Thursday, June 30, 2011

மனிதன்

வேட்டை நாய்
என்னை விரட்டுகிறது
முதுமை

அங்கங்கள்
ஒவ்வொன்றிலும்
விதம் விதமான
வியாதி அறிகுறிகள்

அனைவருக்கும்
இனிப்பான எனக்கு
இனிப்பு நோய்

நீண்டு சென்ற
கடந்த காலத்தை விட்டு
சுருங்கி நிற்கும்
எதிர்காலத்தை நோக்கினால்

அச்சத்தின் நிழல்
மொத்தமாய் படிகிறது ஆனாலும்
நல்ல செயல்களில்
ஈடுபட மறுக்கிறது மனம்!

= வை.ரவீந்திரன் 

Tuesday, June 28, 2011

அரிசி மரம்


நண்டு நடக்கும்
நீரோடையில்
நீந்திக் குளித்த
ஞாபகம்

பெரிய ரோட்டில்
பழுதாகி நின்ற
பேருந்தில் படியேறி
விளையாடிய
ஞாபகம்

புளிய மரம் ஏறி
பழம் பறித்து &பின்
பங்கிட்டு சண்டையிட்ட
ஞாபகம்

பனை மரத்தின்
பாதியில் பார்த்திட்ட
கிளி பிடித்து வளர்த்த
ஞாபகம்

ஆணொன்று
பெண்ணொன்று என
ஆடும் பசுவும் வளர்த்த
ஞாபகம்

ஆலங்கட்டி மழையில்
ஆட்டம் போட்டு
அம்மாவிடம் அடி வாங்கிய
ஞாபகம்

எண்ணத் திரையில்
எப்போதாவது
எழுகின்றன ஞாபகங்கள்
பட்டணத்து இரைச்சலில்.....

தேவைகள் அதிகமானதால்
தேடல்கள் அதிகமானது
அவசர உலகில்
அவசர அவஸ்தைகள்

காலைக்கடன் கழிக்க
கால்மணி வரிசை
வாளி நீருக்கு
வரிசையோ வரிசை

அவசரக் குளியலில்
அவசரப் பயணம்
களைப்பை போக்க & ஒளிரும்
எலக்ட்ரான் திரை

சாப்ட்வேர்
வலைப் பின்னலில்
சகலமும்
அறியலாம்

அருமை மகன்
அருகமர்ந்து கேட்டான்
அப்பா! எப்படி இருக்கும்
அரிசி மரம்?

= வை.ரவீந்திரன்