன்னதாக, ஜெயலலிதா தலைமையில் ஒன்று சேர்ந்த அதிமுக மற்றும் காங்கிரஸ் கூட்டணி, புதுச்சேரியையும் சேர்த்து 39 இடங்களில் வென்றது. திமுக அணியில் நாகை தொகுதியில் வலது கம்யூனிஸ்ட் மட்டும் வென்றது.

கடந்த தேர்தலில் 2 இடங்களை பெற்றிருந்த பாஜக, இந்த தேர்தலில் 89 இடங்களை பிடித்தது. இது தவிர மார்க்சிஸ்ட் 34 உட்பட இடதுசாரி கட்சிகளும் கணிசமான இடங்களை பிடித்தது. இதையடுத்து, எதிர்க்கட்சிகள் ஒன்று சேர்ந்து தேசிய முன்னணி கூட்டணியின் தலைவரான விபி சிங்கை பிரதமராக தேர்வு செய்தன. தேசிய முன்னணி கூட்டணி ஆட்சி அமைத்தது. சுதந்திர இந்தியாவில் முதலாவது சிறுபான்மை அரசு இதுதான். பல கட்சிகள் ஒன்று சேர்ந்து அமைத்த அரசும் இதுதான்.

150க்கு சற்று அதிகமான எம்பிக்களின் ஆதரவுடன் ஆட்சியமைத்த  விபி சிங் அரசுக்கு பாஜகவும் இடதுசாரி கட்சிகளும் ஆட்சியில் பங்கேற்காமல் வெளியில் இருந்தபடி ஆதரவை அளித்தன. அந்த வகையில் பாஜக மற்றும் கம்யூனிஸ்டுகளை ஒரே புள்ளியில் இணைத்த ஒரே அரசும் விபி சிங் அரசுதான். தேசிய முன்னணியில் இருந்த எல்லா கட்சிகளுக்கும் அமைச்சர் பதவி அளித்தார், விபி சிங். கூட்டணிக்குள் குழப்பம் ஏற்படாமல் தவிர்க்க துணை பிரதமர் பதவி, ஜனதா தளம் தலைவர்களில் ஒருவரான தேவிலாலுக்கு கொடுக்கப்பட்டது.

ஒரு இடத்தில் கூட வெற்றி பெறாவிட்டாலும் மாநிலங்களவை திமுக உறுப்பினராக இருந்த முரசொலி மாறனுக்கு நகர்ப்புற வளர்ச்சி துறை அமைச்சர் பதவி வழங்கினார். அவர்தான் திமுக சார்பாக பதவியேற்ற முதலாவது மத்திய அமைச்சர். 1977ம் ஆண்டிலேயே மத்திய அமைச்சரவையில் அதிமுக இடம் பெற்றதை இங்கே நினைவில் கொள்ளலாம். 

இப்படியாக பாஜக, இடதுசாரி ஆதரவோடு 1989 டிசம்பர் 2ம் தேதி பதவியேற்ற விபி சிங் அரசு, அடுத்த ஓராண்டு கூட முழுமையாக நிலைக்கவில்லை. அடுத்த ஒன்றரை ஆண்டுகளில் அடுத்த பொதுத் தேர்தலை நாடு சந்தித்தது. அதற்குள் பல அரசியல் அதிர்ச்சிகளும் குழப்பங்களும்...

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் -22

1984 நாடாளுமன்ற தேர்தல் மற்றும் சட்டப்பேரவை தேர்தல் முடிந்த 3 ஆண்டுகளில் எம்ஜிஆர் மறைந்தார். இப்போது போலவே, அதிமுக பிளவுபட்டதோடு இரட்டை இலை சின்னம் முடக்கப்பட்டு பின்னர் கட்சி ஒன்று சேர்ந்து சின்னமும் மீட்கப்பட்டது. இப்போது போலவே அப்போதும் இந்த முயற்சிகளுக்கு பக்கபலமாக இருந்தது, அன்றைய மத்திய அரசு. அதாவது ராஜீவ் தலைமையிலான மத்திய அரசு. இப்படியாக 1984 முதல் 1989 நாடாளுமன்ற தேர்தலுக்குள் அதிமுகவில் குழப்பம் ஏற்பட்டு, ஜெயலலிதா தலைமையில் மீண்டும் கட்சி ஒன்று சேர்ந்தது.

 (இந்த விபரங்களை எனது தமிழக சட்டப்பேரவை தேர்தல் வரலாறு பதிவில் பார்க்கலாம் http://thileeban81.blogspot.com/2016/04/?m=1)

அதிமுக அணிகள் இணைப்புக்கு முன்னதாக 1989 நாடாளுமன்ற தேர்தலுக்கு சில மாதங்களுக்கு முன் இரட்டை இலை சின்னம் இல்லாமலேயே நடந்த தமிழக தேர்தலில் திமுக வென்று, 12 ஆண்டுகளுக்கு பிறகு மீண்டும் முதல்வரானார், கருணாநிதி.

அதே நேரத்தில், 1984 தேர்தலில் மிகப்பெரிய வெற்றியை பெற்ற ராஜீவ்காந்தி அரசின் மீது,  போபார்ஸ் ராணுவ பீரங்கி ஊழல் புகார் எழுந்தபோது அந்த ஆட்சியின் முடிவுரை வரையப்பட்டு, இந்தியாவின் முதலாவது பல கட்சிகளின் கூட்டணி ஆட்சி முறைக்கு முகவுரை எழுதப்பட்டது. ராஜீவ் அமைச்சரவையில் நிதி மற்றும் ராணுவ அமைச்சராக இருந்த விபி சிங் எழுப்பிய இந்த புகாரால் பதவி பறிக்கப்பட்டு கட்சியில் இருந்தும் நீக்கப்பட்டார். எதிர்க்கட்சிகளின் பிரச்சார பீரங்கியாக போபார்ஸ் பேர ஊழல் மாறியது.

நாடாளுமன்ற கூட்டுக்குழு அறிக்கையை அவையிலேயே கிழித்து எறிந்து ஆவேசமாக பேசினார், காங்கிரஸ் கூட்டணியான அதிமுகவை சேர்ந்த எம்பி ஆலடி அருணா. பாஜக, இடதுசாரிகள், திமுக, தெலுங்கு தேசம், அசாம் கண பரிசத் என ஏராளமான கட்சிகளும் ராஜீவுக்கு எதிராக அகில இந்திய அளவில் ஒன்று திரண்டன. இதற்கிடையே, இலங்கையில் அமைதி ஏற்படுத்துவதாக கூறி, ராஜீவ் அனுப்பிய இந்திய ராணுவம், அங்குள்ள தமிழர்களையும் விடுதலைப் புலிகளையும் பகைத்ததால் எழுந்த கோபமும் அவர் மீது சேர்ந்தது.

ராஜீவுக்கு மாமா உறவு முறை கொண்டவரான அன்றைய பிரபல தலைவர்களில் ஒருவரான அருண் நேருவும் அவருக்கு எதிராக இருந்தார்.

இப்படியான சூழலில் காங்கிரசில் இருந்து வெளியேற்றப்பட்ட விபி சிங், அருண் நேருவுடன் சேர்ந்து 'ஜன மோர்ச்சா' என்ற கட்சியை தொடங்கினார். பிறகு ஜனதாதளம் கட்சியுடன் இணைந்தார். மறுபுறம், ராஜீவுக்கு எதிரான கட்சிகளை ஒன்றிணைக்கும் பணியை தொடங்கினார், தெலுங்கு தேசம் தலைவர் ராமாராவ். அந்த முயற்சியின் விளைவாக தோன்றியது தேசிய முன்னணி என்ற பல கட்சி கூட்டணி.

திமுக, தெலுங்கு தேசம், அசாம் கணபரிசத், ஜனதா தளம், ராஷ்டிரிய ஜனதா தளம் என பல கட்சிகள் அமைத்த தேசிய முன்னணி கூட்டணியின் தலைவராக, விபி சிங் தேர்வானார். கூட்டணியின் ஒருங்கிணைப்பாளர் ராமாராவ். போபர்ஸ் என்ற ஒற்றைச் சொல்லே ராஜீவுக்கு எதிராக இந்திய அளவில் கட்சிகள் ஒன்று திரள வழி வகுத்தது. 1989 தேர்தலில் ராஜீவை வீழ்த்த வேண்டும் என்ற ஒற்றை அஜென்டாவுடன் தயாரானது, தேசிய முன்னணி கூட்டணி. அவர்கள் எதிர்பார்த்தபடியே 1989 நாடாளுமன்ற தேர்தலும் வந்தது. அதன் முடிவுகள் இரு தரப்புக்குமே அதிர்ச்சி கலந்த ஆச்சரியத்தை அளித்தன.

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் -21

 இந்திரா காந்தி கொல்லப்பட்டு சரியாக 60 நாட்களுக்குள் 1984 டிசம்பர் இறுதி வாரங்களில் நாடாளுமன்ற தேர்தல் நடைபெற்றது. அசாம் மற்றும் பஞ்சாப் மாநிலங்களை தவிர்த்து மற்ற இடங்களில் நடந்த அந்த தேர்தலில் ராஜீவ் தலைமையிலான காங்கிரஸ் கட்சி 404 இடங்களை வென்று மிகப்பெரிய வெற்றியை பெற்றது. அதன்பிறகு இரண்டு மாநில தொகுதிகளில் 10ஐ காங்கிரஸ் கைப்பற்றியது. இந்திரா காந்தியின் அனுதாப அலையில் மற்ற கட்சிகள் காணாமல் போயின.

ஜனசங்கத்தில் இருந்து மாறிய பிறகு, பாஜக போட்டியிட்ட அந்த முதல் தேர்தலில் வெறும் 2 இடங்களில் மட்டுமே வென்றது. கம்யூனிஸ்ட் உள்ளிட்ட மற்ற தேசிய கட்சிகளின் நிலையும் அப்படியே. ஆனால், இந்திரா காந்தி அனுதாப அலையிலும் கூட,  ஆந்திராவில் என்டி ராமாராவ் தலைமையிலான தெலுங்கு தேசம் கட்சி 30 இடங்களை வென்று, அகில இந்திய அளவில் 2ம் இடத்தை பிடித்தது. 

சுதந்திர இந்தியாவில் மாநில கட்சி ஒன்று இரண்டாம் இடத்தை பிடித்தது அதுவே முதன்முறை. தற்போதைய மக்களவையில் அதிமுக 37, திரிணாமுல் காங்கிரஸ் 39 என நான்காவது, மூன்றாவது பெரிய கட்சிகளாக இருப்பதை இங்கே குறிப்பிடுவது அவசியம். இதற்கு என்டிஆர் தான் முன் உதாரணம்.

இது ஒருபுறம் இருக்க, தமிழகத்தில் எம்ஜிஆர் நோய்வாய்ப்பட்டு இருந்ததால் அந்த அனுதாப அலையும் சேர்ந்தது. 'எம்ஜிஆர் ஃபார்முலா' அடிப்படையில் உருவான அதிமுக காங்கிரஸ் கூட்டணி, வரலாறு காணாத மிகப்பெரிய வெற்றியை பதிவு செய்தது. நாடாளுமன்ற தேர்தல், தமிழக சட்டப்பேரவை தேர்தல் இரண்டிலும் இந்த கூட்டணி வென்றது. மொத்தம் உள்ள 39 மக்களவை தொகுதிகளில் 37ஐ (அதிமுக -12, காங்கிரஸ் - 25) இந்த கூட்டணி கைப்பற்றியது. இரண்டு இடங்களை மட்டுமே திமுக பிடித்தது.

நாடாளுமன்ற தேர்தலுடன், 1984 டிசம்பர் 24ல் நடந்த தமிழக சட்டப்பேரவை தேர்தலில் 195 இடங்களை (அதிமுக 132, காங்கிரஸ் 61, குமரிஅனந்தனின் காந்தி காமராஜ் தேசிய காங்கிரஸ் 2) அதிமுக கூட்டணி வென்று, தமிழக அரசியல் வரலாற்றில் தொடர்ந்து மூன்றாவது முறையாக முதல்வராகி ஹாட்ரிக் சாதனை படைத்தார் எம்ஜிஆர். இந்த ஹாட்ரிக் சாதனை எம்ஜிஆருக்கு முன்னும் பின்னும் இன்னும் முறியடிக்கப்படவில்லை. நேரடியாக தேர்தல் களம் காணாமல், அமெரிக்காவில் இருந்தபடியே இந்த சாதனையை படைத்தார், எம்ஜிஆர்.

இப்படியாக தமிழகத்திலும், அகில இந்திய அளவிலும் பல அதிசயங்களை ஏற்படுத்தியது, 1984ம் ஆண்டு தேர்தல். அப்போது, இந்தியாவின் இளம் பிரதமராக அறியப்பட்ட ராஜீவ்காந்தி, தொழில்நுட்பம் உட்பட பல விஷயங்களில் ஆர்வம் காட்டியதோடு, ஐந்து ஆண்டுக்கு ஒருமுறை பஞ்சாயத்து தேர்தல் நடத்துவதை கட்டாயமாக்கும் 'பஞ்சாயத் ராஜ்' சட்டத்தையும் கொண்டு வந்தார். 

ஆனால், 1989ல் நடந்த அடுத்த நாடாளுமன்ற தேர்தல் முடிவுகள் அவருக்கு மிகப் பெரிய அதிர்ச்சியை கொடுத்தது. இந்திய ஆட்சி முறையிலும் புதிய பாதையையும் ஏற்படுத்தி தந்தது.

(நினைவுகள் சுழலும்)

- நெல்லை வை.ரவீந்திரன்

நாடாளுமன்ற தேர்தல் -20

காங்கிரஸ் மூத்த தலைவர்களை வெற்றி பெற்றதில் தொடங்கி, பங்களாதேஷ் நாட்டை உருவாக்கியது, பாகிஸ்தான் போர் வெற்றி, இரண்டாண்டு எமர்ஜென்சி, பிரதமராகவே தோல்வியடைந்த ஒரே நபர் என்ற போதிலும் மீண்டும் வென்று ஆட்சியை கைப்பற்றிய மன உறுதி என வளர்ந்து காலிஸ்தான் தீவிரவாதிகளை பொற்கோயிலுக்குள்ளேயே சென்று துவம்சம் செய்தது வரை பார்த்த இந்திய மக்கள், இந்திராவை வியப்புடன் பார்த்து ஆச்சரியப்பட்டுக் கிடந்தனர். ஆனால் இந்த காலிஸ்தான் தீவிரவாதிகளுக்கு எதிரான துணிச்சல்தான் அவருக்கு முடிவுரையை எழுதியது. 

புளூ ஸ்டார் ஆபரேஷன் முடிந்த நான்கே மாதத்தில் 1984 அக்டோபர் 31ம் தேதியன்று காலை சுட்டுக் கொல்லப்பட்டார் இந்திராகாந்தி. இரும்பு பெண்மணியின் சரித்திரம் அவரது சொந்த மெய்க் காவலர்களான சீக்கிய இனத்தை சேர்ந்த சத்வந்த் சிங், பியாந்த் சிங் என்ற இருவரால் சரிந்தது. இதன் தொடர்ச்சியாக, சீக்கியர்களுக்கு எதிரான கலவரம் மூண்டதில் ஆயிரக்கணக்கானோர் கொல்லப்பட்டனர். இன்னமும் நீடிக்கும் அந்த கலவர வழக்கில் குற்றஞ்சாட்டப்பட்ட காங்கிரஸ் தலைவர்களில் தற்போதைய மத்திய பிரதேச முதல்வர் கமல்நாத்தும் ஒருவர். இது தனியொரு அத்தியாயம்.

இந்திராகாந்தி சுட்டுக் கொல்லப்பட்டதும் புதிய பிரதமரை தேர்வு செய்யும் படலம் காங்கிரஸ கட்சியில் தொடங்கியது. அதில் முன்னணியில் இருந்தவர்களில் பிரணாப் முகர்ஜியும் ஒருவர். ஆனால், சஞ்சய் காந்தி மறைவால் அரசியலுக்கு வந்து அமேதி எம்பி யான ராஜீவ் காந்திக்கு அந்த பதவி வந்து சேர்ந்தது. கட்சியின் ஒற்றுமை என்ற காரணத்தால் அரசியலில் நுழைந்த மூன்றே ஆண்டில் பிரதமர் பதவி தேடிவந்தது ராஜீவ் காந்தி வசம். பிரதமரான சில வாரங்களிலேயே நாடாளுமன்ற தேர்தலை சந்திக்க தயாரானார், ராஜீவ்.

இது ஒருபுறம் இருக்க, தமிழகத்தில் காங்கிரசின் கூட்டணி தலைவரான எம்ஜிஆர், 1984ம் ஆண்டு இறுதியில் கடுமையாக நோய் வாய்ப்பட்டார். சென்னை அப்பலோவில் இருந்து அமெரிக்காவின் புரூக்ளின் மருத்துவமனைக்கு கொண்டு செல்லப்படட எம்ஜிஆருக்கு இந்திரா காந்தியின் மறைவு செய்தி கூட சொல்லப்படவில்லை. ஆம். இந்திராவின் இறுதிச் சடங்கின்போது அமெரிக்காவில் இருந்தார் எம்ஜிஆர்.

இதற்கிடையே, நாடாளுமன்ற தேர்தலை சந்திக்க ராஜீவ் காந்தி தயாரானதால், தமிழக சட்டப்பேரவை தேர்தலையும் ஆறு மாதங்களுக்கு முன்பே எதிர்கொள்ள தீர்மானித்தது, அதிமுக அரசு. 1985 ஜூன் மாதம் வரை ஆட்சியின் பதவிக்காலம் இருந்தது. அப்போதைய இடைக்கால முதல்வர் நெடுஞ்செழியன், மூத்த அமைச்சர் ஆர்எம் வீரப்பன் போன்ற முக்கிய தலைவர்களின் ஆலோசனையை தொடர்ந்து இரண்டு தேர்தலையும் சேர்த்து எதிர்கொள்ள தமிழகம் தயாரானது. 

1984ம் ஆண்டின் இறுதி நாட்களில் நடந்த அந்த தேர்தல்களின் போது, புரட்சித் தலைவர் எம்ஜிஆர், நேரடியாக தேர்தல் களத்தில் இல்லை. 

இரும்பு மனுஷி இந்திரா காந்தியோ இந்த உலகிலேயே இல்லை. ஆனால், இருவரும் தான் அந்த தேர்தலின் பிரதானமாக இருந்தனர். இப்படியொரு சூழ்நிலையில் 1984ம் ஆண்டு தேர்தலை காங்கிரசும் அதிமுகவும் சந்தித்தன. 

(நினைவுகள் சுழலும்)

- வை.ரவீந்திரன்

நாடாளுமன்ற தேர்தல் -19

1980 தேர்தலுக்கு பிந்தைய அரசியல் சூழல்கள், அதிமுக காங்கிரஸ் இடையிலான பந்தத்தை உறுதி செய்தன. 'மத்தியில் காங்கிரஸ், மாநிலத்தில் அதிமுக' என்பதே அந்த பந்தத்தின் பிரதான அம்சம். நாடாளுமன்ற தேர்தலாக இருந்தால் மூன்றில் இரண்டு பங்கு தொகுதிகள் காங்கிரசுக்கும் சட்டப்பேரவையாக இருந்தால் மூன்றில் இரண்டு பங்கு அதிமுகவுக்கும் ஒதுக்கப்படும் என்பதே அந்த ஒப்பந்தம். இவ்வாறாக, கூட்டணி நீடிக்க இந்திரா காந்தியும் எம்ஜிஆரும் செல்வாக்கு மிகுந்த தலைவர்களாக உயர்ந்தனர்.

இவ்வாறாக, அடுத்த தேர்தலை நோக்கி சென்றது. அந்த தேர்தலுக்கு முன்னால் ஒரு பயங்கர சம்பவம் நடந்தது. அதற்கு 'காலிஸ்தான்' என்ற இயக்கம் பற்றி சில வரிகள் தெரிந்து கொள்வது நல்லது. பஞ்சாப், அரியானா உட்பட சீக்கியர்களின் பூமியை தனி நாடாக அறிவிக்க கோரி 1970களில் உருவானது தான் 'காலிஸ்தான்' இயக்கம். வெளிநாடுவாழ் சீக்கியர்கள் துணையோடு உருவான இந்த இயக்கத்தை பாகிஸ்தானும் ஊக்குவித்ததாக கூறுவது உண்டு. 

இப்போது காஷ்மீர் போல, அப்போது பஞ்சாபும் இந்தியாவின் தலைவலி. நாடாளுமன்ற தேர்தல் கூட தனியாகவே நடக்கும் அல்லது பல மாதங்கள் நடக்காமலே கூட இருந்தது உண்டு.  காலிஸ்தான் தீவிரவாதிகளின் வன்முறைக்கு அளவில்லை என்பதை சொல்லி தெரிய வேண்டியதில்லை. இந்த சூழ்நிலையில் தான், அதன் தளபதி பிந்தரன் வாலே, சீக்கியர்களின் புனித தலமான பொற்கோவிலுக்குள் இருந்தபடி வன்முறையை அரங்கேற்ற தொடங்கினார்.

இதனால், காலிஸ்தான் தலைமை பீடமாக பொற்கோவில் மாறி வருவதை தடுப்பதற்கான நடவடிக்கையை தொடங்கினார், பிரதமர் இந்திரா காந்தி. 'ஆபரேசன் புளு ஸ்டார்' என்ற பெயரில் பொற்கோவில் முன் ராணுவத்தை நிறுத்தினார். கோவிலுக்குள் இருந்த தீவிரவாதிகளை சரணடைய சொன்ன ராணுவததின் எச்சரிக்கை பலனளிக்கவில்லை. இந்திரா உத்தரவின் பேரில், பொற்கோவிலுக்குள் நுழைந்தது ராணுவம்.

1984 ஜூன் முதல் தேதியில் இருந்து எட்டு நாட்கள் கோவிலுக்குள் முகாமிட்டு, உள்ளிருந்த தீவிரவாதிகளை துவம்சம் செய்தது இந்திய ராணுவம். புனிதமான பொற்கோவிலுக்குள் ரத்த ஆறா...? என கொதித்தது சீக்கியர்களின் உள்ளம். இதனால் விளைந்தது, இந்தியா அதுவரை காணாத ஒரு அதிர்ச்சிகரமான துயரம். அது...?

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் -18

1980ம் ஆண்டு நடந்த நாடாளுமன்ற பொதுத் தேர்தலில் இந்திரா காந்தி பிரமாண்டமான வெற்றியை பெற, அப்போதைய பிரதமர் சரண்சிங்கின் ஜனதா கட்சி 41 இடங்களையும் சந்திரசேகரின் ஜனதா கட்சி 31 இடங்களையும் மட்டுமே பெற்றன. இது தவிர மார்க்சிஸ்ட் 37 இடங்களை வென்றிருந்தது. தமிழகத்தில் காங்கிரஸ் அணியில் இருந்த திமுக 16 இடங்களை கைபபற்றியது. ஆளுங்கட்சியான எம்ஜிஆரின் அதிமுக சிவகாசி, கோபி என இரண்டு தொகுதிகளில் மட்டுமே வென்றது.

இந்த வெற்றியின் களிப்பால், இந்திரா கந்தி பாரதமரான உடனேயே ஆட்சி கலைப்பு அரங்கேறியது. கருணாநிதியின் நெருக்கடியால் எம்ஜிஆர் ஆட்சியை கலைத்தார் இந்திராகாந்தி. அப்போதெல்லாம் 356 சட்டப்பிரிவை பயன்படுத்தி ஆட்சியை கலைப்பது சாதாரணமான நிகழ்வுகளாக இருந்து. இதனால், தமிழக மக்கள் மறுபடியும் ஒரு தேர்தலை சந்தித்தனர்.

1980 ஜனவரியில்  நாடாளுமன்ற தேர்தல் முடிந்த நிலையில் மே மாதம் தமிழக சட்டப்பேரவை தேர்தல் நடந்தது. இந்த தேர்தலில் தலா 114 என தொகுதிப் பங்கீட்டோடு களமிறங்கின, திமுக காங்கிரஸ் அணி. அதில் முஸ்லிம் லீக்குக்கு 6 இடங்கள் ஒதுக்கப்பட்டன. அதிமுக அணியில் மார்க்சிஸ்ட், குமரி அனந்தனின் காந்தி காமராஜ் தேசிய காங்கிரஸ் கட்சிகள் இருந்தன.

ஆனால், திமுகவின் கணக்கு பொய்யானது. ஜனவரி நாடாளுமன்ற தேர்தலில், இந்திராவை ஆதரித்த தமிழக மக்கள் மே மாத சட்டப்பேரவை தேர்தலில் அம்ஜிஆரையே மீண்டும் தேர்வு செய்தனர். இந்த தேர்தல் முடிவில் அதிமுக கூட்டணி 162 இடங்களை பிடித்தது. அதிமுக மட்டும் 129 இடங்களுடன் தனிப் பெரும்பான்மை பெற்றது. தலா 114ல் களமிறங்கிய  திமுகவுக்கு 37 காங்கிரசுக்கு 31 என வெற்றி கிடைத்தது.

மூன்றே மாதங்களில் நிகழ்ந்த இந்த மாற்றத்தை பார்த்து ஆச்சரியமடைந்த இந்திரா காந்தி, அதன்பிறகு எம்ஜிஆருடன் நட்பு பாராட்டினார். மத்திய அரசின் உதவி தேவை என்பதால் முதல்வர் எம்ஜிஆரும் நட்புக்கரம் நீட்டினார். இந்த நட்பானது அடுத்த 16 ஆண்டு காலத்துக்கு அதிமுக காங்கிரஸ் கூட்டணிக்கு அச்சாரமானது.

இந்த காலகட்டத்தில் தான், 1980ல் அமேதி தொகுதியில் வென்ற இந்திராவின் இளைய மகன் சஞ்சய் காந்தி அகால மரணம் அடைந்தார். அந்த தொகுதிக்கு 1981ல் நடந்த இடைத்தேர்தல் மூலமாக அரசியலில் காலடி எடுத்து வைத்தார் விமானியாக இருந்த இந்திராவின் மூத்த மகன் ராஜீவ் காந்தி. 

இப்படியாக அரசியல்களம் பல மாற்றங்களை சந்தித்த நிலையில், எம்ஜிஆரும் இந்திராவும் அசைக்க முடியாத தலைவர்களாக மாறிக் கொண்டு இருந்தனர். அவர்கள் தான், 1984 நாடாளுமன்ற தேர்தலின் மையமாக இருநதனர்.

(நினைவுகள் சுழலும்)

- நெல்லை ரவீந்திரன்

நாடாளுமன்ற தேர்தல் 17

 கருத்து வேறுபாடு, அதிகார போட்டிகளால் இந்தியாவின் முதலாவது கூட்டணி அரசு, முழுமையாக கரை சேராமல் பாதியிலேயே கவிழ்ந்தது. 1977ல் பதவிக்கு வந்த ஜனதா அரசு கவிழ்ந்ததால் மூன்றே ஆண்டுகளில் நாடாளுமன்ற பொதுத் தேர்தல் வந்தது. 1980 ஜனவரியில் நடந்த அந்த தேர்தலின்போது, 1977ல் பிரதமராக இருந்தபோதே  ரேபரேலி தொகுதியில் தோல்வியடைந்த அனுபவத்தை இந்திரா காந்தி மறக்கவில்லை. அதனால்,  தென்னிந்தியாவையே தனது பாதுகாப்பு பிரதேசமாக பார்த்தார்.

1978 இடைத்தேர்தல் மூலமாக கர்நாடகாவின் சிக்மகளூருவில் வென்ற அவர், 1980ல் ஆந்திர மாநிலம் மேடக் தொகுதியை தேர்வு செய்தார். முந்தைய தேர்தலில் பலமாக இருந்த எதிர்க்கட்சிகள் இந்த முறை சிதறிக் கிடந்தன. 85 வயதை எட்டிய மொரார்ஜி தேசாயும் களத்தில் இல்லை. ஆனாலும் சரண்சிங், சந்திரசேகர் என 1980 தேர்தல் களம் சூடாகவே தகித்தது.

தமிழகத்தில் 1977 தேர்தலில் ஜனதாவுடன் இருந்து இந்திராவை மிகக்கடுமையாக விமர்சித்த திமுக 1980ல் இந்திரா காங்கிரசுடன் கூட்டணி அமைத்தது. அதுவும் காங்கிரசுக்கு 22 தொகுதிகளை திமுக ஒதுக்கியது. எம்ஜிஆரின் செல்வாக்கு வளர்ந்ததே இதற்கு காரணம். அதே நேரத்தில் நெருக்கடி நிலையின்போதே இந்திராவுடன் கூட்டணி அமைத்திருந்த எம்ஜிஆர், இந்த தேர்தலில் சரண்சிங்கின் ஜனதா அணியில் சேர்ந்திருந்தார்.

மிகவும் பரபரப்பான இந்த தேர்தலில் இந்திராகாந்தி எதிர்பார்த்தபடியே தென் மாநிலங்கள் அவரை கைவிடவில்லை. எதிர்க்கட்சி தலைவர்களின் அதிகார போட்டியை பார்த்து வெறுத்துப் போயிருந்த இந்திய மக்களுக்கு இரும்பு பெண்மணியாக  இந்திரா காந்தி தெரிந்தார். அவரது நெருக்கடி நிலை கால அனுபவங்களை மூன்றே ஆண்டுகளில் மறந்து அவரையே மீண்டும் கொண்டாடினார்கள். ஏகபோக வெற்றியை ருசித்தது காங்கிரஸ். அகில இந்திய அளவில் 374 இடங்களை காங்கிரஸ் வென்று மீண்டும் பிரதமரானார் இந்திராகாந்தி. தமிழகத்தில் காங்கிரஸ் திமுக கூட்டணி 37 இடங்களை பெற்றது. இதன் விளைவு அடுத்தடுத்த நாட்களில் தமிழக அரசியலில் வெப்பம் கூட்டியது.

(நினைவுகள் சுழலும்)

- நெல்லை ரவீந்திரன்

இது '94

உணவின் சூட்டை உள்வாங்கி கிறங்கி கிடக்கும் வாழை இலை போல மனதுக்குள் உறங்கி கிடக்கிறது நினைவுகள் தாலாட்டும் மூன்றாண்டு பிஎஸ்சி கணிதம். பதின்ம வயதுக்கே உரித்தான குறும்புகள், சேட்டைகள் எல்லாம் கரைந்த பின்னும் அடிநாக்கில் இனித்துக் கிடக்கும்  கற்கண்டாய் 

இன்றளவும் சுவை கூட்டுகிறது.

கால சக்கரத்தின் கோரப்பிடியில் சிக்கி சுழன்றாலும் மேலும் மேலும் சுவை கூட்டும் பண்டங்களில் மனிதனின் பழைய நினைவுகளும் ஒன்று. 

கல்லூரியின் முதல் நாள் வகுப்பு தொடங்கி நிறைவு நாளில் ஆட்டோகிராப், சினிமா, பிரியாணி என சுழன்ற 1994 நினைவுகளை மூளை நரம்புகள் பசுவாய் மாறி அசை போடுகின்றன. அந்த பொக்கிஷ நினைவுகளோடு இன்றைய நனவுகளும் சேர்ந்தது.

தமிழ் புத்தாண்டின் முதல் நாளிலேயே எனது 1991-1994 பிஎஸ்சி கணிதம் நண்பர்களின் சந்திப்பு ஈடேறியது. இன்றே தீர்த்தவாரியில் எழுந்தருளும் சுவாமிகளைப் போல எங்கள் பேராசிரியர்கள் பதின்மரை சந்திக்கும் வரம் பெற்ற பாக்கியசாலிகளானோம். அவர்களில் இருவர் எங்கள் கல்லூரியின் முன்னாள், இன்னாள் முதல்வர்கள் என்பது கூடுதல் மகிழ்ச்சி.

தமிழ்த்தாய் வாழ்த்து தந்த மனோன்மணியம் சுந்தரனார் தான் எங்கள் கல்லூரியின் முதல் முதல்வர். புதுமைபித்தன்,  பாரதி தொடங்கி சாகித்ய அகாடமி பெற்ற அறுவரை தந்த கல்லூரியும் எங்களதே. நெல்லை மண்ணுக்கே உரித்தான ஏலேய், மக்கா, மாப்ளே என விளித்த வார்த்தைகளை 45 பிளஸில் கேட்டபோது, சந்திப்பின் நோக்கம் கூடுதல் அர்த்தம் பெற்றது.

- நெல்லை ரவீந்திரன்

.

நெல்லை மதுரை திரவியம் தாயுமானவர் கல்லூரியின் 1991-1994 கணிதர்களின் சில்வர் ஜூப்ளி சந்திப்பு.

நாடாளுமன்ற தேர்தல் -16

1977 பொதுத்தேர்தலுக்கு பிறகு முதன் முறையாக காங்கிரஸ் கட்சி அல்லாத பிரதமராக மொரார்ஜி தேசாய் பதவியேற்றார். 1977 மார்ச்சில் அவருடன் சரண்சிங், ஜெகஜீவன் ராம் இருவரும் துணை பிரதமரானார்கள். தலித் சமுதாயத்தை சேர்ந்த பிரபல தலைவரான ஜெகஜீவன் ராம், கடைசி நேரத்தில் இந்திராவிடம் இருந்து ஜனதா கட்சிக்கு வந்திருந்தார். அவர், கடந்த ஆட்சியில் காங்கிரஸ் ஆட்சியில் மக்களவை சபாநாயகராக இருந்த மீராகுமாரின் தந்தை என்பது குறிப்பிடத்தக்கது. 

மொரார்ஜி தேசாய் ஆட்சியின்போது, அப்போது புழக்கத்தில் இருந்து வந்த அந்தக்கால 1000, 5000 மற்றும் 10000 ரூபாய் நோட்டுகள் அனைத்தும்  செல்லாததாக அறிவிக்கப்பட்டது. ஆட்சிக்கு வந்த மறு ஆண்டில் 1978 ஜனவரியில் இந்த அறிவிப்பு வெளியானது பண மதிப்பிழப்பு நடவடிக்கையின் முன்னோடி மொரார்ஜி தேசாய் தான்.

ஆட்சியமைத்த இரண்டு ஆண்டுகளுக்குள்ளேயே ஜனதா தலைவர்களுக்குள் கருத்து மோதல் வெடித்தது. இதற்கிடையே 1978ல் கர்நாடக மாநிலம் சிக்மகளூரில் தொகுதி இடைத்தேர்தலில் வென்று எம்பியாகி இருந்தார் இந்திரா காந்தி. அதே நேரத்தில் ஜனதா தலைவர்களின் மோதலால் ஆட்சி கலகலக்க தொடங்கியது. இடதுசாரி சிந்தனை தலைவர்களுக்கும் வலதுசாரி சிந்தனை தலைவர்களுக்கும் இடையே தொடங்கிய கருத்து வேறுபாடானது வெவ்வேறு வடிவங்கள் எடுத்தது.

தலைவர்களுக்குள் எழுந்த அதிகார போட்டியின் விளைவாக 64 எம்பிக்களுடன் கட்சியை உடைத்தார் சரண்சிங். இதனால் 1979 ஜூலை 19ம் தேதி தனது பிரதமர் பதவியை ராஜினாமா செய்தார் மொரார்ஜி தேசாய். ஜூலை 28ல் புதிய பிரதமரானார் சரண்சிங். ஒவ்வொரு கட்சிகளிடமும் ஆதரவு கேட்டு நின்ற அவருக்கு அதிமுக போன்ற கட்சிகள் ஆதரவளித்தன. எனினும் பெரும்பான்மை கிடைக்கவில்லை.

கடைசியில், எந்த இந்திராவுக்கு எதிராக ஒன்று திரண்டு ஜனதா கட்சி உருவாக்கப்பட்டதோ அந்த இந்திராவிடமே சென்று காங்கிரஸ் கட்சியின் ஆதரவை கேட்டார் சரண்சிங். ஆனால்,  இந்திராகாந்தி ஆதரவு தர மறுத்ததால் ஐந்தரை மாதத்திலேயே சரண்சிங் தலைமையிலான அரசு கவிழ்ந்தது. நாடாளுமன்றம் கலைக்கப்பட்டு 1980 ஜனவரியில் இந்தியாவின் 8வது பொதுத் தேர்தல் அறிவிக்கப்பட்டது.

இதற்கிடையே, பதவி விலகிய மொரார்ஜி தேசாய் அரசியலுக்கு முழுக்கு போட்டு ஓய்வெடுக்க சென்று விட்டார். ஜனதா கட்சியை நிறுவிய ஜேபி என்ற ஜெயபிரகாஷ் நாராயணன் உடல்நலக் குறைவால் ஓதுங்கி விட்டார். ஜனதா கட்சியின் தலைவர்களுக்கிடையிலான மோதலால், சுதந்திரமடைந்த நாளில் இருந்தே ஏகபோகமாக ஆட்சி செய்து வந்த காங்கிரசுக்கு எதிரான மாற்று அரசியல் மூன்றே ஆண்டுகளில் கருகிப் போனது.

ஜனதா கட்சிக்குள் ஐக்கியமான பலவேறு கட்சிகள் வெளியேற தொடங்கின. சில கட்சிகள் பெயர்களை மாற்றி புது அவதாரம் எடுத்தன. அதில் ஒன்றுதான் பாஜக. 1977 தேர்தலுக்கு முன் ஜனதாவில் ஜனசங்கமாக நுழைந்த அந்த கட்சி 1980ல் பாஜகவாக மாறியது. இதற்கிடையே சரண்சிங் தலைமையில் ஒரு ஜனதா கட்சி, சந்திரசேகர் (பின்னாளில் இந்திய பிரதமராக இருந்தவர்) தலைமையில் மதசார்பற்ற ஜனதா கட்சி என இரண்டாக பிரிந்தது ஜனதா. 

இப்படியான அரசியல் சூழலுடன் 1980 பொதுத்தேர்தல் நெருங்கியது. தமிழகத்தை பொருத்தவரை  சரண்சிங் தலைமையிலான ஜனதா கட்சியுடன் எம்ஜிஆரின் அதிமுக கூட்டணி அமைத்தது. எதிரணியில் இந்திராவையும் அவரது எமர்ஜென்சி கால கொடுமையையும் மிகக் கடுமையாக எதிர்த்து வந்த கருணாநிதி தலைமையிலான திமுக, இந்திராவின் காங்கிரஸ் கட்சியுடனேயே கூட்டணி அமைத்தது. தேசிய அளவில் இந்திராவுக்கு எதிரான கட்சிகள் எல்லாம் பிளவுபட்ட நிலையிலேயே சந்தித்த 1980 பொதுத் தேர்தலில் மக்களின் முடிவானது ஒரு தகவலை சொல்லியது.

(நினைவுகள் சுழலும்)

- நெல்லை ரவீந்திரன்