என்னை கவர்ந்த புதுச்சேரி… 1

இங்கிலாந்தில் ஐ.சி.எஸ். பட்டம் பெற்று இந்தியா திரும்பி, ஆங்கிலேயருக்கு எதிராக வெடிகுண்டு போராட்டம் நடத்திய அரவிந்த் கோஷ் என்ற இளைஞரை பண்படுத்தி ஆன்மிக நாட்டத்தில் திருப்பியது, புதுச்சேரி மண். மறைவுக்கு பிறகும் ஸ்ரீ அரவிந்தர் என இந்த உலகத்தை திரும்பி பார்க்கச் செய்ததும் புதுச்சேரியே.

கொலை பாதகம் அறியாதவராக வளர்ந்த வாஞ்சிநாதனை, மணம் முடிந்து சில வாரங்களேயான அந்த இளைஞரை, சுதந்திர கனல் ஊட்டி, நெல்லை மாவட்ட ஆங்கிலேய கலெக்டர் ஆஷ் துரையை கொல்லும் அளவுக்கு துப்பாக்கி சுடும் பயிற்சி அளித்ததும் புதுச்சேரியே….

எழுத்து வெடிகுண்டு வீசியதால் ஆங்கிலேயரின் கோபத்துக்கு ஆளாகி, தன்னை நாடி வந்த சுப்பிரமணியை, மகாகவி பாரதியாக்கி அழகு பார்த்ததும் புதுச்சேரி மண் தான். தன்னுள் வந்த ஒவ்வொருவருக்கும் வெவ்வேறு விதமான அனுபவத்தை அளித்த புதுச்சேரி மண்ணில் எனக்கும் ஓர் ஐந்தாண்டு அனுபவம்…

அதன் ஈராயிரம் ஆண்டு பழமையை பற்றி ஒரு புத்தகம் எழுதியது…, பத்திரிகை பணியில் உயர்ந்த ஒரு இடம்…, சித்தர்களின் பூமியான புதுவையில், எனது தந்தையின் இறுதி மூச்சு அடங்கியது…., என மறக்க முடியா பல்வேறு அனுபவங்கள் நிறைந்தது, அந்த ஐந்தாண்டுகள்…

பல நூற்றாண்டு பழமை பற்றிய ஆய்வின்போது அகக்கண்ணால் நான் பார்த்த புதுச்சேரி, நிகழ் காலத்தில் புறக்கண்ணால் நான் கண்ட புதுச்சேரி… இரண்டுமே கண்ணில் நிழலாடுகிறது. அதை சுருக்கமாக பதிவு செய்வதில் மகிழ்கிறேன். அது, ஒரு குடியரசு நன்னாள்… அந்த நாளில் தான் முதன் முதலாக அந்த மண்ணில் அடியெடுத்து வைக்கும் பாக்கியம் எனக்கு வாய்த்தது….

(அனுபவம் இனிக்கும்…)

என்னை கவர்ந்த புதுச்சேரி - 0

மனித வாழ்க்கையில் பயணம் தவிர்க்க முடியாதது. உள்ளங் கைக்குள் உலகை சுருக்கும் முன்பே யாதும் ஊரே என உலகுக்கு உரத்த குரலில் உரைத்தவன் தமிழன். ஆயிரமாயிரம் ஆண்டுகளுக்கு முன்பே கடல் கடந்து பயணம் செய்து அந்த அனுபவங்களை பதிவு செய்த வரலாறும் உண்டு.
ஒவ்வொருவரின் அனுபவமும் வெவ்வேறு. ஓரிரு நாட்களின் பயண அனுபவமே பல நூறு கதைகளை நமக்கு சொல்லும். ஐந்தாண்டு வாழ்க்கை அனுபவம் என்றால்...?

நீரில் போடும் கோலம் போன்றது மனித வாழ்க்கை என்பது ராமாயணத்தில் கும்பகர்ணன் வழியாக கம்பர் கூறும் வார்த்தைகள். அதுபோன்ற இந்த நாடோடி வாழ்க்கையில் எனக்கு கிடைத்த பரவச அனுபவம் புதுச்சேரி வாழ்க்கை. 

மனதில் தோன்றுவதை எழுதிச் செல்லும் இந்த வழிப்போக்கன் மனதுக்குள் புதுச்சேரி அனுபவங்களையும் எழுதும் எண்ணம் துளிர் விடுகிறது. ஈராயிரம் ஆண்டு பழமையான புதுச்சேரி பற்றி எழுதிய கரங்களால் சமகால புதுவை குறித்து குறிப்புகளை எழுத விழைகிறேன்.

அனந்த ரங்க பிள்ளையின் நாட்குறிப்பாக இல்லாவிட்டாலும் எனக்குள் ஆனந்தம் தருவதாக இருக்கும் என நம்புகிறேன். உங்களுக்கும் கூட....

(அனுபவம் இனிக்கும்...)

சட்டை உரிக்கும் பாம்பு

முகத்தை பாறை மீது சரசரவென உரசியதும், ஆம்லெட் போடுவதற்கு மெதுவாக முட்டை ஓட்டை தட்டினால் மெலிதாக விரிசல் வருமே... அப்படி ஒரு விரிசல் உதடு பகுதியில் தோன்றும். அந்த விரிசலை சீரற்ற கருங்கல் அல்லது பாறையில் வாகாய் கோர்த்துக் கொள்ளும். கட்டிடத்தில் கயிறு போட்டு ஏறுவது போல இதுவும் முன்னேறிச் செல்ல போடப்படும் ஏற்பாடு.

உதட்டு வெடிப்பை பாறை இடுக்கில் நன்கு தோதாக மாட்டியதும் மெதுவாக வேலையை ஆரம்பிக்கும். வளைந்து நெளிந்து செல்வதுதான் இயல்பான குணம் என்றாலும் அந்த சமயத்தில் மட்டும் மூங்கில் கம்பு போல விறைப்பாக நீண்டு கிடக்கும். நீண்ட போராட்டத்துக்கு பிறகு பஞ்சு நுரை போல தலைப் பக்கத்தில் இருந்து வெளிவரத் தொடங்கும். அப்படியே தலையை நகல் எடுத்தது போல மற்றொரு தலை வெளியேறும்.

எலியையோ முட்டைகளையோ ஜீரணிக்க முடியாமல் துப்புவதை கேள்விப்பட்டு இருப்போம். இது தன்னையே துப்புவதை போன்றது. கிட்டத்தட்ட இரை எடுத்துக்கொண்டு நகர முடியாமல் கிடப்பது போலவே இப்போதும் கிடக்கும். தலை வந்த சிறிது நேரத்தில் மெல்ல மெல்ல முழு உடலும் வெளிவரத் தொடங்கும். இது குகைப் பாதையை கடந்து வெளி வரும் ரயில் போலவே இருக்கும். தலையை வெளியேற்றும்போது இருந்த சிரமம் இப்போது இருக்காது என்பதால் உடல் பகுதி சற்று வேகமாகவே வெளியேறிவிடும்.

வெளிர் மஞ்சள் நிறத்தில் தங்கத்தை உருக்கியது போல தக தகவென மின்னும் அந்த உயிர், உயிரற்று கிடக்கும் தனது கூட்டை இப்போது பார்க்கும். அதற்கு இது ஒரு புதுப்பிறவி. உடலை முழுமையாக வெளியேற்ற வசதியாக தோலில் சுரந்த பிசுபிசுப்பும் கலந்து ஒருவித மதமதப்புடன் மயங்கி கிடக்கும். நீண்ட நேரம் உடலை விரைப்பாக வைத்திருந்த களைப்போ என்னவோ அப்படியே சுருண்டு ஓய்வெடுக்கத் தொடங்கும்.

பாம்பு சட்டை உரிப்பதைத்தான் சொல்கிறேன்....

நல்ல பாம்பு, சாரை தொடங்கி தண்ணீர் பாம்பு பச்சை பாம்பு வரை பொது விதி இதுதான்.

சிறிய வயதில் ஊருக்கு தெற்கே இருக்கும் பரம்பு காட்டில் உள்ள கிணற்றில் இறங்கி குளிக்கும்போது சுவரில் (கல் பாறை) இதுபோன்ற பாம்பு சட்டைகள் தொங்குவதை வைத்து அதன் நடமாட்டத்தை அனுமானிப்போம். தண்ணீர் பாம்பு , பச்சை பாம்பு போன்றவை மனித பயமின்றி திடீரென கிளம்பி வருவதுண்டு. மற்றவை எல்லாம் ஆள் அரவமற்ற தருணங்களில் தான் அவற்றின் வேலைகளை செய்யும். நம்மை அவை கவனிக்காத தருணங்களில் மூச்சை பிடித்துக் கொண்டு உச்சி முதல் உள்ளங்கால் வரை பீதியில் உறைந்தபடி இது போன்ற அரிய நிகழ்வுகளை பார்த்ததுண்டு....

தேவதை மொழி..

வார்த்தைகள் இல்லா
வர்ணமற்ற பொழுதொன்றில் 
புருவத்தை சற்றே உயர்த்தி
கறுப்பு வெள்ளை விழிகளால்
வினா எழுப்பி நின்றாய்...
கண்களாலேயே
அபிநயம் பிடித்தபடி
புருவத்தை மட்டும்
சில கணம் நெளித்து
கண்ணின் மணிகளை
சுழற்றியபடி நீ எழுதிய
எழுத்தில்லா சொற்காவியங்கள்
காற்றில் நீந்தி வந்து
என்னை சேர்ந்த சமயத்தில்
கற்றுக் கொள்ள தொடங்கினேன்
தேவதை விழி மொழியை...

மனித நேயம்....

உலகெலாம் உறவென
பூச்செண்டு கரம் நீட்டிய
பூங்குன்றனாரும்
வாடிய பயிர் கண்டு
வாடிய வள்ளலாரும்
அவதரித்த மண் இது...

சமய குரோதங்கள்
சங்கறுத்து நிற்க
சாதி பேதங்களும்
சுற்றி நின்று அச்சுறுத்த
வீச்சரிவாளின் நுனியில்
பேச்சின்றி கிடக்கிறது
இன்றைய மனித நேயம்...

கடல் கடந்த தேசத்தின்
ஐந்தறிவு ஜீவனுக்கும்
கண் காணா ஊரில்
துடிக்கும் உயிருக்கும்
கண்ணீர் வடிக்கும்
இதயங்களில் இருந்து
கண்ணெதிரில் நசுங்கும்
மனித நேயத்துக்காக
துளியும் ஈரமில்லை....

இனி ஒரு விதி செய்வோம்
நம் வீதிகளில் இருந்தே
மனித நேய சாலையை
செப்பனிடுவோம்...

தொடங்கும் இப்பணியால்
நாளைய நம் உலகில்
மனித நேயம் பூச்செடி
மலர்ந்து மணம் வீசட்டும்...
சாதி சமய மாச்சரியங்கள்
அதற்கு எருவாகட்டும்...

நவீன மனு நீதி

ஆராய்ச்சி மணி ஒலிக்க
யாரங்கே என விளித்தான்
நவீன மனு நீதி
சேதியுடன் வந்தனர்
சேனையின் வீரர்கள்

கண்ணீருடன் நிற்கிறது
அபலை பசு ஒன்று
இளவரசர் தேரில் சிக்கி
சிதைந்து போனதாம்,
அந்த பசுவின் கன்று...

யோசித்தான் மனு நீதி,
பின்னர், அழைத்தான்...
லகுட பாண்டிகளுள்
ஒரு அப்பாவி
லகுட பாண்டியை

பசுங் கன்றின்
உயிர் கொலைக்கு
காலையில் விசாரணை
தப்பாமல் ஆஜராகுமாறு
ஆணையிட்டான்

வீட்டுக்கு மானியம்
குழந்தைகளுக்கு சொத்து
மனைவிக்கு அரண்மனை பணி
அடுக்கடுக்காக வழங்கினான்
நவீன மனு நீதி

விசாரணை மண்டபம்...
தேருக்கு முன் சென்றது
பசுவின் குற்றமாக கருதி ...
தேரோட்டிக்கு விதித்தனர்
ஆயுள் தண்டனை

புகார் இந்திர விழாவில்
கருணையின் பேரில்
தேரோட்டியை விடுவிக்கலாம்
மனு நீதியும், மகனும்
மனதினுள் யோசித்தனர்

நீதியை யாசித்த பசுவின்
கண்ணீர் உறைந்தது
பசுவும் கல்லாய் சமைந்தது
நவீன மனு நீதி சோழன்
மகிழ்கிறான், மகனுடன்...

கழுதை....

கழுதை கெட்டா குட்டிச் சுவரு. இந்த பழமொழியை எல்லோரும் கேட்டிருப்போம். ஆனால், கழுதை என்ற விலங்கை இன்றைய தலைமுறையினரில் எத்தனை பேர் நேரில் பார்த்திருப்பார்கள்...? இது கொஞ்சம் யோசிக்க வேண்டிய விஷயம்.

முன்பெல்லாம், கிராமங்களில் வீடு, வீடாக அழுக்குத் துணிகளை சேகரித்து கழுதை மீது பெரிய பொட்டலமாக (பொதி மூட்டை) கட்டி, துவைப்பதற்கு கொண்டு செல்வார்கள். அந்த தொழிலில் ஈடுபடுவோர், அதற்கென வீடுகளில் கழுதைகளை வளர்த்து வந்தனர். அதிக அளவில் அழுக்கு இருக்கும் துணியை வீட்டில் வெள்ளாவி (வெந்நீரில் துணியை வேக) வைத்துக் கொள்வார்கள். அதன்பிறகு, ஊருக்கு வெளியே உள்ள குளம், ஊருணி போன்றவற்றில் துவைத்து கழுதையின்மீது ஏற்றி கொண்டு வருவார்கள். விசேஷ தினங்கள் தான் கழுதைக்கு விடுமுறை தினம்.

எங்கள் ஊரில் சித்திரை மாத கொடை விழாவின்போது, ஊரில் உள்ள கழுதைகள் எல்லாம் ஒட்டு மொத்தமாக ஒரு இடத்தில் கூடி நிற்கும். கழுதை வாலில் பட்டாசு கொளுத்தி ஓட விடுவதும், பனை ஓலையை கட்டி விடுவதும் சிறிய வயது விளையாட்டுகள். தனக்கு பின்னால் இருந்து வினோதமாக ஒரு சத்தம் கேட்கத் தொடங்கியதும் அச்சத்தில் கழுதை ஓட்டம் பிடிக்க, அந்த சத்தமும் அதன் பின்னாலேயே செல்வதால் மிக வேகமாக ஓட்டம் பிடிக்கும்.

இப்போது குளமும் இல்லை. ஊருணியும் இல்லை. கழுதையும் இல்லை. இது வாஷிங் மெஷின் காலம். வீதிகளில் சின்ன சின்ன சில்மிஷங்கள் செய்து ஓடி விளையாண்ட சிறுவர்களும் இப்போது இல்லை. ஏனென்றால், இது டெம்பிள் ரன் காலம். அதனால் தான், ‘என்னைப் பார் யோகம் வரும்’ என்ற அதிர்ஷ்ட சட்டங்களுக்கு இடையே புகைப்படமாக மாறி விட்டது, கழுதை.

= பாரு. இங்க ஒரு கழுத கம்ப்யூட்டர் முன்னால ஒக்காந்துகிட்டு பழச கிளறிகிட்டு இருக்கு..ன்னு ‘சின்ன கவுண்டர்’ கவுண்டமணி பாணியில நீங்க நெனைக்கிறது எனக்கு கேட்குது...

தமிழக சட்டப்பேரவை தேர்தல் வரலாறு ... 36

= வை.ரவீந்திரன்

தமிழகத்தில் தற்போது அறிவிக்கப்பட்டுள்ள 2016 சட்டப்பேரவை தேர்தலில் புதிய வாக்காளர்களின் எண்ணிக்கை ஒரு கோடியை தாண்டும். அதாவது, கால்பங்கு வாக்காளர்களின் வயது 18 முதல் 22க்குள் தான். தமிழக சட்டப்பேரவை வரலாறு குறித்த தகவல்களை அவர்கள் அறிந்து கொள்ளவே இந்த பதிவை தொடர்ச்சியாக எழுதி வந்தேன். 

1996 தேர்தலுக்கு பிறகு, தமிழக அரசியலில் குறிப்பிடத்தக்க அளவுக்கு பெரிய மாற்றம் எதுவும் நிகழவில்லை. திமுக, அதிமுக என இரண்டு கட்சிகளும் மாறி, மாறி ஆட்சியை பிடித்து வருகின்றன. சுமார் 30 ஆண்டுகளாக கருணாநிதியும் ஜெயலலிதாவும் எதிர் எதிராக மல்லுக்கட்டிக் கொண்டிருக்கின்றனர். நடுவில் அவ்வப்போது சில கட்சிகளும் அணிகளும் பூதாகரமாக காணப்பட்டாலும் கூட, இவர்களை தவிர்த்து யாருமே வெற்றி பெற்றதில்லை

உதாரணமாக, 1996 தேர்தலில் மார்க்சிஸ்ட்டுடன் கூட்டணி வைத்து 177 தொகுதிகளில் வேட்பாளர்களை நிறுத்திய மதிமுக கட்சியாகட்டும், 2006ம் ஆண்டு தேர்தலில் புதிதாக தோன்றிய விஜயகாந்த் தலைமையிலான தேசிய முற்போக்கு திராவிட கழகமாகட்டும் தேர்தல் நேரத்தில் மட்டுமே சலசலப்பை ஏற்படுத்தின. வேறு எந்த விளைவுகளையும் ஏற்படுத்த முடியவில்லை. தற்போது, 2016 தேர்தலிலும் மக்கள் கூட்டணி, பாமக என தேர்தல் களத்தில் பரபரப்பு தொற்றியுள்ளது. முடிவு மே 19ல் தெரியும்.

2006 தேர்தலைத் தொடர்ந்து 96 எம்எல்ஏக்களை மட்டுமே வைத்து பெரும்பான்மை பலமின்றி 5 ஆண்டு காலம் ஆட்சி செய்த கருணாநிதி சாதனை குறிப்பிடத்தக்கது. 1996 தேர்தல் வெற்றிக்கு பிறகு ஜெயலலிதாவை கருணாநிதி அரசு கைது செய்ததும் அதன்பின்னர், 2001 தேர்தல் வெற்றிக்கு பிறகு கருணாநிதியை ஜெயலலிதா அரசு கைது செய்ததும் வரலாற்று பதிவுகள்.

இடையே, 2011 தேர்தலுக்கு முன்பாக 2008ம் ஆண்டில் சட்டப்பேரவை தொகுதிகளின் எல்லைகள் மறு சீரமைப்பு செய்யப்பட்டன. அதனால், சில தொகுதிகள் மாயமாகின (உம்: சென்னையில் பூங்காநகர், புரசைவாக்கம்) சில புதிய தொகுதிகள் உதயமாகின (உம்: சென்னையில் மாதவரம்). எனினும், சட்டப்பேரவை தொகுதிகளின் மொத்த எண்ணிக்கை 234 என்பதில் மாற்றமில்லை. வாக்காளர் எண்ணிக்கை மற்றும் மக்கள் தொகை அடிப்படையில் நடைபெற்ற இந்த சீரமைப்புக்கு பிறகு, பாராளுமன்ற தொகுதிகளுக்கு அடங்கிய சட்டப்பேரவை தொகுதிகளிலும் மாற்றம் ஏற்பட்டது. அதன்படியே, 2009 பாராளுமன்ற தேர்தல் நடந்தது.  

தேசிய அரசியலைப் பொறுத்தவரையிலும் அரசியலில் சோனியா அடியெடுத்து வைத்தது, பாஜக வளர்ச்சி என்பது போன்ற தகவல்களையும், 1996 முதல் கடந்த 20 ஆண்டு கால தமிழக சட்டப்பேரவை தேர்தல் வரலாற்றை பல்வேறு தரப்பினரும் அலசுவதால் அவற்றில் இருந்து தமிழக தகவல்களையும் புதிய வாக்காளர்கள் பெற்றிருப்பார்கள் என்ற நம்பிக்கையுடன் எனது இந்த தொடரை தற்போதைக்கு நிறைவு செய்கிறேன்.

மீண்டும் வேறு ஒரு களத்தில் ... 
வேறு ஒரு சந்தர்ப்பத்தில் ... 
சந்திப்போம் நண்பர்களே ...

நன்றி

தமிழக சட்டப்பேரவை தேர்தல் வரலாறு ... 35

= வை.ரவீந்திரன் 

 

1991 தேர்தலுக்கு பிறகு தமிழகத்தில் அமைந்த ஜெயலலிதா ஆட்சி காலத்தில் பல்வேறு ஊழல் புகார்கள் எழுந்தன. வளர்ப்பு மகன் திருமணம், கும்பகோணம் மகாமகம் கூட்ட நெரிசலில் பக்தர்கள் பலி என சர்ச்சைகள் வரிசை கட்டி நின்றன. மத்தியிலும் நரசிம்ம ராவ் ஆட்சியின் மீது ஊழல் புகார்கள் எழுந்தன. ஜார்கண்ட் முக்தி மோர்ச்சா எம்பிக்களுக்கு லஞ்சம் கொடுத்த வழக்கு என தொடர்ந்தது.

1991 தேர்தலுக்கு பிறகு தான், தமிழகத்தில் ஐந்து ஆண்டுகளுக்கு ஒருமுறை தேர்தல் நடைபெறும் வழக்கம் இடைவிடாமல் தொடருகிறது என்பது குறிப்பிடத்தக்கது. இத்தகைய சூழ்நிலையில், 1996ம் ஆண்டு சட்டப்பேரவைக்கும், பாராளுமன்றத்துக்கும் சேர்ந்து தேர்தல் அறிவிக்கப்பட்டது. அப்போது, அதிமுக கூட்டணி தொடரும் என காங்கிரஸ் மேலிடம் சார்பாக பிரதமர் நரசிம்ம ராவ் அறிவித்தார்.

உடனே, ஊழல் குற்றச்சாட்டுக்கு ஆளான அதிமுகவுடன் கூட்டணி வைக்கக் கூடாது என்று கூறி மூப்பனார் தலைமையில் ஒரு பிரிவினர் போர்க்கொடி தூக்க, சத்தியமூர்த்தி பவனில் கலவரம் ஏற்பட்டது. பெரும்பான்மையானோர் மூப்பனார் வசம் இருந்ததால் தமிழ் மாநில கட்சி தோன்றி, திமுகவுடன் கூட்டணி அமைத்தது. இந்த கூட்டணிக்கு ரஜினி காந்த் கொடுத்த ‘வாய்ஸ்’, தானாக முன் வந்து நடிகர் சரத்குமார் மேற்கொண்ட பிரச்சாரம் என டாப் கியரில் ஓடியது. 

மறுபுறம், ஊழல் கூட்டணி என்று முத்திரை குத்தப்பட்ட அதிமுக, காங்கிரஸ் கூட்டணி பரிதாபமாக இருந்தது. இந்த தேர்தலில் தான் முதன் முறையாக, திமுகவில் இருந்து பிரிந்து சென்ற வைகோ தலைமையிலான மதிமுக போட்டியிட்டது. திமுக அணியில் இந்திய கம்யூனிஸ்ட் கட்சியும் மதிமுக அணியில் மார்க்சிஸ்ட் கம்யூனிஸ்ட் கட்சியும் இணைந்திருந்தன.    

  

1996ம் ஆண்டு மே 2ம் தேதி நடந்த தேர்தலில் திமுக / தமாகா கூட்டணி 221 தொகுதிகளை கைப்பற்றி அமோக வெற்றி பெற்றது. 4வது முறையாக தமிழக முதல்வரானார் கருணாநிதி. தமாகாவுக்கு எதிர்க்கட்சி அந்தஸ்து கிடைத்தது. பர்கூர் தொகுதியில் திமுகவின் அறிமுக வேட்பாளர் சுகவனத்திடம் முதல்வர் ஜெயலலிதா தோல்வி அடைந்தார். அதுபோல, விளாத்திகுளம், சிவகாசி என இரண்டு இடங்களில் போட்டியிட்ட வைகோவும் தோல்வி அடைந்தார்.

(நினைவுகள் சுழலும்)

தமிழக சட்டப்பேரவை தேர்தல் வரலாறு ... 34

= வை.ரவீந்திரன்

தமிழக சட்டப்பேரவைக்கு 1991ல் தேர்தல் நடந்தபோது, பாராளுமன்றத்துக்கும் மூன்று கட்டங்களாக தேர்தல் அறிவிக்கப்பட்டது. தமிழகத்தில் அரசியல் கட்சிகள் ஆயத்தமாக தொடங்கின. அதிமுகவும் காங்கிரஸ் கட்சியும் கூட்டணி அமைத்தன. ‘எம்ஜிஆர் பார்முலா’ படி சட்டப்பேரவைக்கு அதிக தொகுதிகளில் (168) அதிமுகவும் பாராளுமன்றத்துக்கு அதிக தொகுதிகளில் (26) காங்கிரசும் போட்டியிட்டன. 

 திமுக அணியில் இரண்டு கம்யூனிஸ்ட் கட்சிகளும், ஜனதா தளம் கட்சியும் இடம் பெற்றன. அப்போது, ஜனதா தளம் கட்சியின் தலைவராக நடிகர் திலகம் சிவாஜி கணேசன் இருந்தார். மேலும், ஜெயலலிதாவுடன் கருத்து மோதலால் அதிமுகவில்  வெளியேறிய திருநாவுக்கரசு, சாத்தூர் ராமச்சந்திரன் ஆகியோரும், தாயக மறுமலர்ச்சி கழகம் நடத்தி வந்த நடிகர் டி.ராஜேந்தரும் திமுக அணியில் இணைந்தனர்.

ஆட்சிக் கலைப்புக்கு நியாயம் கேட்டு திமுக பிரச்சாரம் செய்தது. அதே நேரத்தில் சட்டம் ஒழுங்கு கெட்டு விட்டதாகவும் விடுதலைப்புலிகளுக்கு ஆதரவாக திமுக செயல்படுவதாகவும் அதிமுக கூட்டணி பிரச்சாரம் செய்தது. இந்த நிலையில், பாராளுமன்றத்துக்கு முதல்கட்டமாக தேர்தல் அறிவிக்கப்பட்ட தொகுதிகளுக்கு 1991 மே 20ம் தேதி அன்று வாக்குப்பதிவு முடிந்தது. 

அதற்கு மறுநாளில் தேசத்தையே உலுக்கிய கோர சம்பவம் ஒன்று, தமிழ் மண்ணில் நடந்தது. தமிழகத்தில் தேர்தல் பிரச்சாரத்துக்காக வந்த முன்னாள் பிரதமர் ராஜீவ் காந்தி, மே 21 அன்று சென்னை அருகே ஸ்ரீபெரும்புதூர் கூட்டத்தில் விடுதலைப் புலிகளால் படுகொலை செய்யப்பட்டார். இதைத் தொடர்ந்து, நாடு முழுவதும் தேர்தல் ஜூன் மாதத்துக்கு தள்ளி வைக்கப்பட்டது. 

அதன்படி, ஜூன் மாதம் தேர்தல் நடைபெற்றது. ராஜீவ் படுகொலையால் எழுந்த அலையில், 225 தொகுதிகளை அதிமுக கூட்டணி கைப்பற்றியது. 164 தொகுதிகளில் அதிமுக வெற்றி பெற்றது. காங்கேயம், பர்கூர் என இரண்டு தொகுதியில் வெற்றி பெற்ற ஜெயலலிதா, தமிழக முதல்வராக தேர்வானார். 1991ம் ஆண்டு ஜூன் 24ம் தேதி தமிழக முதல்வர் பதவியை ஏற்றபோது அவருக்கு வயது 43. தமிழகத்தில் மிக இளம் வயதில் முதல்வர் பதவியேற்ற பெருமை ஜெயலலிதாவையே சேரும்.

திமுக கூட்டணிக்கு 7 இடங்கள் மட்டுமே கிடைத்தன. சென்னை துறைமுகம் தொகுதியில் வெற்றி பெற்றிருந்த கருணாநிதி, அந்த பதவியை ராஜினாமா செய்தார். அதிமுக இணைப்பை எதிர்த்த பி.எச்.பாண்டியன், சுயேச்சையாக சேரன்மாதேவி தொகுதியில் வெற்றி பெற்றார். இந்த சட்டப்பேரவை தேர்தலில்தான் முதன் முறையாக பாமக களம் இறங்கியது. அந்த கட்சி சார்பாக பண்ருட்டி தொகுதியில் இருந்து பண்ருட்டி ராமச்சந்திரன் வெற்றி பெற்றார்.

சட்டப்பேரவை தேர்தலுடன் நடந்த பாராளுமன்ற தேர்தலில் தமிழகத்தில் உள்ள அனைத்து 39 தொகுதிகளையும் அதிமுக கூட்டணி வென்றது. மத்தியில் காங்கிரஸ் சார்பாக பிரதமரானார் பி.வி.நரசிம்மராவ்.

(நினைவுகள் சுழலும்)