Tuesday, 20 June 2023

அறிந்த பொக்கிஷம்... அறியாத பவளங்கள் -53

 சினிமாவில் மிக உச்சம் பெற்றவர் கிடையாது. முழுக்க முழுக்க நாயகியும் இல்லை. ஆனால் 35 ஆண்டுகளுக்கு மேல் இரண்டு தலைமுறை ரசிகர்களுக்கு பரிச்சயமானவர், ரம்யா கிருஷ்ணன்.  

மலையாளம்,  தமிழ், தெலுங்கு, கன்னடம், இந்தி இப்படி ஐந்து மொழிகளில் நடித்திருக்கும் அவருக்கு தமிழில் முதல் படம் 'வெள்ளை மனசு'. 1986ல் வந்த அந்த படத்தின் ஹீரோ ஒய்.ஜி.மகேந்திரன்.! இதே போல கவுண்டமணி ஹீரோவாக நடித்த படங்களில் ஒன்றான 'ராஜா எங்க ராஜா' படத்தின் ஹீரோயினும் இவர்தான். ஆரம்ப கால சத்யராஜின் 'முதல் வசந்தம்' படத்திலும் நாயகி. இப்படி நாயகியாக நடித்தாலும்  முன்னணி நடிகர்களின் படங்களில் இவர் துணை நாயகிதான்.


'படிக்காதவன்' படத்தில் ரஜினியின் தம்பி மனைவி, 'பேர் சொல்லும் பிள்ளை' படத்தில் கமலுக்கு தங்கை, விஜயகாந்தின் 100வது படமான 'கேப்டன் பிரபாகரனில்'  சரத்குமாரின் காதலி இப்படியாகவே சென்ற ரம்யா கிருஷ்ணன் நடிப்புக்கு தீனி போட்டது 'படையப்பா' நீலாம்பரி கேரக்டர். 

அதுவே திருப்பு முனையாக அமைய, பத்து ஆண்டுகளுக்கு பின் தமிழில் மீண்டும் பிசியானார். பிரபுவுடன் 'பட்ஜெட் பத்மநாபன்', சரத்குமாருடன் 'பாட்டாளி'. கமலுடன் 'பஞ்ச தந்திரம்' என சிக்ஸரடித்தார். பஞ்ச தந்திரம்  மேகி அலைஸ் மரகதவல்லிக்கு கிட்டத்தட்ட 40 வயசு!

கூடவே, 1990களின் இறுதியில் தமிழ் திரையுலகில் அம்மன் படங்கள் என்றால் கூப்பிடு ரம்யாவை என்ற நிலைமைதான். 'ராஜகாளி அம்மன்', 'பொட்டு அம்மன்', 'அன்னை காளிகாம்பாள்', ' ஸ்ரீ ராஜ ராஜேஸ்வரி',  இப்படி பலவிதமான அம்மன் அவதாரத்தில் தூள் கிளப்பினார்.


அப்புறம் கொஞ்சம் ஓய்வெடுத்து படங்களை குறைத்துக் கொண்டாலும் பிற மொழிகளில் ஆதிக்கம் செலுத்திய இந்த 80ஸ் நாயகியை 2கே கிட்ஸ்களுக்கும் அறிமுகம் செய்து வைத்தது 'பாகுபலி'. உலக அளவில் சினிமா ரசிகர்களிடம்  ராஜமாதா சிவகாமியாக ரம்யாவை கொண்டு சேர்த்தது 'பாகுபலி'. 

"இதுவே என் கட்டளை... என் கட்டளையே சாசனம்..." இந்த வசனம் அவரால்தான் உயிர் பெற்றது. கம்பீரம், அசால்ட்டான பார்வை, அலட்சியமான வசன உச்சரிப்பு இதுதான் ரம்யாவின் அடையாளம். இதுதான் 'குயின்' என ஜெயலலிதா வேடத்தில் அவரை நடிக்க வைத்தது.

சூர்யாவுடன் 'தானா சேந்த கூட்டம்', சிம்புவுடன்  'வந்தா ராஜாவாத்தான் வருவேன்' என இன்றைய தலைமுறை வரை நடித்து விட்டார். 

1980களில் வெளியான படங்களின் ரம்யாவையும் இன்றைய ரம்யாவையும் பாருங்கள். மொத்தமாகவே மாறி இருப்பார். இன்று வரை பெரிய திரை சின்னத்திரை என கலக்கும் ரம்யாவின் அழகில் மயங்காதோர் யார்...?


"வயசானாலும் ஒன் அழகும் ஸ்டைலும் இன்னும் கொறையல..."

இந்த டயலாக் படையப்பாவுக்கு மட்டுமல்ல, நீலாம்பரிக்கும்தான்...

#நெல்லை_ரவீந்திரன்

Friday, 16 June 2023

கரகாட்டக்காரன்... நினைவுகள்...

 தமிழ் சினிமாவில் என்றென்றும் நினைவில் இருக்கும் படங்களில் ஒன்று 'கரகாட்டக்காரன்', வெளியாகி 35 ஆண்டுகளாகி விட்டது. எவ்வளவு வேகமான கால ஓட்டம். ஏழெட்டு ஆண்டுக்கு முன் வந்த 'ரஜினி முருகன்' படத்தில் கூட 'கரகாட்டக்காரன்' வாழைப்பழ காமெடி வசனம் வரும். அதுதான் அந்தப் படத்தின் காலத்தை வென்ற வெற்றி.



இன்றைய டிஜிடல் யுகம் மாதிரி, 1990களில் ஒரே நேரத்தில் எல்லா தியேட்டர்களிலும் புதிய படங்கள் வெளியாகாது. முதலில் பெரிய நகரங்கள், சிறிய நகரங்கள் என படிப்படியாக ரிலீசாகி டூரிங் டாக்கீஸ் வரை வந்து சேர ஒரு வருடம் வரை பிடிக்கும். ஆனால் இந்த படம்  பஞ்சாயத்து அளவிலேயே இருந்த எங்கள் ஊரிலும் கூட முதன் முறையாக நேரடியாக ரிலீசானது. அதுவும் இரண்டு தியேட்டர்களில். ஒன்றில் முப்பது நாட்களும் மற்றொன்றில் பதினைந்து நாட்களும் ஓடியது. மொத்தம் 45 நாட்கள்.

கியூப் டிஜிடல் தொழில்நுட்பம் எல்லாம் கிடையாது. பிலிம் சுருள் பெட்டிதான். ரெண்டு தியேட்டருக்கும் ஒரே ஓனர் என்பதால் ஒரே பிலிம் சுருள் ரெண்டு தியேட்டருக்கும் மாறி மாறி பயணம் செய்யும். அது ஒரு வித்தியாசமான சினிமா காலம். படம் பார்க்க செல்வதே திருவிழா மாதிரி தான். என்னுடைய பள்ளித் தோழன் ஒருத்தனுக்கு திருக்குறளோ, தமிழ் செய்யுளோ கூட மனப்பாடமாக தெரியாது. ஆனால் முழு படத்தின் வசனங்களையும் சீன் பை சீனாக மனப்பாடமாக சொல்லுவான். அந்தளவுக்கு 'கரகாட்டக்காரன்' மயக்கம் பட்டி தொட்டியெங்கும் பரவி கிடந்தது.

சிவாஜி கணேசன், பத்மினி நடித்த 'தில்லானா மோகனாம்பாள்' படத்தை எம்ஜிஆருக்கு ஏற்ற வகையில், திரைக்கதை அமைத்து அதை 1990ஸ் தமிழ் சினிமாவுக்கு ஏற்ற மாதிரி வெற்றி பார்முலா படமாக உருவாக்கினால்...

அதுதான் 'கரகாட்டக்காரன்'...

கதைப்படி பார்த்தால் சாதாரண மசாலா படம் தான். பெரிதாக ஒன்றும் இல்லை தான். ஆனால் ரசிகர்களால் பெரிதாக கொண்டாடப்பட்ட படம். அந்த அளவுக்கு சரி விகிதமாக சமைத்து சுவையும் ருசியுமாக பரிமாறப்பட்ட புல் மீல்ஸ்.

தமிழ் சினிமாவின் பல்துறை வித்தகர் கங்கை அமரனின் இயக்கத்துக்கும் பாடல்களுக்கும் இந்த படம் ஒன்றே மிகப் பெரும் சாட்சி. 1980, 90களில் மோகன், ராமராஜன் என பல ஹீரோக்களை தனது பாடல்களாலேயே ரசிகர்களிடம் கொண்டு சேர்த்த இளையராஜா, இதில் தனி ஆவர்த்தனமே பண்ணி இருப்பார். 


'வைதேகி காத்திருந்தாள்' படத்தின் ஆல் இன் ஆல் அழகுராஜாவோட "பெட்ரோ மாக்ஸ் லைட்" காமெடிக்கு பிறகு கவுண்டமணி, செந்தில் ஜோடியை இன்று வரை நினைவு படுத்தும் 'வாழைப்பழ காமெடி'. 2கே கிட்ஸ் வரையிலும் உச்சரிக்கும் "சொப்பன சுந்தரி" என்ற பெயர். பீலா விடுபவர்களுக்காகவே சொல்லப்படும் கவுண்டமணியின் "என்னடா கலர் கலரா ரீலா விடுற..." இது மாதிரியான காலம் கடந்தும் பேசப்படும் ஸ்பெஷல் அயிட்டங்கள் கரகாட்டக்காரனில் ஏராளம்.

கிராமத்து கலைஞர்களுக்கே உரித்தான குசும்புகளுடன் கவுண்டமணி, செந்தில் மற்றும் கரகாட்ட கோஷ்டிகள் காமெடியில் பின்ன, அவர்களுக்கு இணையாக கோவை சரளாவும் கலக்க, முதன் முறையாக இயக்குநர் சந்தான பாரதி வில்லனாக மிரட்ட, ராமராஜன்- கனகா காதலுடன் காந்தமாக கவர்ந்து இழுத்தது 'கரகாட்டக்காரன்'. திரும்ப திரும்ப தியேட்டருக்கு போய் படத்தை பார்த்தவர்களும் உண்டு.


வரைந்து வைத்தது போன்ற உதடுகளும் உருண்ட விழிகளுமாக மயக்கிய கிராமத்து குமரியான கரகாட்டக்காரி கனகா, இன்னமும் மனதுக்குள் ஜில்லென பனி மழை பொழிகிறார். 

கூடவே, 

"சாமத்தில வாரேன், யம்மா சாமந்திப் பூ தாரேன். கோபப்பட்டு பார்த்தா, யம்மா வந்த வழி போறேன்..."

"மானே, மயிலே, மரகத குயிலே... தேனே நான் பாடும் தெம்மாங்கே... பூவே பொழுதே பொங்கி வரும் அமுதே..."

என்ற வரிகளும் ரீங்காரமிட்டுக் கொண்டே இருக்கிறது, ஆண்டுகளைக் கடந்தும்...

இன்று கரகாட்டக்காரன் வெளியான நாள் ஜூன் 16, 1989

#நெல்லை_ரவீந்திரன்

Thursday, 15 June 2023

அறிந்த பொக்கிஷம்... அறியாத பவளங்கள் -52

 'அமைதிப்படை' அமாவாசைன்னா இன்னைக்கு வரை சத்யராஜ் பெயர்தான் எல்லோர் நினைவுக்கும் வரும். ஆனா, அதுக்கு பின்னால முன்னால பக்கத்திலன்னு எல்லா பக்கமும் இருந்த ஒரே ஆளு மணிவண்ணன் தான்.  ரெண்டு பேருமே ஆரம்ப கால நண்பர்கள்.



 1979ல் பாரதிராஜாகிட்ட கதாசிரியரா, அசிஸ்டண்ட் இயக்குநரா உதவியாளரா சேர்ந்து 'அலைகள் ஓய்வதில்லை' மாதிரி சில படங்கள் எல்லாம் பண்ணிட்டு முதன் முதலா 1982ல் மணி வண்ணன்  இயக்கிய படம் 'கோபுரங்கள் சாய்வதில்லை'. மோகன், சுகாசினி, ராதா நடிச்ச அந்த படம் சூப்பர் டூப்பர் ஹிட்.

அதுக்கு அப்புறம் இளமை காலங்கள் 'நூறாவது நாள்', '24 மணி நேரம்', 'விடிஞ்சா கல்யாணம்', 'சின்னத் தம்பி பெரிய தம்பி', 'முதல் வசந்தம்', 'பாலைவன ரோஜாக்கள்', 'ஜல்லிக்கட்டு', 'கனம் கோர்ட்டார் அவர்களே', 'முதல் வசந்தம்', 'புது மனிதன்,' 'தெற்கு தெரு மச்சான்'-ன்னு மணிவண்ணன் இயக்குன படங்கள் எல்லாம் சூப்பர் ஹிட். 

மொத்தம் 50 படங்கள் இயக்கம். அதில் சரி பாதி அவரது நண்பர் சத்யராஜ் நடிச்சது. 1982ல் ஆரம்பிச்சி 'அமைதிப் படை', 'நாகராஜ சோழன் எம்.ஏ. வரை 2013 வரை முப்பது வருஷத்துக்கு மேல படங்களை இயக்கியவர் மணிவண்ணன். சிவாஜி கணேசனையும் இயக்கி இருக்கிறார்.

ஆரம்பத்திலருந்தே 'கல்லுக்குள் ஈரம்', 'நிழல்கள்' மாதிரி சில படங்கள்ல குட்டி குட்டி வேஷத்தில நடிச்சிருக்காரு. ஆனா முழு நீள வில்லனா பெரிய கேரக்டரில அவர் நடிச்ச படம் 'கொடி பறக்குது'. அதில் ரஜினிக்கு வில்லன். பாரதிராஜா இயக்கத்தில் வெளியான அந்த படத்தில மணிவண்ணனுக்கு டப்பிங் குடுத்தவர், பாரதிராஜா.



அதுக்கு அப்புறம் இயக்கத்தோட கூடவே நிறைய படங்கள்ல நடிக்க ஆரம்பிச்சாரு மணிவண்ணன். அப்பிடி அவர் நடிச்ச படத்தோட மொத்த எண்ணிக்கை 400ஐ தொடும்.

சிவாஜி, ரஜினி, கமல், கார்த்திக், பிரபு, அர்ஜுன், பார்த்திபன், விஜய், அஜித் என எல்லா நடிகர்களுடனும் நடிச்ச பெருமை மணிவண்ணனுக்கு உண்டு. 

அப்பா, வில்லன், துணை கதாபாத்திரம்னு எல்லாவற்றிலும் கலந்து கட்டி துவம்சம் பண்ணியவர், மணிவண்ணன்.  20 ஆண்டு கால தீவிர நடிப்பு வாழ்க்கையில் ஒரு படத்தில் கூட அவரது நடிப்பு சோடை போனது கிடையாது. அரசியல் நக்கல் நையாண்டி வசனங்களை பேசிய துணிச்சல்காரர். 

அதே நேரத்தில், 'உள்ளத்தை அள்ளித்தா', 'சூரிய வம்சம்', அவ்வை சண்முகி, 'முறைமாமன்' மாதிரி பல படங்களை பார்த்தால் முழு நேர காமெடியன்களுக்கே டஃப் கொடுத்திருப்பார். ரெண்டு முறை தமிழக அரசின் சிறந்த காமெடியன் விருதையும் வாங்கி இருக்கிறார், மணிவண்ணன்.



'கோகுலத்தில் சீதை' போன்ற பல படங்களில்  தந்தை வேடத்துக்கு மிக பொருத்தமானவரா பார்க்கலாம். 'கொடி பறக்குது' மாதிரியே பல படங்கள்ல கொடூரமான வில்லனாவும் மணிவண்ணனை பார்க்கலாம். சத்யராஜ், கவுண்டமணியோடு இவரும் சேர்ந்து விட்டால் அன்லிமிட் லூட்டிக்கு 100 சதவீதம் கேரண்டி.



கதாசிரியர், டைரக்டர், அப்புறம் நடிகரா பார்த்தால் காமெடியன், வில்லன், குணச்சித்திரம்னு எல்லா விதத்திலயும் தமிழ் சினிமாவ கலக்கின மணிவண்ணனுக்கு பல பாடல்கள்ல நடிக்கிற வாய்ப்பும் உண்டு. அப்பிடி மணிவண்ணன் பாடுற எல்லா பாடல்களிலயும் இசையமைப்பாளர் தேவாவோட குரல் மிக பொருத்தமா இருக்கும் மணிவண்ணனே பாடுற மாதிரி இருக்கும்.



தமிழ் சினிமா மிக சீக்கிரமா இழந்த ஜாம்பவான்கள்ல மணிவண்ணனும் ஒருத்தர். 30 வருஷத்துக்கு மேல சினிமாவில இருந்த அவர் 50 பிளஸ் வயசிலேயே மறைந்தது தமிழ் திரைக்கு பெரிய இழப்பு.

#நெல்லை_ரவீந்திரன்

Saturday, 10 June 2023

அறிந்த பொக்கிஷம்... அறியாத பவளங்கள் -51

 ஒரே ஒரு சூரியன்தான் பகலுக்கெல்லாம்... 

ஒரே ஒரு சந்திரன்தான் இரவுக்கெல்லாம்...

ஒரே ஒரு பாட்ஷாதான் ஊருக்கெல்லாம்...

எத்தனையோ பேர் வந்தாலும் சென்றாலும் மக்களின் மனம் எப்போதும் திறமையின் பக்கம்தான். அதுவும் இரண்டு மூன்று தலைமுறையினரை கட்டிப் போடும் திறமையும் அதிர்ஷ்டமும் ஒரு சிலருக்கு மட்டுமே வாய்க்கும். ஆண்டவனின் அருளை முழுமையாக பெற்ற கோடிகளில் ஒருவருக்கே அது கை கூடும். அவர்களில் ரஜினியும் ஒருவர்.

1975ல் தொடங்கிய சினிமா இன்னிங்ஸ், 'அண்ணாத்த' கடந்தும் விறுவிறுப்பு குறையாமல் போகிறது. ஒரு தனி மனிதனை நம்பி 600 கோடி ரூபாயை முதலீடு செய்வது (2.0) எல்லாம் எளிதாக கடந்து செல்லக் கூடிய சாதாரண விஷயமல்ல.

கிட்டத்தட்ட நான் பிறந்த ஆண்டில்தான் ரஜினியின் சினிமா அறிமுகமும். 'கெட்ட பய சார் இந்த காளி'ன்னு தொடங்கியதில் இருந்து

 '16 வயதினிலே' 'மூன்று முடிச்சு' 'அவள் அப்படித்தான்' என 1980களில் பல படங்களில் வரிசையாக தொடர்ந்த ரஜினியின் வில்லத்தனமான நடிப்பு... சந்திரமுகி வேட்டையன்,  எந்திரன் சிட்டி ('ம்மே...') வரை சூடு குறையாமல் இருப்பதை கண்டு வியக்காமல் இருக்க முடியவில்லை. 'பாட்ஷா' மாணிக்கத்தின் உக்கிர பார்வை வீச்சு முழு நேர வில்லன் நடிகர்களிடம் கூட எதிர்பார்க்க முடியாதது. இன்றளவும் ரஜினியின் அலட்டல் இல்லாத வில்லன் நடிப்புக்கு நிரந்தர ரசிகன் நான். 

அது ஒரு புறம் இருக்க தம்பிக்கு எந்த ஊரு, தில்லு முல்லு, ராஜாதி ராஜா, குரு சிஷ்யன் இப்படியாக சந்திரமுகி சரவணன் வரை பல தசம ஆண்டுகளை கடந்தும் கலகலப்பூட்டும் ரஜினியின் நகைச்சுவைக்கு ஈடு இல்லை.

ஆதர்ச நாயகனுக்கு சாமான்ய ரசிகன் தொடங்கி  வெறித்தனமான ரசிகர்கள் வரை இருப்பது வழக்கம். ஆனால், ரஜினியை 1980களின் குழந்தைகள் தொடங்கி 2010களின் குழந்தைகளும் கூட ரசிப்பதை அவ்வளவு எளிதாக கடந்து போய் விட முடியாது. 

எந்த ஒரு மனிதரையும் எல்லோருக்கும் பிடிக்கும் என்பது சர்வ நிச்சயம் கிடையாது. ஆனால்,  பெரும்பாலான திரைப்பட ரசிகர்களை கவர்ந்திழுக்கிறது இந்த 70 வயது காந்தம்.

இன்று வரை அவரை ஆராதிக்கும் ஆரம்ப கால ரஜினி ரசிகர்களை, பேரன் பேத்தி எடுத்தவர்கள் என போகிற போக்கில் விமர்சிப்பவர்கள், அரை நூற்றாண்டை எட்டியும்,  அவரது 'கிரேஸ்' குறையவில்லை என்பதை கவனிக்க தவறியவர்கள். 

எஸ்பி முத்துராமன், மகேந்திரன், கலைஞானம் போன்ற இயக்குனர்களிடம் நடித்தவர்... சங்கர், முருகதாஸ், கார்த்திக் சுப்புராஜூக்கும் நடிக்கிறார். விஜயகுமார், சிவகுமார்,  முத்துராமன், நம்பியார் போன்றவர்களுடன் நடித்தவர்... விஜய் சேதுபதியுடனும் நடிக்கிறார்.

கருப்பு வெள்ளை, ஈஸ்ட்மென்ட், வண்ணப்படம், 35 எம்எம், 70 எம்எம் சினிமாஸ்கோப், 3டி முப்பரிமாணம், அனிமேஷன் என சினிமாவின் அனைத்து தொழில் நுட்பத்திலும் நடித்துள்ள ஒரே நடிகர் ரஜினியாகத்தான் இருக்கும்.



அரசியலில் ரஜினி வருகை எப்படி இருக்கிறதோ? ஆனால், 1994, 1996, 2017, 2020 ஆண்டு எதுவாக இருந்தாலும் சினிமா வசனங்களை தவிர்த்து பொது வெளியில் ரஜினி உதிர்க்கும்  வெறும் நாலு வார்த்தைகள் கூட, (அவருக்கு ஆதரவோ, விமர்சனமோ எதுவாயினும்) நான்கு நாளைக்கு வைரலாகி கிடக்கிறது.

ஆண்டவனாலும் காப்பாத்த முடியாது தொடங்கி... 

சிஸ்டம் சரியில்ல... நகர்ப்புற நக்சலைட்...  ஒரு நிமிஷம் தலை சுத்திப் போச்சி... 

இதெல்லாம் அதற்கு உதாரணம். அதுதான் ரஜினி என்ற காந்தத்தின் மார்கண்டேய மந்திரம்.

#நெல்லை_ரவீந்திரன்

Monday, 5 June 2023

அறிந்த பொக்கிஷம்... அறியாத பவளங்கள் -50

 பெயர்...

இந்த மூன்று எழுத்துக்குள் எவ்வளவோ புதைந்து கிடக்கிறது. நம்பர்கள் கூட, சில வேளைகளில் அடையாள பெயர்களாகி விடும்.  பூனை என்ற பெயரை சொன்னால் யானையின் உருவம் கண் முன்னே  வருவதில்லை. ஆனால், அந்த இரண்டுக்குமே அதுதான் தங்கள் பெயர் என தெரியுமா? 

அதே நேரத்தில் பெயர் என்றால்  இவ்வளவுதான் என்றும் ஒதுக்கி விட முடியாது. 

சில பெயர்கள் மரியாதை தரும். சில பயத்தை தரும். இன்னும் சில சில என்னவெல்லாமோ மனதுக்குள் தரும். சிலருக்கு தங்களுக்கு சூட்டிய பெயரே பெருமையாக இருக்கும். எனக்கும் அப்படித்தான். ஏனென்றால் இந்த பெயர் மிகவும் பெக்குலியரானது. 

இந்த முகநூலை எடுத்துக் கொண்டாலே, தசம ஆண்டுக்கும் மேலான அனுபவத்தில், இந்த பெயரை தசம எண்ணிக்கை அளவு கூட பார்த்ததில்லை. நேரிலும் கூட, என் பெயரையே கொண்ட பத்துக்கும் குறைவானவர்களையே பார்த்திருக்கிறேன்.


இப்படியான பெயரிலேயே ஒரு நடிகர் இருக்கிறார். 1980ஸ் சினிமா ரசிகர்களுக்கு அவரை நன்றாகவே தெரியும். அன்றைய நாளின் ஹீரோக்களுக்கு நிகராக படங்களில் நடித்தவர், ரவீந்தர் என்ற ரவீந்திரன். 

சென்னை மற்றும் புனேயில் சினிமா படிப்பு முடித்து முழு வாழ்க்கையையும் இன்று வரை சினிமா மற்றும் மீடியாவுக்கே அர்ப்பணித்தவர். சுமார் 150க்கும் அதிகமான படங்களில் நடித்திருக்கிறார். அதில், பாதிக்கு மேல் மலையாளம், அடுத்ததாக தமிழ். தமிழில் முதன் முதலில் ரவீந்திரன் அறிமுகமான படம் டி.ராஜேந்தரின் 'ஒரு தலை ராகம்'. படம் முழுவதும் ஹீரோவோடு கல்லூரி மாணவராக டிஸ்கோ டான்சராக வருவார். டிஸ்கோ ரவீந்தர் என்ற பெயரும் அவருக்கு உண்டு.


ஆமாம். அவர் அருமையான டான்சர். 1980களில் டிஸ்கோ டான்ஸ் உச்சத்தில் இருந்தபோது அதன் அடையாளம் ரவீந்திரன். அதாவது அன்றைய பிரபுதேவா. அப்போதெல்லாம் படங்களின் வெற்றிக்கு பாடல்கள் தான் பெரிய பக்கபலம். கேசட்டாக ஆடியோ வடிவிலும், திரைப்படத்தில் விஷுவலாகவும் இருக்கும். அதனால் படங்களில் நிச்சயம் கிளப் டான்சுடன்  பாடல் இருக்கும். அதனாலேயே ரவீந்திரனுக்கும் ஹீரோ போலவே படங்களில் பாடல் இருக்கும்.



'ஒருதலை ராகம்' படத்தில் "அட மன்மதன் ரட்சிக்கனும் இளம் மங்கையர் பாவைகளே.."

'வாழ்க்கை' படத்தில் "மெல்ல மெல்ல என்னைத் தொட்டு..."

'ரங்கா' படத்தில் "அழகான பட்டுப் பூச்சி ஆடை கொண்டது..."

'ராம் லட்சுமணன்' படத்தில் "வாலிபமே வா வா, தேன் சுவையே தா தா..."

'தங்க மகன்' படத்தில் "வா வா பக்கம் வா பக்கம் வர வெக்கமா..."

இப்படி ரவீந்திரனின் டான்ஸ் பாடல்களை நிறைய சொல்லலாம்.  


சிவாஜி கணேசனுடன் 'வாழ்க்கை' படத்தில் அவரது மகனாக, நம்பியாரின் மருமகனாக, சில்க் ஸ்மிதா ஜோடியாக நடித்திருப்பார். இது போலவே, ரஜினியுடன் 'ரங்கா', 'போக்கிரி ராஜா', 'தங்க மகன்', 'அடுத்த வாரிசு', கமலுடன் 'சகலகலா வல்லவன்', 'பேர் சொல்லும் பிள்ளை', 'ராம் லட்சுமண்' சத்யராஜுடன் 'விடிஞ்சா கல்யாணம்' என முன்னணி நாயகர்களுடன் நடித்திருக்கிறார். பெரும்பாலும் நெகடிவ் ரோல்கள். 

ஹீரோவாகவும் ஒன்றிரண்டு படங்களில் ரவீந்திரன் நடித்திருக்கிறார். டி.ராஜேந்தரின் 'வசந்த அழைப்புகள்' படத்திலும் இவர்தான். அதில் டி.ராஜேந்தரின் மனைவி உஷா ராஜேந்தருக்கு ஜோடி.


1980களின் துவக்கத்தில் ஏராளமான படங்களில் உஷா நடித்திருக்கிறார் என்பது கூடுதல் தகவல். அந்த படத்தில், 

"அட நீல சேல பறக்கையில, மால வேள மயக்கயில மச்சான் இங்க வாடி புள்ள..."

"கிட்ட வாடி ஆச புள்ள எட்டு நாளா தூக்கமில்ல...முத்து முத்து ஜாதி முல்ல..."

பாடல்களில் உஷாவோடு செம டான்ஸ் போட்டிருப்பார் ரவீந்திரன்.

சுமார் பத்து ஆண்டுகள் தமிழ் சினிமாவில் இருந்த ரவீந்திரன், சமீபத்திய சிவகார்த்திகேயனின் 'காக்கிச்சட்டை', சத்யராஜின் 6'2" என ரீ என்ட்ரி கொடுத்தார்.

மலையாளத்தில் இப்பவும் மீடியா அண்ட் ஈவன்ட் மேனேஜ்மன்ட், டி.வி. சேனல்களில் சினிமா நிகழ்ச்சிகளுக்கு ஆங்கரிங், சினிமா சம்பந்தமான வகுப்பு, கருத்தரங்கம் என பிசியாகவே இருக்கிறார். பெரிய அளவிலான சினிமா சம்பந்தமான நிகழ்ச்சிகளையும் நடத்திக் கொடுக்கிறார், ரவீந்திரன்.

பெயராலும் டான்சாலும் என்னை கவர்ந்த நடிகர்.

#நெல்லை_ரவீந்திரன்

Thursday, 1 June 2023

அறிந்த பொக்கிஷம்... அறியாத பவளங்கள் -49

 டைரக்டர் டச்...

டைரக்டர் டச்னு சொல்லுவாங்க அது இவருக்காகவே வந்த வார்த்த. 

மொதல்ல அசிஸ்டன்ட் டைரக்டர், கதாசிரியர்னு அறிமுகமாகி அப்பிடியே  சில நிமிஷம் ஸ்கிரீன்லயும் தலய காட்டினாரு. '16 வயதினிலே' படத்தில நாட்டு வைத்தியராவும், 'சிவப்பு ரோஜாக்கள்'ல ஓட்டல் சர்வராவும் தல காட்டினவரு அடுத்த அஞ்சாறு வருஷத்தில கமல், ரஜினிக்கு ஈக்குவலா டஃப் குடுத்தாருன்னா தெறமைய தவிர வேறென்ன..?


கிராமத்து டைரக்டர் பாரதிராஜாவோட 'டிக் டிக் டிக்', 'சிவப்பு ரோஜாக்கள்' மாதிரியான கிரைம் திரில்லருக்கு இவருதான் அஸ்திவாரம். 'கன்னிப் பருவத்திலே', 'விடியும் வரை காத்திரு' மாதிரி படங்கள்ல இவரோட வில்லன் வேஷத்த சினிமா ரசிகருங்களால மறக்க முடியுமா?

ஆரம்ப காலத்தில இவருக்கு டப்பிங் குரல்தான். 'புதிய வார்ப்புகள்', 'சுவரில்லாத சித்திரங்கள்', 'பாமா ருக்மணி' வர இவருக்கு இரவல் குரல்தான். 'ஒரு கை ஓசை' படத்தில வாய் பேச முடியாதவராவே நடிச்சிருப்பாரு. 'மவுன கீதங்கள்'தான் இவரோட மொத சொந்த குரல் படம். அதுக்குள்ள பெஸ்ட் வசனகர்த்தா, பெஸ்ட் நடிகர்னு விருதுகள வாங்கிக் குவிச்சிட்டாரு...

அதுக்குப் பிறவு அவரோட காலம் தமிழ் சினிமாவோட வசந்த காலம். கதை, திரைக்கதை, வசனம், இயக்கம், நடிப்பு கூடவே இசை இப்படி ஒருத்தரே பல அவதாரம் எடுத்தது எல்லாம் சினிமாவுல அந்த காலகட்டம்தான். 



1980களில் கண்ணாடி போட்டுக்கிட்டு ஒருத்தரு ஹீரோவா பேமசாவுறது எல்லாம் நெனச்சிப் பார்க்க முடியுமா? அவரால மட்டுந்தான் முடியும். சினிமா ஹீரோவுக்கே தேவையான டான்சும் வராது...

இவரு ஒரு ரூட்டுன்னா, டி.ஆர். இன்னொரு ரூட்டு. ரெண்டு பேரோட அதகளத்தில கமல், ரஜினி படங்களே தயங்கின காலம். அவங்களுக்கு ஈக்குவலா இவங்களுக்கும் ரசிகர்கள் உண்டு. 

'இன்று போய் நாளை வா', 'முந்தானை முடிச்சி', 'சின்ன வீடு', 'அந்த ஏழு நாட்கள்', 'இது நம்ம ஆளு', 'எங்க சின்ன ராசா', 'தாவணிக் கனவுகள்', 'சுந்தர காண்டம்' 'வீட்ல விசேஷங்க'... இப்பிடி இவரோட சூப்பர் டூப்பர் ஹிட் ஏராளம். தமிழ் சினிமாவில மொத மொத ஒரு கோடிக்கு யாவாரம் ஆன படம் தாவணிக் கனவுகள்னு சொல்லுவாங்க...

ரஜினியோட நடிச்ச 'நான் சிவப்பு மனிதன்' ரிலீஸ் ஆனப்ப ரெண்டு ரசிகருங்க பிரச்னையால தியேட்டர்காரங்க தலைய பிடிச்சிக்கிட்டது தனிக்கத.

இருபது பிளஸ் வயசிலருந்த கோவை சரளாவுக்கு அம்மா வேஷம் கட்டி பார்த்தவர். எல்லோரும் கவர்ச்சியாகவே பார்த்த சில்க் ஸ்மிதாவுக்கு புடவைய கட்டி தனக்கு ஜோடியா ஹீரோயினாக்கி அழகு பாத்தவர்.

நாலு லைன் கதய, சுவாரஸ்யமா திரைக்கதயா மாத்தி, சுவையான காட்சிங்களோட ரசிகர்களுக்கு ஃபுல் மீல்ஸ் குடுக்கிற சிறந்த திரைக்கதையாசிரியர் இந்தியாவிலயே  இவரு ஒருத்தரு தான். 

அதுக்கு நல்ல உதாரணம் எது தெரியுமா? எம்ஜிஆர் நடிச்சி பாதியில விட்ட 'அண்ணா நீ என் தெய்வம்' படத்தோட ஸீன்கள மட்டும் வச்சிக்கிட்டு அப்பிடியே தன் பாணிக்கு மாத்தி சூப்பர் ஹிட் படமா குடுத்த 'அவசர போலீஸ் 100' படம்.

ஆர்.பாண்டிய ராஜன், பார்த்திபன் இவரோட சிஷ்யங்கன்னா பாத்துக்கோங்க.. படத்தில சூப்பரா ரசிகர்கள கவருத மாதிரி ஸீன்ல 'கதை திரைக்கதை வசனம் இயக்கம்'னு கார்டு போடுறது இவரோட ஸ்டைல். இவரோட திரைக்கதையை பார்த்து அமிதாப் பச்சனே கூப்பிட்டு குடுத்த இந்தி படம் 'ஆக்ரி ரஸ்தா...'

இவரு ஒரு இசையமைப்பாளரும் கூட. 'இது நம்ம ஆளு' படத்துக்கு இசை இவர்தான்...! அந்த படத்தில "பச்ச மலை சாமி ஒண்ணு உச்சி மல ஏறுதுன்னு..." பாட்டு இவர் பாடுனதுதான்...!

தமிழ் சினிமா வரலாற எழுதினா, இவருக்கு பெரிய தனி அத்தியாயம் உண்டு. முருங்கைக்காய், சின்ன வீடு மாதிரி   நெறைய விஷயங்கள ஒரே வார்த்தையில புரிய வச்ச ரச வாத வித்தைக்கு சொந்தக்காரர். 

எம்ஜிஆர் தன்னோட வாயால, தன்னோட வாரிசுன்னு சொன்ன ஒரே ஆளு இவர் மட்டுந்தான். 

எம்ஜிஆர மாதிரியே இவரையும் எனக்கு ரொம்ப பிடிக்கும். என்னோட பள்ளிப்பருவ ஹீரோ இவரு. என்னையே 'சின்ராசு'ன்னு கூப்பிட்ட நண்பர்களும் உண்டு..

இயக்குநர், நடிகர், இசையமைப்பாளர், திரைக்கதையாசிரியர், பத்திரிகையாசிரியர் பாக்யராஜ் அவர்களுக்கு பிறந்த நாள் (ஜனவரி 7) வாழ்த்துகள்...

#நெல்லை_ரவீந்திரன்

Sunday, 30 April 2023

அறிந்த பொக்கிஷம் அறியாத பவளங்கள் -48

தமிழ் சினிமா கொண்டாடத் தவறிய திறமையாளர்களில் இவரும் ஒருவர். இயக்குநர், இசையமைப்பாளர், பாடலாசிரியர் இப்படி ஏதாவது ஒன்றில் சாதனை படைத்தாலே அவர்களை கொண்டாடி தீர்ப்போம். ஆனால், இவர் இந்த மூன்றிலுமே ஏராளமான ஹிட் கொடுத்து சாதனை படைத்தவர். கூடவே, தான் இயக்கிய படங்களுக்கு கதாசிரியர். பாடகர், பின்னணி குரல், நடிப்பு என்றும் பன்முகம் உண்டு.


அவர் தான் கங்கை அமரன். இசைஞானி இளையராஜாவின் தம்பி. இளையராஜா கூடவே திரையுலகுக்கு வந்த கங்கை அமரன் பற்றி நிறைய எழுதலாம்.

1977ல் வெளியான '16 வயதினிலே' படத்தின் "செந்தூரப் பூவே செந்தூரப் பூவே ஜில்லென்ற காற்றே..." பாடலும் இவர்தான். அஜித்தின் 'மங்காத்தா' படத்தின் "விளையாடு மங்காத்தா..." பாடலும் இவர்தான்..


1980ஸ் ஹிட்டான 'கோழி கூவுது' படம் இவர் இயக்கம் தான். 1990ஸ் ஹிட்டான 'கரகாட்டக்காரன்' இயக்கமும் இவர்தான்.


1970ஸ் இறுதியில்  துவங்கி பாடலாசிரியராக இவர் எழுதிய பாடல்கள் இன்றளவும் ரசிகர்களை கட்டிப் போடும் ரகம்...

"பூவரசம் பூ பூத்தாச்சி பொண்ணுக்கு தேதி வந்தாச்சி..."

"நித்தம் நித்தம் நெல்லுச் சோறு நெய் மணக்கும் கத்தரிக்கா..."

"உறவுகள் தொடர்கதை உணர்வுகள் சிறுகதை..."

"வெத்தல வெத்தல வெத்தலயோ..."

"பூங்கதவே தாழ் திறவாய் பூவாய் பெண் பாவாய்..."

"என் இனிய பொன் நிலாவே..."

"ஆசய காத்துல தூது விட்டு.."

"காற்றில் எந்தன் கீதம் காணாத உன்னை தேடுதே..."

"சிறு பொன்மணி அசையும் விழி... பொன்மணி தாள லயம்..."

"புத்தம் புது காலை பொன்னிற வேளை..."

"இன்றைக்கு ஏன் இந்த ஆனந்தமே..."

"போவோமா ஊர்கோலம் பூலோகம் எங்கெங்கும்..."

இவை எல்லாம் கங்கை அமரன் எழுதிய பாடல்களின் சாம்பிள்கள். ராமராஜனின் 'கரகாட்டக்காரன்' விஜயகாந்தின்  'அம்மன் கோவில் கிழக்காலே' மாதிரி சில படங்களில் அனைத்து பாடல்களையும் எழுதியவர் இவர்தான். 



1977 துவங்கி 2kஸ் படங்களான 'மங்காத்தா' படத்தில் "விளையாடு மங்காத்தா...", "இது எங்க பலே லக்கா..." பாடல்களையும்  'கோவா' படத்தில் ஆன்ட்ரியா பாடிய "இதுவரை இல்லாத உணர்விது இதயத்தில்..." பாடலும் 'சென்னை 28' படத்தில் "சரோஜா சாமா நிக்காலோ..." பாடலும் கங்கை அமரன் தான். தலைமுறைகளை கடந்தும் நூற்றுக்கணக்கான பாடல்களை எழுதிக் கொண்டிருப்பவர்.


அடுத்ததாக, இசையமைப்பாளர் என எடுத்துக் கொண்டால், 1979ல் வெளியான 'ஒரு விடுகதை ஒரு தொடர்கதை' படம்தான் இவரது முதல் இசை. சுமார் 75 படங்களுக்கு கங்கை அமரன் இசையமைத்திருக்கிறார். 

"பொன்மானத் தேடி நானும் பூவோட வந்தேன்..." பாடலின் எங்க ஊரு ராசாத்தி இவர் இசை தான்.



கமலின் 'வாழ்வே மாயம்' படத்துக்கு இவர் தான் இசை. இதை இளையராஜா இசை என்றே ரசிகர்கள் நினைத்துக் கொண்டிருப்பார்கள். பாக்யராஜின்  'சுவரில்லாத சித்திரங்கள்', 'மவுன கீதங்கள்', ராமராஜனின் 'நம்ம ஊரு நல்ல ஊரு'. பிரபுவின் 'சின்னத் தம்பி பெரியத் தம்பி', 'என் தங்கச்சி படிச்சவ'. 

அப்புறம் 'அத்தமக ரத்தினமே' ("அள்ளி அள்ளி வீசுதம்மா... அன்பை மட்டும் அந்த நிலா நிலா..." பாடல்) இப்படி இவர் இசையமைத்த ஹிட் படங்களை வரிசைப் படுத்தினால் ஆச்சரியமூட்டும்.

சுமார் 70 படங்களுக்கு கங்கை அமரன்  இசையமைத்திருக்கிறார். இளையராஜாவின் ஆரம்ப கால 1980ஸ் படங்களுக்கு இசை உதவி இவர்தான். 



அடுத்ததா பார்த்தால், பாடலாசிரியர், இசையமைப்பாளர், இதுக்கும் மேல அவர் பல சூப்பர் ஹிட் படங்களின் இயக்குநரும் கூட. சுமார் 20க்கும் அதிகமான படங்களை இயக்கி இருக்கிறார், கங்கை அமரன்.

1982ல் வெளியான பிரபு, சில்க் ஸ்மிதா, சுரேஷ், விஜி நடித்த 'கோழி கூவுது' படம் தான் அவரது இயக்கத்தில் வெளியான முதல் படம்.  முதல் படமே சூப்பர் ஹிட். தமிழ் திரையுலகின் அழிக்க முடியாத சாதனை காவியமான 'கரகாட்டக்காரன்' படமும் இவர் இயக்கியதுதான். 

ராமராஜனுக்கு மட்டும் 'எங்க ஊரு பாட்டுக்காரன்', 'வில்லுப் பாட்டுக்காரன்', 'செண்பகமே செண்பகமே' என சுமார் பத்து படங்களை கங்கை அமரன் இயக்கி இருக்கிறார்.



பிரபு நடித்த ஹிட் படமான 'கும்பக்கரை தங்கய்யா', விஜயகாந்தின் 'கோயில் காளை' (இந்த பட பாடல்கள்  ஹிட்) படங்களும் கங்கை அமரன் இயக்கியவைதான். இவர் இயக்கிய பெரும்பாலான படங்களுக்கு கதாசிரியரும் பாடலாசிரியரும் கூட இவரேதான்.

இது தவிர, பாக்யராஜின் ஆரம்ப கால படங்களில் அவருக்கு கங்கை அமரன் டப்பிங் குரல் கொடுத்திருக்கிறார் என்பது கூடுதல் ஆச்சர்யம்.

இது போலவே, "பூஜைக்கேத்த பூவிது நேத்து தான பூத்தது...", "வாடிப்பட்டி மாப்பிள்ள எனக்கு வாக்கப்பட்டு வாடி என நாக ரத்தினமே..." என பாடகராகவும் கங்கை அமரன் பாடிய பாடல்களை நிறைய சொல்லலாம்.


சினிமாவில் தனக்குத் தெரிந்த எல்லா துறையிலும் பாதம் பதித்து ஜொலிக்கும் அமர் சிங் என்ற கங்கை அமரன், 1977ல் துவங்கி அவரது வாரிசுகளான வெங்கட் பிரபு,  பிரேம்ஜியின் இன்றைய படங்கள் வரையிலும் ஹிட் அடித்து வருகிறார்.

(பவளங்கள் ஜொலிக்கும்)

#நெல்லை_ரவீந்திரன்

Friday, 28 April 2023

தண்ணீர் போல் வாழுங்கள்

இந்த உலகம் தோன்றிய நாளில் இருந்து மாறாதது தண்ணீர். டைனோசர் இல்லை. மம்முத் இல்லை.  ஆனால், ஈராயிரம் ஆண்டுக்கு முன் வள்ளுவர் எழுதிய விசும்புல் துளி என்னும் தண்ணீர் அப்படியே இருக்கிறது.

இந்த உலகில் எதனுடனும் தயங்காமல் சேருவது தண்ணீர். செம்புலப் பெயல் நீர் என தமிழ் இலக்கியம் சொல்லுகிறது. விண்ணில் இருந்து தூய்மையாக விழுந்தாலும் மண்ணில் மாசாவதை பற்றி கவலை படுவதில்லை. கழிவு நீர் வாய்க்காலில் முகம் கோணாமல் கலக்கிறது. 

ஆறுகளில் நிறைந்து ஓடினாலும், குறைவாக ஓடினாலும், உப்பு கடலில் கலந்தாலும் தன்னையே மாற்றி கொள்கிறது. வீழ்ச்சியை கூட மகிழ்ச்சியுடன் செய்வது தண்ணீர் மட்டும்தான். மனிதனுக்கு சிலிர்ப்பை தருவதும் அதுவே.

ஒவ்வொரு மனிதனும் தனது அந்தரங்கத்தை தண்ணீரிடம்  முழுமையாக காண்பிக்க தயங்குவதில்லை. அந்த ரகசியத்தை ஒருபோதும் பிறரிடம் தண்ணீர் சொல்லுவதில்லை. இந்த உலகமே தண்ணீரை நம்பித்தான் இருக்கிறது. ஆனாலும் அதன் குணம் எக்காலத்திலும் மாறியது கிடையாது.

அதனால் தான், மனிதனை புனிதப் படுத்துவதற்கு பல்வேறு மதங்களிலும் நீரையே பயன் படுத்துகின்றனர். புனித நீர், புண்ணிய நதி, பரந்து விரிந்த கடல், சிறு குழந்தை கொட்டி மகிழும் விளையாட்டு பொருள், அருவெறுப்பான சாக்கடை எதுவாக இருந்தாலும் எதற்காக பயன் படுத்தினாலும் தன்மை மாறாத தண்ணீரைப் போலவே நாமும் இருப்போம்.



Saturday, 8 April 2023

அறிந்த பொக்கிஷம்... அறியாத பவளங்கள் -47

80ஸ் மோகனையும் எஸ்.என். சுரேந்தரையும் பற்றி பேசியதுமே இவர் நினைவையும் தவிர்க்க முடியவில்லை. 1980களில் வெளியான படங்களில் பெரும்பாலும் காதல் காவியங்கள்தான். அதனால் ரொமான்டிக் ஹீரோக்களும் அதிகம். அவர்களில் மோகனுக்கு அடுத்ததாக குறிப்பிடத்தக்கவர் இவர். இன்றைய சிவகார்த்திகேயன், விமல் மாதிரி... அவர்தான் சுரேஷ்.



எடிட்டிங், டான்ஸ் இப்படித்தான் சினிமாவுக்குள் வந்தவர் சுரேஷ். நல்ல டப்பிங் ஆர்ட்டிஸ்டும் கூட. ஆனால், நடிகராகி விட்டார். 1981ல் சந்தான பாரதி இயக்கத்தில் வெளியான 'பன்னீர் புஷ்பங்கள்' படம் தான் நடிகராக அறிமுகம். அந்த படத்தில் அவருக்கு பள்ளிக்கூட பிளஸ் டூ மாணவன் வேடம். அப்போது சுரேசுக்கு 20 வயது கூட ஆகவில்லை.



உண்மையில், பாரதிராஜாவின் 'அலைகள் ஓய்வதில்லை' படம் தான் இவரது அறிமுகமாக இருந்திருக்க வேண்டியது. ஆனால், சந்தானபாரதி படத்தில் நடிப்பதற்கு முதலில் ஒப்புக் கொண்டு விட்டதால், பாரதிராஜாவின் படத்தில் நடிக்கவில்லை. இதனால் தான், நவரச நாயகன் கார்த்திக்கை இயக்குநர் பாரதிராஜா அறிமுகப்படுத்தினார்.


'பன்னீர் புஷ்பங்கள்' பட வெற்றிக்கு பிறகு அடுத்த ஆண்டே கங்கை அமரன் இயக்கத்தில் பிரபுவுடன் சுரேஷ்  நடித்த 'கோழிகூவுது' செம ஹிட். தபால்காரர் ராமகிருஷ்ணனாக சுரேஷ் வருவார். அவருக்கு ஜோடி விஜி. பிரபுவுக்கு சில்க்ஸ்மிதா. அந்த படத்தின் பாடல்கள் இன்றளவும் கொண்டாடப்படும் ரகம்.

அதன்பிறகு, அடுத்த பத்து ஆண்டுகளுக்கு காதல் நாயகனாக வலம் வந்தார் சுரேஷ். நதியா, ரேவதி... இவருடைய வெற்றி ஜோடிகள். 'உன்னை நான் சந்தித்தேன்', 'பூக்களை பறிக்காதீர்கள்', என இந்த ஜோடிகளின் ஹிட் படங்கள் ஏராளம்.


'வெண்ணிற ஆடை', 'காதலிக்க நேரமில்லை' படங்களின் பிரபல  இயக்குநர் ஸ்ரீதர், இவரை ஆரம்பத்தில் அறிமுகப்படுத்துவதற்கு தயங்கி நிராகரித்தார். ஆனால், 1985ல் அவரே 'உன்னைத் தேடி வருவேன்' படத்தில் சுரேஷை நடிக்க வைத்தார்.


நடிகர் சுரேஷ் மிக மிக உயரமானவர். சுமார் ஆறு அடி உயரம். அதனால் டூயட் பாடும்போதெல்லாம் முழங்காலை லேசாக வளைத்தபடியே ஆடுவார். அதுவும் உயரம் குறைந்த நதியா, ரேவதி போன்றவர்களுடன் எல்லாம் அவர் நடித்தது வேற லெவல். அதே நேரத்தில் 80ஸ்களில் டிரெண்டிங்கில் இருந்த டிஸ்கோ டான்சை மிக அருமையாக ஆடிய நடிகர்களில் சுரேஷும் முக்கியமானவர்.

 'அபூர்வ சகோதரிகள்' படத்தில் "ரோஸி மை நேம் இஸ் ரோஸி...", "என்னை யாரும் தொட்டதில்லை தொட்டவனை விட்டதில்லை..." பாடல்களை சொல்லலாம். அந்த படத்தில் சுரேஷுக்கு ஜோடி ஊர்வசி. நம்பவே முடியாத அளவில் 'முந்தானை முடிச்சி' ஊர்வசி செம்ம கிளாமரா நடிச்சிருப்பார். அந்த டிஸ்கோ நடன பாடல்களுக்கு இசை பப்பிலஹரி. இந்தி இசையமைப்பாளர். 1980களில் இளையராஜா உச்சத்தில் இருந்ததால் பிற மொழி இசையமைப்பாளர்கள் பலர் வந்தனர். ஆர்.டி.பர்மன், லட்சுமிகாந்த்- பியாரிலால், வரிசையில் பப்பிலஹரியும் ஒருவர்.

1980களில் துவங்கி தமிழில் சுமார் 100 படங்களில் சுரேஷ் நடித்திருக்கிறார். எல்லா படங்களுமே  ரொமான்டிக் வேடமாவே வந்ததால் போரடித்து, 1990களின் துவக்கத்தில் தெலுங்கு சினிமா பக்கம் சென்று விட்டார். அங்கு வெரைட்டியான ரோல்களில் நடித்த சுரேஷ், அனைத்து மொழிகளிலும் சேர்த்து மொத்தம் 250க்கும் அதிகமான படங்களில் நடித்திருக்கிறார். படங்களும் தயாரித்திருக்கிறார்.

நம்மில் பலரும் சுரேஷ் என்ற பெயரை நிறையவே கேள்விப்பட்டிருப்போம். ஒவ்வொருவருக்கும் குறைந்தது ஐந்து நண்பர்களாவது இருப்பார்கள். ஆனால், 2கே கிட்ஸுகளுக்கு இந்த சுரேஷ் பற்றி அதிகம் தகவல்கள் தெரிந்திருக்காது. அவர்களுக்கான தகவல் இது...

அஜித்தின் 'அசல்' படத்து வில்லன்... விஜயின் 'தலைவா' படத்தில் ஆஸ்திரேலிய ஓட்டல் ஓனர் கம் போலீஸ் அதிகாரி... இவரேதான்.



1990களில் தெலுங்கு பக்கமா போன சுரேஷ்,  சுமார் பத்து பதினைந்து ஆண்டுகளுக்கு பின் தமிழுக்கு திரும்பி வில்லன், குணச்சித்திரம் என நடித்ததோடு சின்னத்திரைகளிலும்  தலை காட்டி வருகிறார்.

பதிவின் ஆரம்பத்தில் சுரேஷை டப்பிங் ஆர்ட்டிஸ்ட் என சொன்னோம் இல்லையா..? அதுதான் இந்த பதிவின் நிறைவு தகவல். 'ஆசை' படத்தில் அஜித் பேசும் குரல் இவருடையது தான். இதுபோல நாகார்ஜுனா நடித்து ஹிட்டான 'ரட்சகன்' போன்ற சில படங்களுக்கும் அவருக்கு குரல் கொடுத்தவர் நடிகர் சுரேஷ்தான்...

(பவளங்கள் ஜொலிக்கும்)

#நெல்லை_ரவீந்திரன்

Thursday, 30 March 2023

அறிந்த பொக்கிஷம்... அறியாத பவளங்கள் -46

ஒரு நடிகரையே சூப்பர் டூப்பர் ஹீரோவாக்கிய குரல், இவருடையது. டப்பிங் ஆர்ட்டிஸ்ட், பின்னணி பாடகர், நடிகர் இப்படி பன்முக கலைஞரான இவர், இளைய தளபதி விஜயின் தாய்மாமன். அவர்தான் எஸ்.என்.சுரேந்தர். 

சிறு வயதிலேயே குழந்தை பாடகராக பாடல்களை பாடியிருக்கிறார். 1960களின் ஹிட்டான 'பாமா விஜயம்' படத்தில் வரும் "வரவு எட்டணா செலவு பத்தணா..." பாடலில் வரும் குழந்தை குரல் இவருடையதுதான்.


சினிமாவில் நடிகராகவோ, பின்னணி பாடகராகவோ மாற வேண்டும் என்பது அவர் விருப்பம். ஆனால் பின்னணி குரல் கொடுப்பவராகி விட்டார். சீயான் விகரம் கூட, முதலில் டப்பிங் ஆர்ட்டிஸ்ட். அதன் பிறகு தான் நடிகரானார் தெரியுமா?

கன்னடத்தில் இருந்து டப்பிங் செய்து தமிழில் வெளியான, 'அதிசய மாப்பிள்ளை' என்ற படத்தில்தான் சுரேந்தர் முதன் முதலில் குரல் கொடுத்தார். பிறகு, 'பெண்ணின் வாழ்க்கை' என்ற படத்தில் வில்லனுக்கு குரல் கொடுத்தார். இதுதான் அவர் டப்பிங் பேசிய முதல் தமிழ் படம். ஆதன் பிறகு, பின்னணி குரல் கொடுக்கும் டப்பிங் ஆர்ட்டிஸ்ட்டாக 600 படங்களில் முன்னணி ஹீரோக்கள் உட்பட ஏராளமான நடிகர்களுக்கு எஸ்.என்.சுரேந்தர் குரல் கொடுத்திருக்கிறார். 

'மைக்' புகழ் நடிகர் மோகனுக்கு முற்றிலுமாக இவரது இரவல் குரல்தான். ஆனால், மோகனின் முதல் படமான 'நெஞ்சத்தை கிள்ளாதே', படத்தின் ஹீரோவான நடிகரும் இயக்குநருமான பிரதாப் போத்தனுக்குத்தான் எஸ்.என். சுரேந்தர் குரல் கொடுத்திருப்பார்.

டி.ராஜேந்தரின் 'ரயில் பயணங்களில்' படத்தில் ஹீரோ ஸ்ரீநாத்துக்கு, 'ஒரு தலை ராகம்' சங்கருக்கு... 'அலைகள் ஓய்வதில்லை' படத்தில் அறிமுகமான நவரச நாயகன் கார்த்திக்குக்கு, 'சட்டம் ஒரு இருட்டறை' படத்தில் விஜயகாந்துக்கு, 'ஒரு ஓடை நதியாகிறது' படத்தில் ரகுவரனுக்கு... 1980ஸ் டிஸ்கோ டான்சரான நடிகர் ரவீந்தர் என சுரேந்தர் குரல் கொடுத்த நடிகர்கள் பட்டியல் ஏராளம். 'அந்நியன்' படத்தில் விக்ரமின் தந்தையாக வரும் மலையாள நடிகர் நெடுமுடி வேணுவுக்கும் இவரது குரல்தான்.

தமிழ் சினிமாவில் 1980களின் பெரும்பாலான அறிமுக நடிகர்களுக்கு முதலில் இவரது குரலைத்தான் பயன் படுத்தி இருக்கிறார்கள். 

ஆனால், இவரது குரல் என்றாலே மோகன் தான் நினைவுக்கு வருவார். (எனக்கும் கூட மோக் பற்றி எழுதியதுமே இவர் நினைவுக்கு வந்ததால் தான் இந்த கட்டுரை) 1981ல் 'கிளிஞ்சல்கள்' படம் துவங்கி 1987 வரை 75 படங்களுக்கு மோகனுக்கு குரல் கொடுத்திருக்கிறார். படங்களில் மோகன் தான் வசனம் பேசுவதாகவே ரசிகர்கள் நினைக்கும் அளவுக்கு இவரது குரல் கன கச்சிதமாக பொருந்தியிருக்கும்.

மென்மையான ரொமான்டிக்கான,  வார்த்தைகளுக்கு வலிக்காத மென்மையான குரல் எஸ்.என்.சுரேந்தருக்கு. கண்களை மூடியபடி கேட்டால், 1990ஸ் படங்களில் நடிகர் விஜயின் குரல் போலவே இருக்கும். அவரது தாய்மாமன் இல்லையா? 


விஜயுடன் 'நாளைய தீர்ப்பு', 'பிரியமுடன்', 'நெஞ்சினிலே' மாதிரியான சில படங்களிலும் எஸ்.என்.சுரேந்தர் நடித்திருக்கிறார். 'சென்னை 28' படத்திலும் தலை காட்டியிருக்கிறார்.

டப்பிங் குரல் கொடுப்பதை தாண்டி, எஸ்.என். சுரேந்தர் மிக அருமையான பின்னணி பாடகர். நான்கு மொழிகளில் 500க்கும் அதிகமான பாடல்களை பாடி இருக்கிறார். இவரது காதல் டூயட் பாடல்கள் எல்லாம் இன்றளவும் ரசிகர்களை கட்டிப் போடுபவை.


"மா மரத்து பூவெடுத்து மஞ்சம் ஒன்று போட வா..."

"பாரிஜாத பூவே அந்த தேவலோக தேனே..."

"கண்மணி நில்லு காரணம் சொல்லு காதல் கிளியே கோபமா..."

"தனிமையிலே ஏஏஏ ஒரு ராகம்.. " 

"தேவதை போலொரு பெண் ஒன்று வந்தது இங்கே..."

"மாலை என் வேதனை கூட்டுதடி..."

இவை எல்லாம் சாம்பிள்தான்.. 


விஜய்க்காக 'தேவா', 'ஒன்ஸ்மோர்', 'விஷ்ணு', 'மாண்புமிகு மாணவன்', 'காதலுக்கு மரியாதை' என பல படங்களில் பாடி இருக்கிறார். அதில் சில...

"பூவே பூவே பெண் பூவே.. என் பூஜைக்கு..."

"ஆனந்த குயிலின் பாட்டு தினம் எங்களின் வீட்டுக்குள்ளே..."

"சின்ன பையன் சின்ன பொண்ண காதலிச்சா பாட்டு வரும்..."


பின்னணி பாடகர் ஒருவர் பாடல்களையும் பாடிக் கொண்டு, படங்களில் பின்னணி குரலும் கொடுத்துக் கொண்டு தனது குரலாலேயே தமிழ் சினிமாவுக்கு உச்ச நட்சத்திரமாக ஒருவரை அடையாளப்படுத்தியவர், எஸ்.என்.சுரேந்தர் ஒருவராகத்தான் இருக்கும்.

(பவளங்கள் ஜொலிக்கும்)

#நெல்லை_ரவீந்திரன்